اتىراۋ وبلىسىندا 300-گە جۋىق مەديتسينا قىزمەتكەرى جەتىسپەيدى. ونىڭ ىشىندە 183 دارىگەردىڭ ورنى بوس تۇر. بۇل ماسەلە كەيىنگى ءۇش جىلدان بەرى وقتىن-وقتىن قوزعالعانىمەن, ءالى تولىق شەشىمىن تاپپاي وتىر.
دەنساۋلىق ساقتاۋ ءمينيسترى اجار عينياتتىڭ ايتۋىنشا, قازىر اۋىلداعى دەنساۋلىق ساقتاۋ سالاسىن جاڭعىرتۋ جونىندەگى ۇلتتىق باعدارلاما ىسكە اسىرىلىپ جاتىر. باعدارلاما اياسىندا اتىراۋ وبلىسىندا 2023-2024 جىلدارى 18 العاشقى مەديتسينالىق-سانيتارلىق كومەك نىسانىن سالۋ كوزدەلگەن. ونىڭ ىشىندە 11 مەديتسينالىق, 6 فەلدشەرلىك-اكۋشەرلىك پۋنكت, 1 دارىگەرلىك امبۋلاتوريا بار. ال اۋداندىق اۋرۋحانالاردا قوسىمشا بولىمشەلەر اشىلىپ, مەديتسينالىق جابدىقتارمەن جاراقتاندىرۋ جوسپارلانعان.
«بيىل جىل باسىندا اتىراۋ وبلىسىنىڭ اكىمدىگى 280-نەن اسا مەديتسينا مامانى, ونىڭ ىشىندە 183 دارىگەر جەتىسپەيتىنى تۋرالى مالىمەت بەردى. اسىرەسە, اكۋشەر-گينەكولوگتەرگە سۇرانىس ارتىپ وتىر. سول سەبەپتەن وڭىرگە كادرلاردى كوبىرەك تارتۋ ءۇشىن 2022-2023 وقۋ جىلىنا رەزيدەنتۋرادا ماماندار دايارلاۋعا 24 ورىن بەرىلدى. ونىڭ ىشىندە ەكى اكۋشەر-گينەكولوگ مامانى دايارلانادى», دەيدى اتىراۋلىقتارمەن كەزدەسكەن ا.عينيات.
ونىڭ دەرەگىنە سۇيەنسەك, اتىراۋ وبلىسىندا قان اينالىمى جۇيەسى اۋرۋلارى, ونىڭ ىشىندە ينفاركت, ينسۋلت تۇرىمەن سىرقاتتانۋشىلاردىڭ كوپتىگى بايقالادى. بۇعان نە اسەر ەتەدى؟
«وڭىردە مەديتسينالىق-سانيتارلىق العاشقى كومەكتى ۇيىمداستىرۋدا كەمشىلىك بار. مۇنىڭ سالدارى ۇيدەگى ءولىم-جىتىمگە سەبەپ بولادى. ينسۋلتتان كەيىن «د» ەسەبىنە الىنعان ادامداردىڭ تومەن ۇلەسى 42,4%-دى قۇراپ وتىر. ال ونكولوگيالىق ديسپانسەردە دە كادر تاپشىلىعى بار. بۇل ديسپانسەردە تسيتوپاتومورفولوگ, حيميوتەراپەۆت, مەديتسينالىق فيزيك, توروكالدى ونكولوگ پەن ونكوۋرولوگ سەكىلدى ارنايى ماماندار جەتىسپەيدى», دەپ مالىمدەدى ا.عينيات.
اتىراۋ وبلىسى