گرەكيانىڭ رودوس قالاسىندا مەكتەپ وقۋشىلارى اراسىندا شاحماتتان الەم چەمپيوناتى اياقتالدى, دەپ حابارلايدى Egemen.kz سپورتتى دامىتۋ ديرەكتسياسىنىڭ ءباسپاسوز قىزمەتىنە سىلتەمە جاساپ.
14-22 ءساۋىر ارالىعىندا وتكەن اقىل-وي الامانىنا 7-17 جاس ارالىعىنداعى 500-دەن استام تاڭداۋلى شاحماتشى قاتىستى.
بۇل باسەكەدە قازاقستان قۇراماسى جۇلدە سانى جاعىنان 1-ورىن (2 التىن, 2 كۇمىس, 5 قولا) الدى. G09, ياعني 9 جاسقا دەيىنگى ويىنشىلار اراسىندا كلاسسيكالىق شاحماتتان الاننا بەرىكقىزى كەرەمەت ناتيجە كورسەتىپ, چەمپيون اتاندى. ول شۆەيتساريالىق جۇيە بويىنشا 9 پارتيانىڭ سەگىزىندە جەڭىسكە جەتتى. وتانداسىمىز شەشۋشى ماتچتا نەگىزگى قارسىلاسى موڭعوليالىق تسەلمۋن يدەردەن (8 ۇپاي) باسىم ءتۇستى. جالپى, بۇل جاس ساناتىندا 41 ويىنشى سىنعا ءتۇستى. وسى تۇستا الاننا ءبىر جارىم جىلدىڭ ىشىندە 4-رازريادتان الەم چەمپيونى اتىعىنا دەيىن جەتىپ وتىر. وسى ناتيجەسىنىڭ ارقاسىندا قازىر الاننا بەرىكقىزى G09 بويىنشا FIDE رەيتينگىندە 1-ورىنعا كوتەرىلدى.
ال بۇل دودادا ەلىمىزدەن شىققان 2-چەمپيون – ءامينا قايىربەكوۆا. ول 17 جاسقا دەيىنگى ساناتتا 8 كەزدەسۋدى ۇتىپ, تۇركيالىق زەينەپ ءچيفتيندى (7,5 ۇپاي) ارتتا قالدىردى. ۇزدىك ۇشتىكتى 6 رەت ۇتىپ, ءبىر رەت تەڭ تۇسكەن تاعى ءبىر تۇركيالىق ەليفناز اكات, (6,5 ۇپاي) تۇيىندەدى.
توپ جارعان الاننا بەرىكقىزىنا باس جۇلدەنى بەلگىلى شاحماتشى جان-ميشەل راپەر, ال ءامينا قايىربەكوۆاعا رودوس قالاسى گۋبەرناتورىنىڭ ورىنباسارى كالليستوس دياكوگەورگيۋ تابىستادى.
كۇمىس جۇلدەگەر اتانعان قازاقستاندىقتار – ءنۇرالى نۋرشين, (U07 جاس ساناتى, 7,5 ۇپاي), ايسۇلتان بيساليەۆ (U09 جاس ساناتى, 7);
قولا جۇلدە العاندار – ريزات ۇلان (U07 جاس ساناتى, 7 بالل), ءالىمجان جاۋىنباي (U09 جاس ساناتى, 7 ۇپاي), دانيس قۋاندىق ۇلى (U11 جاس ساناتى, 6,5), ەدگار مامەدوۆ (U13 جاس ساناتى, 7), داليا دياسقىزى (G11 جاس ساناتى, 6,5);
جۇلدە سانى جاعىنان 2-ورىنعا تۇركيا (3 التىن, 2 كۇمىس, 2 قولا) جايعاسسا, ۇزدىك ۇشتىكتى موڭعوليا (2 التىن, 3 كۇمىس, 1 قولا) تۇيىندەدى.