گازا سەكتورىنداعى العاشقى وپەراتسيا
ءيزرايلدىڭ اسكەري-تەڭىز كۇشتەرىنىڭ ارنايى باعىتتاعى توبى گازا سەكتورىنداعى العاشقى جەر وپەراتسياسىن جۇزەگە اسىردى. سولداتتار حاماس جاساقتارىمەن اتىس جۇرگىزدى. قاقتىعىس كەزىندە ءتورت يزرايلدىك اسكەري جاراقات الدى.
وسىنىڭ الدىندا يزرايل ۇكىمەتى حاماس-قا قارسى وپەراتسيا وتكىزۋ شەڭبەرىندە قوسىمشا رەزەرۆيستەر شاقىرۋعا رۇقسات بەرگەن بولاتىن. بۇل اسكەريلەرگە زاپاستان 40 مىڭ ادام شاقىرۋعا مۇمكىندىك بەرەدى. يزرايل تاراپىنىڭ بۇل ارەكەتى گازا سەكتورىنان يزرايل اۋماعىن زىمىراننان اتقىلاۋعا جاۋاپ بولىپ تابىلادى.
داۋىستى قايتا ساناۋعا قارسى ەمەس
اۋعانستاندا پرەزيدەنتتىك سايلاۋدىڭ ەكىنشى تۋرىنان كەيىن قوس ۇمىتكەر – ەكس-قارجى ءمينيسترى اشراف عاني احمادزاي مەن بۇرىنعى سىرتقى ىستەر ءمينيسترى ابدۋللا ابدۋللا وزدەرىنىڭ جەڭىسكە جەتكەندەرىن قاتار مالىمدەگەن ەدى. بىراق ءبىر ەلدە ەكى پرەزيدەنتتىڭ بولمايتىنى بەلگىلى.
اۋعانستانعا اقش مەملەكەتتىك حاتشىسى دجون كەرري كەلىپ, ەكى ۇمىتكەرمەن دە كەلىسسوز جۇرگىزگەن ەدى. ءسويتىپ, داۋىس باستان-اياق قايتا سانالاتىن بولىپ شەشىلگەن-ءتىن. الايدا بۇل ۇدەرىس اپتالارعا سوزىلۋى ىقتيمال. وسىنىڭ سالدارىنان پرەزيدەنتتىڭ يناۋگۋراتسياسى 2 تامىزدان ايتارلىقتاي ءارى شەگەرىلۋى ىقتيمال.
سودىرلار 25 ايەلدى وققا بايلادى
يراك استاناسى باعداد قالاسىندا سودىرلار 25 ايەلدى اتىپ ولتىرسە, كەم دەگەندە 8-ءىن جارالاعان. قارۋلى جاساقتىڭ پىكىرىنشە, ايەلدەر مۇسىلماندىققا جات ءىس-ارەكەتتەرمەن اينالىسىپتى. پوليتسيا وقيعا بولعان اۋداندى قورشاۋعا العان.
ادام ولىمىنە بايلانىستى بىرنەشە ادام تۇتقىندالىپتى. ال بۇل قىلمىستى كىمنىڭ جاساعانى تۋرالى ناقتى ايتىلمايدى. الايدا 2013 جىلدىڭ مامىرىندا بولعان وسىنداي وقيعا كەزىندە 12 ادام قازا تاپقان ەدى. ايەلدەرگە شابۋىل باعدادتىڭ شيتتەر باسىم تۇراتىن بولىگىندە جاسالعانىن دا ايتا كەتكەن ءجون.
كۋبانى اقش-تىڭ قۇرساۋىنان بوساتادى
رەسەي پرەزيدەنتى ۆلاديمير پۋتين لاتىن امەريكاسىنا ساپارىن كۋبادان باستاعانى بەلگىلى. وندا ول وسى ەلمەن ىنتىماقتاستىق تۋرالى بىرقاتار كەلىسىمدەرگە قول قويدى. سونىمەن قاتار, ۆ.پۋتين اقش تاراپىنان زاڭسىز قۇرساۋدى ەڭسەرۋگە كومەكتەسۋگە ۋادە بەردى.
رەسەي پرەزيدەنتى بۇل ۋادەسىن كۋبا مينيسترلەر كەڭەسىنىڭ توراعاسى راۋل كاسترومەن كەزدەسۋىنىڭ قورىتىندىسى بويىنشا بەرگەنىن مالىمدەدى. قازىرگى كەزدە ۆاشينگتوننىڭ گاۆاناعا قاتىستى ساۋدا, ەكونوميكالىق جانە قارجى توسقاۋىلى جۇمىس ىستەيدى. كۋبا ءۇشىن ەڭ ماڭىزدىسى – رەسەي گاۆانانىڭ كەڭەس وداعىنان قالعان 3,5 ميلليارد دوللار قارىزىنىڭ 90 پايىزىنا كەشىرىم جاسادى.
قىتايدا قاي قىلمىسقا دا جازا اۋىر
قىتايدىڭ شىڭجاڭ-ۇيعىر اۆتونوميالى رايونىندا 32 ادام ينتەرنەتتە ەكسترەميستىك روليكتەر تاراتقانى ءۇشىن جازالاندى. ولاردىڭ ۇشەۋى ءومىر-باقي تۇرمەدە وتىرۋ جازاسىنا كەسىلسە, قالعاندارى 4 جىلدان 15 جىلعا دەيىن تۇرمەگە قامالاتىن بولدى.
