ەلوردادا العاش رەت ءاليحان ماقسۇت اتىنداعى «RoboZerde-2023» ءى قالالىق روبوتتەحنيكا فەستيۆالى ءوتتى. وقۋشىلار روبوتتەحنيكانىڭ «روبوسپورت» جانە «شىعارماشىلىق جوبا» باعىتتارى بويىنشا سىنعا ءتۇستى.
فەستيۆالدىڭ ماقساتى – ومىردەن ەرتە وزعان دارىندى وقۋشى, فيزيكا, روبوتتەحنيكا سالالارى بويىنشا رەسپۋبليكالىق, حالىقارالىق پاندىك وليمپيادالار مەن عىلىمي جوبالاردىڭ بىرنەشە دۇركىن جەڭىمپازى ءاليحان سەرىكزات ۇلى ماقسۇتتىڭ عيبراتتى عۇمىرىن مەكتەپ وقۋشىلارىنا ۇلگى ەتە وتىرىپ, ەلىمىزگە قاجەتتى بولاشاق تەحنيك مامانداردى دايارلاۋعا قولداۋ كورسەتۋ, سونداي-اق وقۋشىلار جاساعان يننوۆاتسيالىق جوبالار مەن ونەرتابىستاردى حالىققا كەڭىنەن ناسيحاتتاۋ.
ءىس-شارانى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى, «استانا دارىنى» دارىندى بالالار مەن تالانتتى جاستاردى انىقتاۋ ورتالىعى, №9 «زەردە» مامانداندىرىلعان مەكتەبى, «روبوتەك» روبوتتەحنيكا مەكتەبى جانە ءاليحان ماقسۇت اتىنداعى دارىندى بالالاردى قولداۋ قورى بىرلەسىپ ۇيىمداستىردى. قوردىڭ باسشىسى – ءاليحان ماقسۇتتىڭ اكەسى, بەلگىلى اقىن سەرىكزات دۇيسەنعازى اتاپ وتكەندەي, فەستيۆال جىل سايىن مامىر ايىندا ءداستۇرلى تۇردە ۇيىمداستىرىلادى. دارىندى وقۋشىلاردىڭ عىلىمي داعدىسىن شىڭداۋ ءۇشىن فەستۆالدى كەلەشەكتە رەسپۋبليكالىق, حالىقارالىق دەڭگەيگە كوتەرۋ جوسپارلانىپ وتىر.
فەستيۆالدىڭ اشىلۋ راسىمىنە قاتىسقان «Amanat» پارتياسىنىڭ اتقارۋشى حاتشىسى, ءماجىلىس دەپۋتاتى ەلنۇر بەيسەنباەۆ سول كوشتى باستايتىن ەلدەردىڭ قاتارىندا بولۋ ءۇشىن عىلىم مەن تەحنولوگياعا دەن قويۋ كەرەكتىگىن العا تارتتى. «عىلىم دامىسا, ەلىمىز دە داميدى. سوندا جاستار اراسىنان الەم مويىنداعان عالىمدار سۋىرىلىپ العا شىعادى. وسى ورايدا مۇنداي فەستيۆالداردىڭ الاتىن ورنى ەرەكشە ەكەنىن اتاپ ءوتۋ كەرەك», دەدى ول.
س.دۇيسەنعازى عىلىممەن اينالىسىپ جۇرگەن جاستاردى ناسيحاتتاۋ, ولارعا قولداۋ كورسەتۋ قاجەت ەكەنىن اتاپ ءوتتى. «ەلىمىزدە عىلىم, تەحنيكا, ينجەنەريا سالاسىندا جاس تا بولسا جاڭالىق اشىپ, قابىلەت-قارىمىن تانىتىپ جۇرگەن جەتكىنشەكتەر از ەمەس. ءتىپتى شەتەلدە ءبىلىم الىپ كەلىپ, عىلىمعا جانى قۇشتار شاكىرت تاربيەلەپ جۇرگەن دارىندى ازاماتتار بار ارامىزدا. وكىنىشتىسى سول, ەل ەرتەڭىنە ەلەڭدەگەن ۇستازداردى, ولار باپتاپ وتىرعان وقۋشىلاردى ىزدەپ بارىپ, ءىسىن ەلگە تانىتىپ جاتقان ەشكىم جوق. ەلىمىزدىڭ بولاشاعى – تەحنولوگيادا. جاس عالىمدارىمىزعا قولداۋ كورسەتىپ, شابىتىنا شابىت قوساتىن, قيالىنا قانات بىتىرەتىن – سىزدەر مەن بىزدەر», دەدى ول.
جيىنعا پارلامەنت ءماجىلىسى الەۋمەتتىك-مادەني دامۋ كوميتەتىنىڭ توراعاسى, ەكس-مينيستر ا.ق.ايماعامبەتوۆ باستاعان ءبىر توپ دەپۋتات قاتىسىپ, ءسوز سويلەدى.
فەستيۆال بارىسىندا بەلگىلى كينورەجيسسەر مۇرات ەسجان تۇسىرگەن ء«اليحاننىڭ ارمانى» اتتى دەرەكتى فيلم كورسەتىلدى.
ال جۇزدەن جۇيرىك شىققان وقۋشىلارعا قوماقتى قارجىلاي سىيلىقتار تابىس ەتىلدى.