حالىق اقىلى مەديتسينالىق كومەك الۋعا ءماجبۇر - اسحات ايماعامبەتوۆ

دەپۋتات مەديتسينالىق ساقتاندىرۋ ماسەلەلەرىنە توقتالىپ, ۇسىنىس ءبىلدىردى.

«قازىر ازاماتتار اۋرۋحاناعا بارىپ, تەكسەرىستەن تەگىن وتەمىن دەسە, ءبىر اي نەمەسە ءۇش اي كۇتۋ كەرەك. ال ەگەر سول ادامدار سول تەكسەرىستەن اقىلى تۇردە وتەمىن دەسە, ءدال سول ۋاقىتتا وتۋىنە بولادى. سوندىقتان ەرىكسىز اقىلى قىزمەتتى الۋعا ءماجبۇر بولادى. وندا ءبىز نە ءۇشىن اي سايىن جالاقىدان جارنانى تولەيمىز دەيدى. بۇل نەگىزىنەن جاساندى پروبلەما. ول ەنگىزىلگەن قارجىلاندىرۋ جۇيەسىمەن دە بايلانىستى بولىپ تۇر. مىسالى, ەمحانالار ءىس جۇزىندە اي سايىن كۆوتا ارقىلى قاراجات الادى. وسىنى ەسكەرە وتىرىپ اي سايىنعى قارجىلاندىرۋدان باس تارتۋ كەرەك. كورسەتىلگەن قىزمەت فاكتىسى بويىنشا تولەنۋى ءتيىس. پاتسيەنتتەرگە مەديتسينالىق ۇيىمدى تاڭداۋ ەركىن بەرىپ تۇسىنىسپەۋشىلىكتى بولدىرماۋ ءۇشىن تەگىن مەديتسينالىق كومەكتىڭ كەپىلدەندىرىلگەن كولەمى مەن مەديتسينا ساقتاندىرۋ پاكەتتەرىن ناقتىلاۋدى ۇسىنامىن», دەدى اسحات ايماعامبەتوۆ.

دەپۋتات دارىگەرلەرگە ارتىلعان جۇكتەمەنىڭ كوپتىگىن دە ايتتى. دارىگەرلەر ەمدەلۋشىلەردىڭ الدىنداعى مىندەتىنە ەمەس, تولتىرىلۋى كەرەك قۇجاتتارعا كوپ ۋاقىت جۇمسايدى دەدى دەپۋتات. سوندىقتان بۇنداي جۇمىستاردى مەدبيكەلەرگە تاپسىرۋدى ۇسىندى.

«بۇگىنگى تاڭدا دارىگەرلەر پاتسيەنتتەردى تەكسەرۋدىڭ ورنىنا كومپيۋتەرگە تەلمىرىپ, دەرەكتەردى ءتۇرلى اقپاراتتىق جۇيەلەرگە ەنگىزۋگە ءماجبۇر بولعاندىقتان ناۋقاستاردى قاراۋعا ءتىپتى, ۋاقىتى دا جوق. سوندىقتان بارلىق قۇجاتتاردى تولتىرۋدى مەدبيكەلەرگە تاپسىرۋ قاجەت دەپ سانايمىن. شتات سانىن كوبەيتۋ ارقىلى دارىگەرلەردىڭ جۇكتەمەسىن ازايتۋ قاجەت جانە بىرىڭعاي اقپاراتتىق جۇيەنى ىسكە قوسۋ بويىنشا  جۇمىستى شۇعىل اياقتاۋ كەرەك», دەپ قوستى دەپۋتات.