ەل-جۇرت «وتان قورعاۋشى» كۇنىن اتاپ ءوتىپ جاتقان تۇستا پەتروپاۆل قالاسىندا توتەنشە جاعداي بولدى. قالاداعى تۇرعىن ۇيلەردىڭ ماڭايىنان تۇتانعان قىزىل جالىن ونداعان تۇرعىندى عانا ەمەس, ءورت سوندىرۋشىلەردى دە ءبىرشاما ابىگەرگە سالدى. سوڭعى كۇندەرى قالادا اڭىزاق جەل كوتەرىلىپ, ءورت قاۋپى اناعۇرلىم ارتتى. اقىرىندا سول جەل قالانىڭ «بەرەكە» شاعىن اۋدانىنىڭ شەتىندەگى قاڭسىپ تۇرعان قالىڭ قامىسقا تۇسكەن وتتى از ۋاقىتتىڭ ىشىندە 9 ءۇيدىڭ استان-كەستەنىن شىعارعان الاپات ورتكە ۇلاستىردى.
دابىل ءورت ءسوندىرۋ قىزمەتىنە 18 ساعات 57 مينۋتتا تۇسكەن. ءورتتىڭ نەگىزگى وشاعى «سەننايا بازا» كوشەسىندەگى بەسىنشى ءۇيدىڭ قاسىندا بولعان. كەزىندە, پەتروپاۆلدىڭ ەت كومبيناتىنا اكەلىنەتىن مىڭداعان مال بىرنەشە كۇن تۇرىپ قالعاندا قازىر ۇيلەر سالىنىپ, كوشەلەر پايدا بولعان وسى جەردەگى بازالارعا قامالىپ, ماڭايىنداعى ۇيىلگەن شوپپەن قورەكتەندىرەدى ەكەن. بازانىڭ ماڭى ساز بولاتىن. ول ەرتە كوكتەمدە بورجىپ, قيدىڭ ءيىسى بۇكىل قالانى الىپ كەتەتىن ەدى. قازىر ءبارى قۇپ-قۇرعاق, تەك تارتىلعان باتپاققا قالىڭ قامىس وسكەن بولماسا...
سەكۋندىنا 23 مەتر جىلدامدىقپەن سوققان سويقان جەل قامىس ءورتىن ماڭايدا اعاشتان سالىنعان جەكەمەنشىك ۇيلەرگە قاراي ويىستىرىپ, جالىن اۋماعى ۇلعايىپ كەتتى. ءتىلسىز جاۋ ءاپ-ساتتە جەتى تۇرعىن ءۇي مەن ادام تۇرمايتىن ەكى قۇرىلىستى, سونداي-اق «سەرۆيس ۆەكتور» جك گاراجىن شارپىپ, 540 شارشى مەترگە دەيىن جايىلعان. سونىمەن بىرگە ماڭىندا تۇرعان 3 اۆتوبۋستى دا ءورت شالدى. جەدەل جەتىپ, ءجىتى قيمىلداعان ءورت سوندىرۋشىلەر مەن ولارعا بولىسقان كەيبىر تۇرعىندار 40 ادامدى ورتتەن امان الىپ شىقتى. سونىڭ ىشىندە – 9-ى جاس بالا.
ءورتتى سوندىرۋگە وبلىستىق تجد ء«ورت ءسوندىرۋ قىزمەتى جانە اپاتتى-قۇتقارۋ جۇمىستارى» باسقارماسىنىڭ بارلىق قۇرامى جانە ولارعا قوسا وڭتۇستىك-ورال تەمىرجولىنىڭ اسكەريلەندىرىلگەن ءورتسوندىرۋ كومانداسى, «قىزىلجار سۋ» كاسىپورىنى, جەرگىلىكتى اتقارۋشى ورگانداردىڭ ءورت ءسوندىرۋ قىزمەتتەرى, دەنساۋلىق ساقتاۋ قىزمەتىنىڭ ادامدارى قاتىستى. پوليتسيا دەپارتامەنتى قۇرامىنان 137 ادام مەن 28 تەحنيكا ءورت سوندىرۋگە اتسالىستى. ورتتەن شوشىنعان تۇرعىندارعا پسيحولوگيالىق كومەك كورسەتۋ ءىس-شارالارى ۇيىمداستىرىلدى. وبلىس اكىمى ايداربەك ساپاروۆتىڭ ءوزى باستاعان جەدەل شتاب قۇرىلدى. ول زارداپ شەككەن ۇيلەردىڭ تۇرعىندارى 25 مەكتەپتەگى ەۆاكۋاتسيالىق پۋنكتكە ۋاقىتشا ورنالاسقانىن ايتتى. «تۇرعىندار تاماق جانە جاتىن ورىنمەن قامتاماسىز ەتىلدى. ورتتەن زارداپ شەككەندەرمەن كەزدەستىم. ارنايى كوميسسيا قۇرىلدى. تۇرعىندار ۋاقىتشا باسپانامەن قامتاماسىز ەتىلەدى», دەدى وبلىس اكىمى.
ءورت 21 ساعات 55 مينۋتتا تولىق ءسوندىرىلدى. ابىروي بولعاندا, ادام شىعىنى جوق, كۇيىك شالعاندار دا تىركەلمەدى. الايدا اياقاستى لاۋلاعان ءورت تۇرعىندارعا قۇرعاق جەل سوققان كۇنى وت تۇتاتۋدىڭ ءوزى وراسان قاتەر ەكەنىن ەستەن شىعارماۋ كەرەكتىگىن تاعى ءبىر مارتە ەسكەرتىپ وتكەندەي بولدى. «مامىر شىقتى» دەپ ماساتتانعان جۇرت ءتورت كۇندىك دەمالىستا تازا اۋانىڭ توسىندە وتكىزۋگە قۇمار. ونداي كەزدە جۇرتتىڭ ءبارى وت تۇتاتۋعا اۋەس. سوندىقتان ءاربىر توتەنشە جاعداي بىزگە ساباق بولىپ, بارىنشا ساق بولۋ كەرەكتىگىن ەستەن شىعارماۋعا ۇيرەتەدى.
پەتروپاۆل