شىعىس وڭىرىندە سوڭعى كۇندەرى اۋا رايى قۇبىلىپ تۇر. وسىدان ءۇش كۇن بۇرىن سوققان داۋىل ءبىراز اعاشتاردى سىندىرىپ كەتكەن ەدى. ءتىپتى, توتەنشە جاعداي قىزمەتكەرلەرى قاتتى جەلدەن قۇلاعان اعاشتاردىڭ ۇيلەردىڭ شاتىرى مەن كوشەدەگى كولىكتەرگە دە زاقىم كەلتىرگەنىن حابارلاعان بولاتىن.
ەندى مىنە, تىمىرسىقتىڭ بەتىن قايتارايىن دەدى مە, ءتۇس الەتىنەن بەرى تۇكسيىپ تۇرعان قاراكولەڭكە بۇلتتىڭ سوڭىنان, ساعات 15.10-دا ساتىرلاتىپ بۇرشاق جاۋىپ قويا بەرگەنى. جانە قانداي بۇرشاق دەيسىز عوي؟.. بارماق باسىنداي! بار-جوعى ەكى مينۋت ىشىندە جەر تابانى اپپاق, ءمولدىر, بادانا بۇرشاقتارعا كومكەرىلىپ قالدى. 25-30 گرادۋس جىلىلىقتى كورسەتىپ تۇرعان وسكەمەننىڭ كوشەسىنە مۇنداي بۇرشاق جاۋسا, دالا توسىنە جۇدىرىقتاي بولىپ تۇسكەن شىعار دەيدى ىشكى ويىمىز.
بۇرشاقتان سوڭ شايداي اشىلعان كۇن جارىقتىق الگىندە عانا كۇللى قالا تۇرعىندارىن كوشەگە شىعارىپ قىزىقتاتقان ءمولدىر مونشاقتارىن جيناپ العانداي... بادانا بۇرشاقتار 10 مينۋتتىڭ ىشىندە ەرىپ كەتتى. جازدىڭ تۋرا ورتا شەنىندە, 15 شىلدەدە مۇز قۇرساۋلى جاۋىن تۇسەدى دەپ كىم ويلاعان. تابيعاتتىڭ توسىن مىنەزى دەگەن وسى!
دۋمان اناش,
«ەگەمەن قازاقستان».
وسكەمەن.