استاناداعى ساكەن سەيفۋللين مۋزەيىندە داۋىلپاز اقىننىڭ 1933 جىلى قازاق پەداگوگيكالىق ينستيتۋتىن تامامداعانى تۋرالى كۋالىگى ساقتالعان. كۋالىك بلانكىسى ورىس تىلىندە جازىلعان. سول جاعىندا كورنەكتى قايراتكەردىڭ 6 ح 4,5 سۋرەتى مەن كۋالىكتىڭ سوڭىندا ينستيتۋت ديرەكتورىنىڭ, ءتىل جانە ادەبيەت ءبولىمى مەڭگەرۋشىسىنىڭ جانە سەكرەتاردىڭ قولى قويىلىپ, ءمورى باسىلعان.
ساكەن سەيفۋللين 1925 جىلدان 1937 جىلعا دەيiن شىعارماشىلىقپەن اينالىسا ءجۇرىپ, بىرقاتار جوعارى وقۋ ورىنىندا وقىتۋشى بولىپ ىستەگەن. ماسەلەن,1925-1928 جىلدارى قىزىلورداداعى حالىق اعارتۋ ينستيتۋتىندا, ودان كەيىن تاشكەنتتەگى قازاق پەداگوگيكا ينستيتۋتىندا, ال 1930-1937 جىلدارى الماتىعا كوشىپ كەلگەن (1928) وسى ينستيتۋتتىڭ جالعاسى اباي اتىنداعى پەداگوگيكا ينستيتۋتىندا قازاق ادەبيەتى تاريحىنان ساباق بەرگەن. بۇل كەزدە قازاق ادەبيەتى تاريحى ءالى تولىق زەرتتەلمەگەن ەدى. ادەبيەت نۇسقالارى دا تولىق جينالماعان. ەڭ اقىرى قازاق ادەبيەتى تاريحىن وقىتۋ باعدارلاماسى دا بولمادى. سوعان بايلانىستى وتىزىنشى جىلداردىڭ باس كەزىندە ساكەن سەيفۋللين, مۇحتار اۋەزوۆ, ءسابيت مۇقانوۆ, مولداعالي جولدىباەۆ جانە تاعى باسقا بەلگىلى تۇلعالار قازاق ادەبيەتى تاريحى وقۋلىعىن جازۋعا كىرiستى.