كەشە قورعانىس ءمينيسترى سەرىك احمەتوۆ «باتىس» وڭىرلىك قولباسشىلىعىنىڭ اقتاۋ گارنيزونىندا جۇمىس ساپارىمەن بولدى. ساپار شەڭبەرىندە قورعانىس ءمينيسترى اۆياتسيالىق بازانىڭ جۋىردا عانا پايدالانۋعا بەرىلگەن جاڭا كەشەندى عيماراتىندا بولدى. عيماراتتىڭ جالپى اۋماعى 3 مىڭ شارشى مەتردى قۇرايدى.
مينيستر اسكەري گارنيزوننىڭ قازىرگى قىزمەتى جانە جاعدايىمەن, سونداي-اق, ونىڭ دامۋ پەرسپەكتيۆالارىمەن تانىستى.
اقتاۋ گارنيزونىنا ساپارى بارىسىندا س. احمەتوۆ تەڭىز جاياۋ اسكەرى قۇراماسىندا بولدى.
«تەڭىز جاياۋ اسكەرى قۇراماسى – قازاقستان قارۋلى كۇشتەرىندەگى بىردەن-ءبىر اسكەري بولىمشە. بۇگىندە بۇل جاۋىنگەرلىك ءبولىم باتىس ستراتەگيالىق باعىتتاعى تاپسىرمالاردى ورىندايدى, وبلىستىڭ قاۋىپسىزدىگىن قامتاماسىز ەتەدى. اتالعان قۇراما قارۋ-جاراق پەن اسكەري تەحنيكانىڭ بارلىق تۇرلەرىمەن جاراقتانعان جانە قويىلعان تاپسىرمالاردى ورىنداۋعا دايىن», دەدى «باتىس» وڭىرلىك قولباسشىلىعى اسكەرلەرىنىڭ قولباسشىسى, پولكوۆنيك مۇرات نۇعىمانوۆ.
س.احمەتوۆ اسكەري قىزمەتشىلەردىڭ جاۋىنگەرلىك دايارلىعىن ۇيىمداستىرۋ, قارۋ-جاراق پەن اسكەري تەحنيكانىڭ تەحنيكالىق الەۋەتى, مەملەكەتتىك قورعانىس تاپسىرىسى شەڭبەرىندە الىنعان جاڭا ۇلگىدەگى قارۋ-جاراق پەن اسكەري تەحنيكانى قابىلداۋ مەن ولاردى پايدالانۋ بويىنشا قولباسشىلىقتىڭ باياندامالارىن تىڭدادى.
ايماققا ساپارى بارىسىندا مينيستر جەكە قۇرامنىڭ الەۋمەتتىك جاعدايىنا, قورعانىس مينيسترلىگىنىڭ اسكەري قىزمەتشىلەر ءۇشىن تۇرعىن ءۇي قۇرىلىسىن جۇرگىزۋ جونىندەگى باعدارلاماسىنىڭ جۇزەگە اسىرىلۋى, تۇرمىس پەن قىزمەت جاعدايىن ودان ءارى جاقسارتۋ ماسەلەلەرىنە ايرىقشا كوڭىل ءبولدى. اقتاۋ گارنيزونىنداعى نىساندار مەن بولىمشەلەردى قاراۋ بارىسىندا مينيستر اسكەري-تەڭىز بازاسىنىڭ وقۋ ورتالىعىمەن, وقۋ-جاتتىعۋ ستانساسىمەن تانىستى.
«باتىس» وڭىرلىك قولباسشىلىعى 2003 جىلى قۇرىلعان. وڭىرلىك قولباسشىلىقتىڭ نەگىزگى تاپسىرمالارى مەملەكەتتىك شەكاراعا قول سۇعىلماۋشىلىقتى, اۋماقتىق تۇتاستىقتى, ەگەمەندىك پەن كاسپي تەڭىزىنىڭ قازاقستاندىق سەكتورىندا ەلىمىزدىڭ ەكونوميكالىق ءمۇددەلەرىن قورعاۋ بولىپ تابىلادى.
«ەگەمەن-اقپارات».