سەنات توراعاسى قاسىم-جومارت توقاەۆتىڭ الەمدىك ديپلوماتيا تۋرالى كىتابى جارىق كورەدى
كورنەكتى ديپلومات جانە ساياساتكەر, قازاقستان پارلامەنتى سەناتىنىڭ توراعاسى قاسىم-جومارت توقاەۆتىڭ «Reflections at the United Nations» جاڭا كىتابى شىلدەنىڭ اياعىندا جارىق كورەدى. ونى «بۇۇ-داعى تولعانىستار» دەپ اۋدارۋعا بولار ەدى. كىتاپقا ق.توقاەۆتىڭ 2011 جىلعى ءساۋىر مەن 2013 جىلعى قازان ارالىعىنداعى كەزەڭدە بۇۇ باس حاتشىسىنىڭ ورىنباسارى, بۇۇ جەنەۆا ءبولىمىنىڭ باس ديرەكتورى, بۇۇ باس حاتشىسىنىڭ جەكە ۋاكىلى جانە قارۋسىزدانۋ جونىندەگى كونفەرەنتسيانىڭ باس حاتشىسى بولعان كەزدەگى اعىلشىن, فرانتسۋز, ورىس جانە قىتاي تىلدەرىندە سويلەگەن سوزدەرى مەن مالىمدەمەلەرى ەندى. كىتاپتا ونىڭ سول كەزەڭدە جاريالانعان ماقالالارى دا بار.
ق.توقاەۆ – بۇۇ جەلىسى بويىنشا بارلىق شارالاردىڭ 70 پايىزىنا جۋىعى وتەتىن, جاھاندىق كونفەرەنتسيالىق ورتالىق بولىپ تابىلاتىن بۇۇ-نىڭ جەنەۆاداعى ءبولىمىن باسقارعان ازيانىڭ العاشقى وكىلى. ول ءوزىن ءتيىمدى باسقارۋشى رەتىندە كورسەتتى. بۇۇ باس حاتشىسى پان گي مۋن مەن حالىقارالىق ۇيىمداردىڭ باسشىلارى جەنەۆا ونىڭ كەزىندە حالىقارالىق ديپلوماتياداعى دۇنيەجۇزىلىك ورتالىق رەتىندە ءوزىنىڭ ءرولىن كۇشەيتە ءتۇستى دەپ سانايدى.
ق.توقاەۆتىڭ كولەمدى (800 بەتتەن استام) ەڭبەگى ديپلوماتتار, حالىقارالىق ۇيىمداردىڭ قىزمەتكەرلەرى مەن جاس ماماندارعا زور ىقىلاس تۋعىزادى.
«ەگەمەن-اقپارات».