س.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىنىڭ ستۋدەنتى اعزام راسىلحان وقۋدان بوس ۋاقىتىندا اۋىلىنا كەلىپ, قۇلپىناي ەگۋدى قولعا الدى. «اۋليەاتا فەنيكس» قۇس فابريكاسىندا وندىرىستىك تاجىريبەدەن وتكەن جاس جىگىت جاڭا كاسىپتى جولعا قويۋعا بارىنشا نيەتتەنىپ وتىر.
اعزامنىڭ وتباسىنداعى ۇلكەندەر جاعى اۋىل شارۋاشىلىعىنا بەيىم جاندار ەكەن. كوكتەمگى دالا جۇمىستارىن ەڭسەرگەننەن كەيىن ۇلىمەن بىرگە شاعىن القاپقا قۇلپىناي ەگىپ, وتباسىلىق تابىستى ارتتىرۋعا بەل شەشىپ كىرىسپەك. ستۋدەنتتىڭ ايتۋىنشا, ءبىرىنشى جىلى وتباسى مۇشەلەرىمەن بىرگە 30 سوتتىق القاپتى يگەرۋگە دەن قويماق.
«شىنتۋايتىنا كەلگەندە, ءبىزدىڭ ءۇيدىڭ ادامدارى مال جانە ەگىن شارۋاشىلىعىنا بۇرىننان بەيىمدەلگەن. بيىلدان باستاپ, قۇلپىناي ەگۋگە قۇلشىنىپ وتىرعان جايىمىز بار. تۋراسىن ايتسام, جۇرت تابىس كوزىنە تەلىپ جۇرگەن بۇل كاسىپ ءبىزدىڭ وتباسى ءۇشىن بەيتانىس الەم ەكەنى راس. ايتكەنمەن, اتا-انام مەن باۋىرلارىمنىڭ وسى ءبىر قادامىما شىنايى قولداۋ ءبىلدىرىپ وتىرعانى قۋانتادى.
قۇلپىناي ەگۋدىڭ ماشاقاتى كوپ ەكەنىن جاقسى بىلەمىن. بىرىنشىدەن, جەردىڭ قۇنارلىلىعى باستى رولگە يە بولسا, ەكىنشىدەن, دايىن القاپقا تىڭايتقىش سەبۋ كەرەك. ونسىز ءىس ونبەيدى. سونداي-اق ارىق-اتىزدى تازارتۋ جۇمىستارىنا دەن قويعان ءلازىم. وسى ۇدەرىستىڭ ءبارى ساتىمەن ىسكە اسقاندا عانا ويداعىداي ءونىم الۋعا بولادى. ال بۇل جۇمىستار تاباندى ەڭبەكتى قاجەت ەتەدى», دەيدى ا.راسىلحان.
ونىڭ ايتۋىنشا, اۋەلدە قۇلپىناي ءوسىرۋدىڭ قىر-سىرىن كورشىلەس تۇركىستان وبلىسىنا قاراستى قازىعۇرت اۋدانىنداعى دوستارىنان ەستىپ, قىزىعۋشىلىعى ويانعان ەكەن. كەيىننەن داقىلدىڭ قالاي باپتالاتىنىن ءوز كوزىمەن كورۋ ءۇشىن قازىعۇرتقا ارنايى بارىپتى دا. قازعۇرتتىق دوستارىنىڭ ىسكەرلىگىنە ءتانتى بولعان ول ءوزى دە قۇلپىناي ءوسىرۋدىڭ جولدارىن جان-جاقتى قاراستىرعان.
«قازىعۇرت جاقتا قۇلپىنايدى مولىنان ءوسىرىپ, ىشكى نارىقتى تازا ونىممەن قامتاماسىز ەتىپ وتىرعان ازاماتتاردىڭ قاراسى قالىڭ ەكەنىنە كوزىم جەتتى. ولار جىلىنا 1 گەكتار جەردەن 15-20 تونناعا دەيىن ءونىم الادى. تۇسىنگەن ادام ءۇشىن بۇل دەگەنىڭىز – اجەپتەۋىر تابىستىڭ كوزى عوي. الداعى كۇندەرى قۇلپىناي كوشەتتەرىن اۋىلىمىزعا الىپ كەلىپ, القاپقا ورنالاستىراتىن بولامىز. ودان كەيىن اتالعان داقىلدى باپتاۋ جۇمىستارىن قولعا الۋعا نيەتتىمىز.
جاڭا ءىستى قولعا العان جاستىڭ سوزىنە سەنسەك, ول 30 سوتتىق القاپقا قۇلپىنايدىڭ «البا», «البيون», «كلەري» دەپ اتالاتىن تۇقىمدارىنان الىنعان كوشەتتەردى وتىرعىزباق. قاجەتتى 20 مىڭ كوشەتتى كورشى وڭىردەن اكەلۋدى جوسپارلاپ وتىر.
