بيىل الاكولگە بارىپ دەمالامىز دەگەن ساياحاتشىلار ءۇشىن جولاۋشىلار تاسىمالى ۇيىمداستىرىلادى. بۇل تۋرالى ءوڭىر اكىمدىگىنىڭ ءباسپاسوز قىزمەتى حابارلايدى.
راسىندا اباي وبلىسىندا ءتۋريزمدى جانداندىرۋ جولىندا جاسالىنىپ جاتقان يگى قادامدار بارشىلىق. سولاردىڭ ءبىرى رەتىندە قورشاعان ورتانى قورعاۋ نىساندارى بويىنشا ءۇرجار اۋدانىنىڭ اۋماعىندا ورنالاسقان الاكول كولىنىڭ جاعالاۋىندا سۋ بۇرۋ كانالىن سالۋ جۇمىستارىنىڭ اتقارىلىپ جاتقاندىعىن ايتىپ وتۋگە بولادى. وسى ارقىلى قاجەتتى جەرلەردى قۇرعاتۋ جۇمىستارى جۇرگىزىلۋدە. بۇل تۋرالى كەڭەيتىلگەن كەڭەس بارىسىندا وبلىس اكىمىنىڭ ورىنباسارى ديميتري گاريكوۆ ءمالىم ەتتى.
كول جاعالاۋىن ەلەكترمەن جابدىقتاۋ ماسەلەسى قازىرگى تاڭدا وڭ شەشىمىن تاۋىپ جاتىر. ساراپتاما قورىتىندىسى الىندى. جوبالاردى ىسكە اسىرۋ جاعى قاراستىرىلىپ جاتىر.
سونداي-اق جازعى كەزەڭدە الاكولگە تۋريستىك باعىتتا جولاۋشىلار تاسىمالى ۇيىمداستىرىلاتىن بولادى. بۇعان دەيىن دە جۇمىس ىستەپ كەلگەن 4 اۆتوبۋس باعىتى قايتا جاندانادى. سونداي-اق «سەمەي-جالاڭاشكول» ستانساسى تەمىرجول مارشرۋتى بويىنشا قىزمەت كورسەتۋگە تەندەر وتكىزدى. ونىڭ جەڭىمپازى بولىپ «جولاۋشىلار تاسىمالى» اق بولىپ ايقىندالدى. بيىلعى ماۋسىمدا 5 ۆاگونمەن جابدىقتالعان پويىز قۇرامى قاجەتتى جيىلىكتە قاتىنايدى دەپ كۇتىلۋدە.