كەشە ءىى الماتى ستانساسىنان «سالاماتتى قازاقستان» پويىزى جولعا شىقتى. ەلىمىزدىڭ شالعاي اۋداندارىنىڭ تۇرعىندارىنا تەگىن مەديتسينالىق كومەك كورسەتۋدى ماقسات ەتكەن مەديتسينا ماماندارى 6 جەلتوقسانعا دەيىن 120-دان استام ستانساعا ايالدايدى. ايتا كەتەرلىگى, بيىل قاتارعا دارىگەرلەرمەن قوسا حالىققا تەگىن كەڭەس بەرەتىن مەدياتور مەن زاڭگەرلەر قوسىلدى. ەندى ەل ساۋلىعىنا الاڭداعان اق جەلەڭدىلەر جىل سوڭىنا دەيىن باس-اياعى 75 مىڭعا جۋىق اۋىل تۇرعىنىنا مەديتسينالىق كومەك كورسەتۋگە بەكىنىپ وتىر.
بۇل كۇنى ءىى الماتى ستانساسىنا دارىگەرلەر مەن تەمىرجولشىلار, سالا ارداگەرلەرى, ونەر قايراتكەرلەرىمەن قوسا ءبىر قاۋىم ەل جيىلدى.
مۇنداي ءىرى جوبانىڭ ۇيلەسىمدى ىسكە اسۋىنا ءبىردى-ەكىلى ەمەس, بىرنەشە مەكەمە, قورلار قولداۋ كورسەتىپ وتىر. تىزبەكتەسەك, بۇل قاتاردا «سامۇرىق-قازىنا» اق كومپانيالار توبىنىڭ اتىنان «Samruk-Kazyna Trust» الەۋمەتتىك جوبالاردى دامىتۋ قورى, قازاقستان پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەلەرى, دەنساۋلىق ساقتاۋ مينيسترلىگى, «قازاقستان تەمىر جولى» ۇك» اق جانىنداعى «الەۋمەتتىك جوبالار قورى» كورپوراتيۆتىك قورى بار بولسا, «Jibek Joly» تەلەارناسى جوبانىڭ اقپاراتتىق سەرىكتەسى اتانىپتى.
بىلسەڭىزدەر, شالعاي ستانسالارعا جاقىن ەلدى مەكەن تۇرعىندارىنا كومەك كورسەتەتىن «دەنساۋلىق» پويىزى – داستۇرگە اينالعان جوبا. يگى ىسكە جىل سايىن «سامۇرىق-قازىنا» اق قولداۋ كورسەتىپ كەلەدى. سونىڭ ناتيجەسىندە, بىلتىر «دەنساۋلىق» پويىزى 150-گە جۋىق ستانساعا ايالداپ, 80 649 ەمدىك-كەڭەس بەرگەن. ونىڭ ىشىندە 21 867-ءسى كامەلەتكە تولماعان بالا ەكەنىن ەسكە سالامىز. اشىپ ايتساق, بىلىكتى دارىگەرلەر 5 097 ادامعا شاعىن وتا جاساپ, 26 587 ادامعا ستوماتولوگيالىق كومەك كورسەتكەن. جوبا اياسىندا ۇزىن-سانى 389 388 ناۋقاس دارىگەرلەرگە قارالعان. پويىزدا دياگنوستيكالىق پروتسەدۋراعا ارالاساتىن مەديتسينالىق بريگادالارمەن قوسا, شاعىن امبۋلاتوريالىق وتالار جاسايتىن 35 مامان بار. ناقتىراق ايتساق, تەراپەۆت, حيرۋرگ, جالپى تاجىريبە دارىگەرى, نەۆروپاتولوگ, ۋلترادىبىستىق دياگنوستيكا دارىگەرى, اكۋشەر, زەرتحاناشى, مەيىربيكە, رەنتگەنولوگ, ساۋلەلىك دياگنوستيكا دارىگەرى, ءتىس دارىگەرى, وتولارينگولوگ, پسيحولوگ, وكۋليست, گينەكولوگ جانە ۋرولوگ بار. مەدپويىزدىڭ باعىتىن ناقتىلاعاندا مەديتسينالىق پۋنكتى جوق شالعاي ستانسالار باسشىلىققا الىنعان.