اقيقاتىن ايتسام, قانداي دا ءبىر جۇمىستى باستار كەزدە, ونىڭ مەحناتى از ەمەس ەكەنىن سەزىنەمىن. وسى جىلى ەككەن قۇلپىناي جاقسى ءونىم بەرسە, الداعى ۋاقىتتا القاپ كولەمىن ۇلعايتۋ جوسپارىمدا بار. ارنايى قوندىرعىلارى بار جاڭا تەحنولوگيانى قولدانۋ ارقىلى ءونىم كولەمىن ارتتىرۋ ماسەلەسىن دە قاپەردەن شىعارمايمىز. ويتكەنى قازىر بارلىق دۇنيەنىڭ كوركەيۋى جاڭا تەحنولگيانى ءتيىمدى پايدالانۋعا بايلانىستى بولىپ تۇر. ال سۋ ماسەلەسىنە كەلسەك, ەشقانداي قيىندىق جوق. اعىن سۋ القاپتىڭ باسىنا جەتىپ تۇر», دەيدى ول.
اعزام جاڭا تەحنولوگيانىڭ ءونىم كولەمىن ارتتىراتىنىنا بەك سەنىمدى. سول ءۇشىن دە باقشا داقىلىن تامشىلاتىپ سۋارۋ تەحنولوگياسى ارقىلى باپتاۋعا نيەتتى. قازىرگى تاڭدا جۇمساق پلاستيكتەن جاسالعان سۋ قۇبىرىن, قۇلپىناي كوشەتىن ورنالاستىراتىن توپىراققا قاجەتتى ارنايى قارا كلەەنكانى دايىنداپ قويعان.
جاستايىنان ەڭبەك دالاسىندا شىنىققان اعزام بۇگىندە قۇلپىناي ءوسىرۋ ءىسىن قولعا الۋعا قۇلشىنىپ وتىرسا, ىلگەرىدە جۇيرىك باپتاپ, كوكپار تارتىپتى. ارينە, اتتىڭ جالىندا وسكەن جۋالىلىق جىگىتتەر ءۇشىن بۇل تاڭسىق ەمەس. كەيىننەن قۇس شارۋاشىلىعىنا دەن قويىپتى. ونىڭ قوراسىندا تاۋىقتىڭ «براما», «امروكس», «ادلەر» جانە تاعى باسقا ءتۇرى بار. ول تاۋىق ءوسىرۋدى ءوزىنىڭ ءحوببيى سانايدى. ءار تۇقىم ءار قورادا بولەك تۇر. انالىق تاۋىقتان جينالعان جۇمىرتقانى دا جان-جاققا جىبەرىپ, وتكىزىپ وتىر. جاس كاسىپكەر تاۋىق اسىراۋمەن قاتار, ينكۋباتوردان بالاپان شىعارۋ ىسىنە دە ايرىقشا دەن قويعان.
«تۋراسىن ايتساق, اركىم وزىنە ۇناعان ىسپەن اينالىسقاننان ۇتىلمايتىنى داۋسىز. مەن دە ءوز قالاۋىما ساي ەڭبەك ەتىپ, جۇمىسىمنىڭ راحاتىن كورىپ جۇرگەن جانمىن. ۇيدەگى باۋىرلارىممەن بىرگە قىزمەت ەتىپ جۇرگەنىمىزگە قاتتى قۋانامىز. دالا جۇمىسى ادامدى شيراتا تۇسەتىنى ءسوزسىز. سونى قاپەردەن شىعارماعان ءجون. ال قانداي دا ءبىر جاڭا كاسىپپەن قوسىمشا اينالىسۋ دەگەنىڭىز – وتباسىنىڭ تابىسىن ۇستەمەلەيتىنى داۋسىز. قىسقاسى, وزىمە قولعا العان كاسىبىم ۇنايدى. بار ىنتا-جىگەرىممەن ەڭبەكتەنگەندىكتەن بولار, جۇمىستان جانىم جاي تابادى.
قۇلپىنايدىڭ ءجونى بولەك قوي. ال تاۋىق تۇرلەرىن اسىراۋ دا مەحناتى كوپ شارۋا ەكەنى راس. دەر كەزىندە جەمىن بەرۋ, ءدارىسىن ۋاقتىلى ەگۋ, ۆيتامينمەن قامتاماسىز ەتۋ دە وڭاي ەمەس. اسىرەسە, جۇمىرتقانى جارىپ شىققان ساپ-سارى بالاپاندار قامقورلىقتى كوپ قاجەت ەتەدى. وعان ءوز بالاڭا قاراعانداي قاراۋىڭ كەرەك», دەيدى ا.راسىلحان.
ءناسىبىن كاسىبىنەن ىزدەگەن جاس جىگىت جۇمىرتقا ارقىلى بالاپان باسىپ شىعاراتىن ينكۋباتوردى قوماقتى قارجىعا ساتىپ الىپتى. سوزىنە سەنسەك, قوندىرعى ارقىلى ءبىر دەمدە 1 056 باس بالاپانعا دەيىن باسىپ شىعارۋعا بولادى ەكەن.
بالا كۇنىنەن ەڭبەككە ارالاسقان اعزام شارشاۋ دەگەندى بىلمەيدى. ول دالا جۇمىسى ادامدى شارشاتپايتىنىنا, قايتا شيرىقتىرا تۇسەتىنىنە بەك سەنىمدى. قۇلپىناي ءوسىرۋدى قۇنتتاعان ازاماتتىڭ بۇدان باسقا دا جوبا-جوسپارى مەن ارمان-ماقساتتارى بارشىلىق. الايدا اعزام الدىمەن قۇلپىناي ءوسىرۋ ءىسىن مىقتاپ جولعا قويعىسى كەلەدى.
جامبىل وبلىسى,
جۋالى اۋدانى,
بايتەرەك اۋىلى