استانا كۇنى مەرەكەسى قارساڭىندا تاراز قالاسىندا 140 وتباسى باسپانالى بولۋ باقىتىنا يە بولدى. كەشەگى قاسيەتتى جۇما كۇنى تۇرعىن ءۇي كەزەگىندە تۇرعان وسىنشاما وتباسىنىڭ كوپ جىلداردان بەرگى ارمانى ورىندالدى. ياعني, ەكى كوپ قاباتتى تۇرعىن ءۇي پايدالانۋعا بەرىلدى. قونىس تويىن وتكىزگەندەردىڭ ىشىندە ۇلى وتان جانە اۋعانستان سوعىستارىنىڭ ارداگەرلەرى, كوپ بالالى وتباسىلار بار. قالانىڭ ىرگەسىنەن جاڭادان بوي كوتەرىپ كەلە جاتقان «بايتەرەك» شاعىن اۋدانىنداعى ساۋلەتى مەن ءسانى كەلىسكەن وسىناۋ جاپ-جاڭا باسپانالاردا تۇرعىندار ءۇشىن بارلىق جاعداي جاسالعان.
جالپى العاندا, سوڭعى جىلدارى مەملەكەتىمىزدىڭ سەرپىندى دامىپ, تۇرعىن ۇيمەن قامتۋ باعدارلامالارىنىڭ جۇزەگە اسىرىلۋىمەن حالقىمىزدىڭ پاتەرلى بولۋعا دەگەن سەنىمى كۇشەيدى. «بايتەرەك» شاعىن اۋدانىندا وسىمەن 17 تۇرعىن ءۇي پايدالانۋعا بەرىلدى. بۇل اۋداننىڭ بولاشاعى جارقىن دەپ ايتۋعا ابدەن بولادى. مۇندا اباتتاندىرۋ, جول سالۋ, كوگالداندىرۋ جۇمىستارى قارقىندى جۇرگىزىلىپ كەلەدى. قازىر مەكتەپ, بالاباقشا عيماراتتارى سالىنىپ جاتىر. بالالارعا ارنالعان ەكى اۋرۋحانا بار.
جايلى باسپاناعا يە بولعانداردىڭ ءبىرى – اۋعان سوعىسىنىڭ ارداگەرى ەلىباي بايماحانوۆ وسى كۇندى 20 جىل بويى كۇتكەنىن ايتادى. ءتورت بالانىڭ اكەسى وتباسىن قۋانىشقا بولەگەن بۇل كۇندى ەش ۇمىتپايتىنى انىق. «استانا كۇنى مەرەكەسىنە وراي باسپانالى بولىپ جاتقانىمىزدى جاقسىلىققا بالاپ وتىرمىن. ەندى وسى شاڭىراعىم استانا سەكىلدى قوناقجاي, نەسىبەلى, ساۋلەتتى بولادى دەپ ويلايمىن», دەيدى ول اعىنان جارىلىپ.
جامبىل وبلىسى اكىمىنىڭ ءبىرىنشى ورىنباسارى بەكبولات ورىنبەكوۆ باسپانالى بولعانداردى قۋانىشىمەن قۇتتىقتاپ, جىلدىڭ سوڭىنا دەيىن تاعى دا ءۇش كوپ قاباتتى ءۇي پايدالانۋعا بەرىلەتىنىن جەتكىزدى. ەل ەكونوميكاسىنىڭ قارىشتاپ ءوسۋىنىڭ ناتيجەسىندە وبلىستا قۇرىلىس قارقىنى ەرەكشە. بەكبولات سەرىكبەك ۇلىنىڭ قولىنان العاش بولىپ پاتەر كىلتىن العان ۇلى وتان سوعىسىنىڭ ارداگەرى بەرتاي جاسكيلەنوۆ «ەل امان بولسىن, وسى باقىتتى ەلدىڭ باعىنا بىتكەن ەلباسىنا اللا قۋات بەرسىن», دەپ باتاسىن بەردى.
قونىس تويى قۇتتى بولسىن, اعايىن!
ورالحان ءداۋىت,
«ەگەمەن قازاقستان».
جامبىل وبلىسى.
سۋرەتتەردى تۇسىرگەن اقادىل رىسماحان.