ۇلتتىق مۋزەيدە بەلگىلى زەرتتەۋشى, ەتنوگراف, سۋرەتشى, تاريح عىلىمدارىنىڭ كانديداتى قاليوللا احمەتجاننىڭ «قازاق باتىرلارىنىڭ قارۋ-جاراعى» اتتى كورمەسى ءوتىپ جاتىر.
ايتۋلى قىلقالام شەبەرى جەكە شىعارماشىلىعىمەن بىرگە, 40 جىلدان بەرى قازاقتىڭ ءداستۇرلى قارۋ-جاراعىن زەرتتەپ, ونى عىلىمي اينالىمعا ەنگىزۋگە قوماقتى ۇلەس قوستى. بۇل تاقىرىپتا عالىمنىڭ التى مونوگرافياسى مەن 120-دان اسا ماقالاسى جارىق كورگەن.
كورمەگە شەبەردىڭ قولىنان شىققان قازاق جاۋىنگەرلەرىنىڭ شابۋىل قارۋلارىنىڭ جانە قورعانىس جاراقتارىنىڭ تۇرلەرى مەن تيپتەرىنىڭ رەكونسترۋكتسيالارى قويىلدى. ونىڭ اراسىندا سۋىق قارۋلار مەن جابدىقتارى, جاۋىنگەرلەردىڭ باس كيىمدەرى مەن ساۋىت-سايماندار بار. اسىرەسە قاليوللا اعامىز حالقىمىزدىڭ داڭقتى باتىرلارى ۇستاعان بىرقاتار قۇندى جادىگەردى قالپىنا كەلتىردى. ولاردىڭ كەيبىرى باتىرلاردىڭ ۇرپاقتارى مەن مۋزەيلەردە ساقتالعان. كورمەگە سولاردىڭ كوشىرمەلەرى دە ۇسىنىلدى. سونىڭ ىشىندە اتاقتى اسكەري قولباسشى, قانجىعالى بوگەنباي باتىردىڭ دۋلىعاسى, ەرجۇرەك قولباسشى, ءباھادۇر قابانباي بابامىزدىڭ شارايناسى, ارىستان سۇلتاننىڭ قالقانى, نايزاسى جانە شارايناسى, جانقوجا باتىردىڭ سەلەبەسى مەن تاعى باسقا دۇنيەلەر كەلگەن قوناقتاردىڭ قىزىعۋشىلىعىن تۋعىزدى.
ءىس-شارانىڭ اشىلۋىندا مادەنيەت جانە سپورت مينيسترلىگى مادەنيەت كوميتەتى توراعاسىنىڭ ورىنباسارى دانيار اليەۆ تالانتتى تۇلعانىڭ شىعارماشىلىعىنا جوعارى باعا بەرە كەلىپ: «بۇل كورمە – قازاقتىڭ تاريحىمەن, جانىمەن بىتە قايناسىپ, باتىر بابالارىمىزدىڭ باي رۋحاني كەڭىستىگى مەن دالا تاريحىن اسپەتتەيتىن ورىن دەپ بىلەمىن» دەپ, اۆتورعا تىلەكتەستىگىن ءبىلدىردى. سونداي-اق تاريح عىلىمدارىنىڭ دوكتورى زەينوللا ساماشەۆ تە كورمە يەسىنىڭ شىعارماشىلىعى مەن جۇمىستارى تۋرالى وي قوزعاپ, جىلى لەبىزىن ءبىلدىردى.
ق.احمەتجان بۇگىنگە دەيىن ءار داۋىردەگى كوشپەلى جاۋىنگەرلەر قارۋ-جاراقتارىنىڭ كوپتەگەن عىلىمي-گرافيكالىق رەكونسترۋكتسياسىن جاسادى. وسى ەڭبەگى ەلىمىزدەگى جانە شەتەلدەگى عىلىمي ورتانىڭ جوعارى باعاسىنا يە بولدى.
«وسى سالانى زەرتتەپ جۇرگەنىمە 45 جىلدان استى. ەڭ الدىمەن, عىلىمي ماقالالار جازدىم, مۋزەيلەردە, كىتاپحانالاردا وتىرىپ, جازبا دەرەكتەردى اقتاردىم. حالقىمىزدىڭ اۋىز ادەبيەتى مەن بەينەلەۋ ەسكەرتكىشتەرىن زەرتتەدىم. سونىڭ نەگىزىندە كىتابىم جازىلىپ, جارىق كوردى. سودان كەيىن قارۋلاردى بوياۋمەن بەينەلەدىم. ويتكەنى وقىرمان كىتاپتى وقىعانىمەن, ونى تولىق تۇسىنبەۋى مۇمكىن. سونداي-اق وندا ۇمىتىلعان دۇنيەلەر دە كەزدەسەدى. سوندىقتان زاتتىق بەينە سول داۋىردە قولدانعان قارۋلاردى ءدال كورسەتەدى», دەدى اۆتور.
ايتا كەتەيىك, كورمە 12 ماۋسىمعا دەيىن جالعاسادى.