وسى كۇنى «مەديتسينالىق پويىزعا» اق جول تىلەۋگە كەلگەن «Samruk-Kazyna Trust» الەۋمەتتىك جوبالاردى دامىتۋ قورىنىڭ باس ديرەكتورى الفيا اديەۆا جوبانىڭ ماقساتى, مەديتسينالىق پويىزدىڭ الەۋەتى جايىندا ايتىپ بەرگەن ەدى.
– بۇگىن مەديتسينالىق كومەككە ءزارۋ شالعاي اۋىلداردىڭ حالقى ءۇشىن وتە ماڭىزدى كۇن. ويتكەنى ءبىز الىس اۋىلداردا اۋرۋحانالار بولمايتىنىن جانە تۇرعىنداردىڭ بارلىعى كەز كەلگەن ۋاقىتتا اۋدان ورتالىعىنا بارا المايتىنىنان حاباردارمىز. ال مەديتسينالىق پويىزدىڭ كومەگىمەن بالالارمەن قوسا ەرەسەكتەردىڭ ءاپ-ساتتە بىرنەشە دارىگەردەن كەڭەس الۋعا مۇمكىندىگى بار. پويىز ەڭ زاماناۋي دەگەن مەديتسينالىق قۇرال-جابدىقتارمەن قامتىلىپ, ءتىپتى شاعىن وتالار جاساۋ جاعى قاراستىرىلعان.
الەۋمەتتىك جوبالار قورىنىڭ باستى ماقساتى – «سامۇرىق-قازىنا» اق كومپانيالار توبى كاسىپورىندارى بار وڭىرلەرگە ەرەكشە نازار اۋدارا وتىرىپ, حالىقتىڭ الەۋمەتتىك-ەكونوميكالىق الەۋەتىن جاقسارتۋعا ارالاسۋ. وسى جىلى بىزدەگى 7 جوبانىڭ ىشىندە دەنساۋلىق ساقتاۋ باعىتىندا 590 ملن تەڭگە قارالعان «مەديتسينالىق پويىز» جوباسىنا ەرەكشە باسىمدىق بەرىلدى, دەدى ا.اديەۆا.
ساپار بارىسىندا مەديتسينالىق پويىز ستانسالاردا بىرەر كۇن ايالدايدى. دارىگەرلەر تۇرعىنداردى تەك جۇمىس ۋاقىتىندا قابىلدايدى. ايتا كەتۋ كەرەك, ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ باستاماسىمەن العاش رەت پويىز قۇرامىنا ازاماتتارعا پسيحولوگيالىق, قۇقىقتىق ءارى مەدياتيۆتىك (تاتۋلاستىرۋ) كومەك كورسەتەتىن كاسىبي جانە تاجىريبەلى مەدياتورلار مەن زاڭگەرلەر تارتىلعان. ول از دەسەڭىز, پويىزداعى ماماندار ازاماتتارعا مەملەكەتتىك-الەۋمەتتىك تولەمدەر بويىنشا, زەينەتاقى-جاردەماقى, الەۋمەتتىك تولەم جانە اتاۋلى الەۋمەتتىك كومەك الۋ ماسەلەلەرى تۋراسىندا تەگىن كەڭەس بەرەدى.
اقپارات ءۇشىن ايتار بولساق, «Samruk-Kazyna Trust» قورىنىڭ قايىرىمدىلىق بيۋدجەتى بىلتىر 10 ملرد تەڭگەگە جەتكەن. قامقورشىلار كەڭەسى وسى سومماعا 43 الەۋمەتتىك جوبانى ماقۇلداعان. ناتيجەسىندە 500 مىڭ ازاماتقا, ونىڭ ىشىندە 55 مىڭ بالاعا جانە اۋىلدا تۇراتىن 95 مىڭ وتانداسىمىزعا قولداۋ كورسەتىلىپتى.