الىستاعان سايىن بيىكتەيتىن ادامدار بار. ەل تاۋەلسىزدىگىنىڭ قالىپتاسۋى كەزەڭىندە كوسەمدىك, كەمەڭگەرلىك بولمىسىن تانىتقان ۇلت پەرزەنتىنىڭ ءبىرى – جازۋشى, قازاقستاننىڭ ەڭبەك ەرى ءابىش كەكىلباي ۇلى. قالامگەرلىك پەن قايراتكەرلىك, مەملەكەتشىلدىك پەن وتانشىلدىق قاسيەتىمەن بيىكتەگەن تاۋداي تۇلعانىڭ ەسىمى ۇلت تاريحىنا دا, ەل-جۇرت جادىنا دا ۇمىتىلماستاي ساقتالعان.
ەل, ۇلت تاريحى جونىندە اقتارىلا سويلەگەندەگى شەشەندىگى مەن سۋرەتكەرلىك شەبەرلىگى بىتە قابىسىپ, قازاق رۋحانياتىنا مول مۇرا قالدىرعان قالامگەردىڭ ەسىمى اتىراۋ قالاسىنداعى №41 مەكتەپ-گيمنازياعا بەرىلدى. وسىعان وراي مۇنايلى شاھاردىڭ «سامال» شاعىن اۋدانىندا ورنالاسقان مەكتەپتە ارنايى ءىس-شارا ءوتتى. وعان ۇستازدار مەن وقۋشىلار, قالا اكىمدىگىنىڭ, ءبىلىم مەن مادەنيەت سالاسىنىڭ قىزمەتكەرلەرى, ءتىل جاناشىرلارى مەن اتا-انالار قاتىستى. قازىر ءبىلىم ورداسىندا 800-دەن اسا وقۋشى ءبىلىم الادى. الداعى وقۋ جىلىندا مۇندا ء«ابىشتانۋ وقۋلارى» باعىتىمەن قوسىمشا ساباق جۇرگىزۋ جوسپارلانىپ وتىر.
– ءابىش كەكىلباي ۇلى – قازاقتىڭ رۋحىن كوتەرگەن, ماقتانىشى بولعان قالامگەر. قالامگەرلىكپەن شەكتەلمەي, ساياسي ىستە دە كەڭ جۇرەگىمەن, دارقان مىنەزىمەن ءسوزدىڭ قادىرىن, قاسيەتىن تانىتتى. ساياسي قايراتكەر رەتىندە ەل تاۋەلسىزدىگىن نىعايتۋدىڭ, مەملەكەتتىلىكتى قالىپتاستىرۋدىڭ, حالىقتى بىرلىككە ۇيىتۋ مەن ۇلتقا ادال قىزمەت ەتۋدىڭ ۇلگىسىن كورسەتتى. ءبىلىم ورداسىنىڭ وقۋشىلارى ۇلت زيالىسىنىڭ ادامي قاسيەتىن بويىنا ءسىڭىرىپ, قوعامنىڭ بەلسەندى ازاماتى بولارىنا سەنەمىن, – دەدى اتىراۋ قالاسى اكىمىنىڭ ورىنباسارى نۇرجان ەرمۇحانوۆ.
اتىراۋ وبلىسى