مەملەكەت باسشىسى قاسىم-جومارت توقاەۆ بيزنەستى ونلاين-كەڭىستىك ارقىلى جۇرگىزۋ الەم ەكونوميكاسىنىڭ ماڭىزدى باعىتىنا اينالعانىن ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
– قازىر ەلەكتروندى ساۋدا نارىعىنىڭ كولەمى 3,5 تريلليون دوللارعا جەتتى. بۇل ۇدەرىس جىل سايىن ارتىپ كەلەدى. حالىقارالىق ونلاين ساۋدا-ساتتىقتى دامىتۋ ىسىندە قىتاي وتە ماڭىزدى ءرول اتقارادى. بۇگىن الەمدەگى اسا ءىرى ەلەكتروندى ساۋدا الاڭىندا قازاقستاننىڭ ۇلتتىق پاۆيلونى اشىلادى. بۇل قادام ەكى ەلدىڭ الىس-بەرىسىن جانداندىرماق. بىلتىر قازاقستان مەن قىتاي اراسىنداعى تاۋار اينالىمى 31 ميلليارد دوللارعا جەتتى. ءبىز مۇنىمەن شەكتەلىپ قالمايمىز. ەلەكتروندى كوممەرتسيا سالاسىنداعى ارىپتەستىكتى ودان ءارى دامىتامىز. سوندا ەكىجاقتى ساۋدا اينالىمىن جاقىن ارادا 40 ميلليارد دوللارعا جەتكىزۋگە مۇمكىندىك تۋادى. «تسيفرلى جىبەك جولى» باستاماسى وسى مىندەتتى ورىنداۋعا جول اشادى, – دەدى مەملەكەت باسشىسى.
JD com (Jingdong Mall) – قىتايداعى تاۋارلار مەن قىزمەتتەر ساتۋعا ارنالعان ەڭ ءىرى ونلاين پلاتفورما. 1998 جىلى نەگىزى قالانعان ونلاين ريتەيل الاڭىنىڭ 400 ميلليوننان استام پايدالانۋشىسى بار. 2022 جىلى JD com 1 تريلليون يۋان تازا پايدا تاۋىپ, قىتايداعى ەلەكتروندى ساۋدا الاڭدارىنىڭ اراسىندا ءبىرىنشى ورىنعا شىققان. قازىرگى كەزدە پلاتفورمادا 40-تان اسا ەلدىڭ ۇلتتىق پاۆيلوندارى جۇمىس ىستەيدى. قازاقستاننىڭ ۇلتتىق پاۆيلونىن اشۋ جونىندە كەلىسىمگە بيىل ناۋرىز ايىندا قول قويىلدى. بۇگىندە ۇلتتىق پاۆيلونىمىزدا ەلىمىزدىڭ بىرنەشە ءونىم ءتۇرى ساتىلىمعا قويىلعان. بۇعان قوسا الداعى ۋاقىتتا ەكسپورتتىق الەۋەتى جوعارى 15 وتاندىق ازىق-ت ۇلىك ءوندىرۋشىسىنىڭ ونىمدەرىن (كۇنباعىس مايى, كونديتەر ونىمدەرى, سۋسىندار) قىتاي نارىعىنا شىعارۋ جوسپارلانىپ وتىر.