استانادا پوليتسياعا قاراقشىنى ۇستاۋعا كومەكتەسكەن وقۋشى ماراپاتتالدى

استانا قالاسى پوليتسيا دەپارتامەنتىنىڭ باستىعى مارات تولەباەۆ شابۋىلداۋشىنى ۇستاۋ كەزىندە باتىلدىق پەن بەلسەندى ازاماتتىق ۇستانىم تانىتقان 14 جاستاعى بالانى ماراپاتتادى. زاڭعا قايشى ارەكەتتەرگە كۋا بولعان №49 ورتا مەكتەپتىڭ 8-سىنىپ وقۋشىسى زاڭعار نيازوۆ قورىقپاي, باتىل ارەكەت ەتتى. ەلوردالىق پوليتسيا باسشىسى سالتاناتتى تۇردە جاسوسپىرىمگە العىس حات تابىستادى.

– بەي-جاي قاراماي, باتىلدىق تانىتۋ – ەڭ جوعارى باعاعا لايىق. بۇل ءسىزدى كەز كەلگەن مينۋتتا كومەككە كەلە الاتىن, جاناشىر ەتىپ تاربيەلەگەن اتا-اناڭىزدىڭ, مۇعالىمدەرىڭىزدىڭ ۇلكەن ەڭبەگى, – دەدى مارات تولەباەۆ.

ەستەرىڭىزگە سالا كەتەيىك, 8-سىنىپ وقۋشىسى كەشكى ۋاقىتتا كەمەڭگەر ۇلى كوشەسىندە ايەلگە جاسالعان قاراقشىلىق شابۋىلعا كۋا بولعان. ايەلدىڭ كومەككە شاقىرعانىن ەستىگەن ءجاسوسپىرىم قورىقپاي وعان جۇگىرىپ بارىپ, جاعدايىن سۇراعان, ءوزى سول ۋاقىتتا پوليتسياعا بولعان وقيعا تۋرالى حابارلاۋ ءۇشىن دوسىنا قوڭىراۋ شالعان. سودان كەيىن بالا ەرەسەكتەردىڭ ايەلگە كومەكتەسۋى ءۇشىن ءوتىپ بارا جاتقان كولىكتەردى توقتاتقان.

بىرنەشە مينۋتتان كەيىن پاترۋلدىك پوليتسيا كەلگەن. ءجاسوسپىرىم شابۋىلداۋشىنىڭ بەلگىلەرىن سيپاتتاپ, پوليتسەيلەرگە ەر ادامنىڭ قاي باعىتقا بەت العانىن كورسەتكەن. ءتارتىپ ساقشىلارى 30 جاستاعى ەر ادامدى ء«ىزىن سۋىتپاي» ۇستادى.

«استانا قالاسىنىڭ پوليتسيا دەپارتامەنتى وقيعاعا بەي-جاي قاراماعان قالا تۇرعىنىنا قىراعىلىعى, جاۋاپكەرشىلىگى جانە قىلمىستى اشۋعا كومەكتەسكەنى ءۇشىن العىس ءبىلدىردى. كەيدە پوليتسيانىڭ قىزمەتى ازاماتتاردىڭ قولداۋىنسىز جانە كومەگىنسىز مۇمكىن ەمەس. 8-سىنىپ وقۋشىسىنىڭ ارەكەتى كەيدە شەتتە قالماۋدىڭ قانشالىقتى ماڭىزدى ەكەنىن تاعى ءبىر رەت دالەلدەيدى», دەلىنگەن Polisia.kz حابارلاماسىندا.