تەرگەۋشىلەردىڭ پىكىرىنشە, ينتەرنەتتەگى ماتەريالدار يسلامشىل سودىرلاردى جاقىندا بولعان لاڭكەستىككە يتەرمەلەگەن. سول لاڭكەستىك ارەكەت سالدارىنان ونداعان ادام قازا تاپقان بولاتىن. قىتايدىڭ كۇش قۇرىلىمدارى قازىرگى كەزدە شىڭجاڭدا انتيتەررورلىق وپەراتسيالار جۇرگىزىپ جاتىر. ول 2015 جىلدىڭ ماۋسىمىنا دەيىن جالعاسپاق.
اقش پەكينمەن قاتىناس قۇرا ما؟
اقش پرەزيدەنتى باراك وباما قۇراما شتاتتار قىتايمەن قارىم-قاتىناستىڭ «جاڭا مودەلىن» قۇرۋعا دايىن ەكەنىن مالىمدەدى. ول پايدا بولعان كەز كەلگەن قايشىلىقتاردى كونسترۋكتيۆتى تۇرعىدان رەتتەۋ ۇدەرىستەرىنەن كورىنىس بەرمەك.
«قۇراما شتاتتار تۇراقتى, بەيبىت جانە ءوسىپ-وركەندەگەن قىتاي مەملەكەتىنىڭ قالىپتاسقانىن قالايدى», – دەدى ب.وباما. ونىڭ سوزىنە قاراعاندا, ەكى ەل اراسىنداعى قارىم-قاتىناس ىنتىماقتاستىققا باعىتتالعاندىعىمەن ەرەكشەلەنۋى ءتيىس. ۇستىمىزدەگى جىلدىڭ ساۋىرىندە اقش پرەزيدەنتى ازيا ەلدەرىنە تۋرنە جاساعانى بەلگىلى. سول جولى ول وداقتاستارىن «قىتاي قاتەرىنەن» قورعاۋعا دايىن ەكەنىنە سەندىرۋگە تىرىسقان ەدى.
قىسقا قايىرىپ ايتقاندا:
*سولتۇستىك كورەيا وتكەن جەكسەنبى كۇنى شاعىن قاشىقتىقتاعى ەكى زىمىراندى تەڭىزگە اتتى. وسىلايشا كحدر الداعى وڭتۇستىك كورەيا-اقش بىرلەسكەن جاتتىعۋلارىنا ءوزىنىڭ نارازىلىعىن بىلدىرگەن سىڭايلى.
گەرمانيا كانتسلەرى انگەلا مەركەل باق-تارداعى ءوزىنىڭ مەرزىمىنەن بۇرىن وتستاۆكاعا كەتەتىنى تۋرالى اقپاراتتى تەرىسكە شىعاردى. «مەرزىمىم بىتكەنشە جاقسى جۇمىس ىستەۋ تۋرالى تىلەگىم بار, قالعانىن كەيىن كورە جاتارمىز», – دەپ مالىمدەدى ول.
*گرۋزيا پرەمەر-ءمينيسترى يراكلي گاريباشۆيلي ىشكى ىستەر ءمينيسترى الەكساندر چيكايزدزە مەن ونىڭ ۆەدومستۆوسىن ەسىرتكىنىڭ ۇلكەن پارتياسىن تاركىلەۋىمەن قۇتتىقتادى. ازەربايجاننان تۇركياعا اپارىلا جاتقان كونتراباندانىڭ جالپى سالماعى 2,79 توننانى قۇرايدى.
*قىتايدىڭ حۋنان پروۆينتسياسىندا ميكرواۆتوبۋس جاردان قۇلاپ كەتىپ, 11 ادام قازا تاپتى. قازا تاپقانداردىڭ 8-ءى – بالالار باقشاسىنىڭ تاربيەلەنۋشىلەرى. ءسويتىپ, كولىكتەگى ادامداردىڭ ەشقايسىسى ءتىرى قالماعان. ۇلكەندەردىڭ 1-ءۋى جۇرگىزۋشى, 2-ءۋى – تاربيەشىلەر.
*كۋبان كازاكتارى اسكەرلەرىنىڭ كازاكتارى 2015 جىلى قىزىل الاڭدا وتەتىن ۇلى وتان سوعىسىنداعى جەڭىستىڭ 70 جىلدىعىنا ارنالعان پارادقا قاتىساتىن بولىپ وتىر. مۇنى رەسەي قورعانىس مينيسترلىگىندەگىلەر رەسمي تۇردە قۋاتتادى.
*قارۋلى ادامدار مالايزيانىڭ بورنەو ارالىنا شابۋىل جاسادى. شابۋىل كەزىندە ءبىر پوليتسەي ولتىرىلسە, ەكىنشىسى ۇرلاپ اكەتىلگەن. «فرانس-پرەسس» اگەنتتىگىنىڭ حابارلاۋىنشا, باقايشاعىنا دەيىن قارۋلانعان قارۋلى جاساق شامامەن كورشى ەل – فيليپپيننەن كەلگەندەر سىڭايلى.
ينتەرنەت ماتەريالدارى نەگىزىندە ازىرلەندى.