بۇگىن شىمكەنتتە تەننيستەن جاسوسپىرىمدەر اراسىنداعى «Asia/Oceania Final Qualifying Juniors Davis Cup» جانە «Juniors Billie Jean King Cup» ىرىكتەۋ سايىستارىنىڭ جالاۋى جەلبىرەيدى. وعان 16 جاسقا دەيىنگى ازيا جانە تىنىق مۇحيت ايماعىنىڭ ۇزدىك تەننيسشىلەرى قاتىسادى. وسى ماڭىزدى تۋرنير الدىندا قازاقستان جاسوسپىرىمدەر قۇراماسىنىڭ كاپيتانى سەرگەي كۆاكپەن سويلەسىپ, شاكىرتتەرىنىڭ الداعى جارىسقا دايىندىعىن سۇراعان ەدىك.
– سەرگەي, «Juniors Davis Cup» ىرىكتەۋ سايىسىنا قازاقستان قۇراماسىنىڭ تەننيسشىلەرى قانداي دايىندىقپەن كەلدى؟
– قازاقستان جاسوسپىرىمدەر قۇراماسى وتكەن اپتانىڭ سوڭىندا شىمكەنتتە باس قوسىپ, جاتتىعۋ جيىنىن وتكىزدى. ءبارىنىڭ كوڭىل كۇيى جاقسى. ءوزىم جانە «Team Kazakhstan» اكادەمياسىنىڭ ديرەكتورى تيمۋر اققازيەۆ ولارمەن ۇنەمى بايلانىستامىز.
– وتكەن جىلى 14 جاسقا دەيىنگىلەر اراسىنداعى الەم چەمپيوناتىندا سول قۇرامانىڭ كاپيتانى بولدىڭىز. چەحياداعى دۇنيەجۇزىلىك دودادا قازاقستان تەننيسشىلەرى ءساتتى ونەر كورسەتىپ, تاريحتا العاش رەت ءتورتىنشى ورىنعا تابان تىرەگەن بولاتىن. 16 جاسقا دەيىنگىلەر اراسىنداعى قازاقستاننىڭ جاسوسپىرىمدەر قۇراماسى وسى جەتىستىكتى قايتالاي نەمەسە ودان اسىپ تۇسە الا ما؟
– الدىن الا بىردەڭە دەپ ايتۋ قيىن. ءبارىن جارىس كورسەتەدى. وتكەن جىلى قازاقستاننىڭ ءجاسوسپىرىم تەننيسشىلەرى اۋىز تولتىرىپ ايتارلىقتاي تولايىم تابىسقا قول جەتكىزدى. بيىل سول جەتىستىگىمىزدى قايتالاپ قانا قويماي, مۇمكىندىگىنشە جاقسارتقىمىز كەلەدى. بۇل – ءبارىمىز ءۇشىن باستى مەجە. ءبىزدىڭ كوماندا مىقتى, ناتيجەنى جاقسارتۋ ءۇشىن بارلىق مۇمكىندىك بار.
– ءيا, بيىلعى قۇرام بىلتىرعىدان وسال ەمەس سياقتى. زاڭعار نۇرلان ۇلى مەن ءامىر ومارحانوۆتان ۇلكەن ءۇمىت كۇتەمىز. قۇرامانىڭ ءۇشىنشى ويىنشىسى قاشان انىقتالادى؟
– بۇيىرسا, ەرتەڭ بەلگىلى بولادى. ءۇشىنشى ويىنشى رەتىندە دامير جالعاسباي, ارتەم سيدوروۆ, ەراسىل باقتياردىڭ ىشىنەن بىرەۋىن تاڭداپ الامىز.
– ءامىر مەن زاڭعاردىڭ بابى قانداي؟
– ءامىر ومارحانوۆ اقپاندا قاراعاندىدا وتكەن «ITF J60» دوداسىنىڭ جەڭىمپازى اتاندى. ناۋرىزدا گەرمانياداعى «J100» ءتۋرنيرىنىڭ شيرەك فينالىنا دەيىن جەتتى. ول جەكە باپكەرى پەتر نەستەروۆتىڭ ۇنەمى باقىلاۋىندا. ءامىردىڭ اياقالىسى جامان ەمەس, قازىرگى تاڭدا ءوز شەبەرلىگىن ارتتىرا تۇسەتىندەي مۇمكىندىگى بار.
زاڭعار نۇرلان ۇلى دا بيىل «ITF» جارىستارىندا ءساتتى ونەر كورسەتىپ ءجۇر. جىل باسىندا سلوۆاكيادا ۇيىمداستىرىلعان «J60» تۋرنيرىندە ۇزدىك شىقتى. سونىمەن قاتار اۋستريا, ماجارستان جانە سلوۆاكيا ەلدەرىندەگى بەدەلدى دودالاردا دا رەيتينگتىك ۇپايلارعا يە بولىپ كەلەدى.
– شىمكەنتتەگى جارىستىڭ شىمىلدىعىن قىزدار اراسىنداعى «Juniors Billie Jean King» ىرىكتەۋ سايىستارى ءتۇرىپ بەرمەك. وسى سىندا كورتقا شىعاتىن ياروسلاۆا شۆەدوۆانىڭ شاكىرتتەرىنە نە ايتاسىز؟
– ەڭ باستىسى, ارينە, جەڭىس تىلەيمىن. ولار وزدەرىنىڭ ۇزدىك ونەرىن كورسەتەدى دەپ سەنەمىن. ءبىز ءوز تاراپىمىزدان قولداۋعا دايىنبىز. العا, قازاقستان!
– اڭگىمەڭىزگە راحمەت. قازاقستان جاسوسپىرىمدەرىنە جەڭىس تىلەيمىز.
اڭگىمەلەسكەن
ءالي بيتورە,
«Egemen Qazaqstan»