قىرعىز رەسپۋبليكاسىنىڭ پرەزيدەنتى المازبەك اتامباەۆ «ازەربايجان رەسپۋبليكاسى ۇكىمەتى, قازاقستان رەسپۋبليكاسى ۇكىمەتى, قىرعىزستان رەسپۋبليكاسى ۇكىمەتى مەن تۇرىك رەسپۋبليكاسى ۇكىمەتى اراسىنداعى تۇركى اكادەمياسىن قۇرۋ تۋرالى كەلىسىمدى راتيفيكاتسيالاۋ تۋرالى» قىرعىز رەسپۋبليكاسىنىڭ زاڭىنا قول قويدى.
اتالعان زاڭدى قىرعىز رەسپۋبليكاسىنىڭ جوگوركۋ كەنەشى وسى جىلدىڭ ماۋسىم ايىنىڭ 25-ءى كۇنى ماقۇلداعان بولاتىن. زاڭ رەسمي جاريالانعان كۇننەن باستاپ كۇشىنە ەنەدى.
ەستەرىڭىزگە سالا كەتەيىك, ەلباسى نۇرسۇلتان نازارباەۆتىڭ باستاماسىمەن دۇنيەگە كەلگەن تۇركى اكادەمياسىنا قاتىستى اتالعان كەلىسىمگە 2012 جىلدىڭ 23 تامىزىندا بىشكەك قالاسىندا قول قويىلعان بولاتىن.
كەلىسىمدە «قۇرۋشى ءتورت مەملەكەتتىڭ ۇشەۋى قۇجاتقا قول قويىپ ماقۇلداسا, تۇركى اكادەمياسى ۇيىمى حالىقارالىق مارتەبە الادى» دەلىنگەن. بۇعان دەيىن اتالعان زاڭدى ازەربايجان مەن ءتۇركيا پارلامەنتتەرى ماقۇلداپ, پرەزيدەنتتەرى قول قويعان بولاتىن. وسىلايشا زاڭدى راتيفيكاتسيالاعان ەلدەردىڭ سانى ۇشكە جەتتى.
2010 جىلى استانادا اشىلىپ, قازاقستاننىڭ قولداۋىمەن جۇمىس ىستەپ كەلگەن تۇركى اكادەمياسى الداعى ءبىر ايدىڭ ىشىندە ءتۇگەل تۇركى حالقىنا ورتاق حالىقارالىق ۇيىم رەتىندە جۇمىسىن باستايدى, دەپ حابارلادى تۇركى اكادەمياسىنىڭ ءباسپاسوز قىزمەتى.