بيىل ناۋرىز ايىندا ەكىنشى دەڭگەيلى بانكتەر مەن بانكتىك ەمەس جەكەلەگەن ايىرباستاۋ پۋنكتەرىندە 4 568 التىن قۇيما ساتىلدى, ولاردىڭ جالپى سالماعى – 175,0 كگ. بۇل تۋرالى ۇلتتىق بانكتىڭ ءباسپاسوز قىزمەتى حابارلادى, دەپ جازادى Egemen.kz.
حالىققا تازارتىلعان التىن قۇيمالاردى ساتۋ جانە ساتىپ الۋ باعدارلاماسىن ۇلتتىق بانك 2017 جىلى ىسكە قوسقان بولاتىن. باعدارلاما قولعا الىنعالى بەرى جالپى سالماعى 4,2 توننا 122 430 التىن قۇيما ساتىلدى.
التىن قۇيمالار بەس ءتۇرلى سالماقتا ۇسىنىلادى: 5, 10, 20, 50 جانە 100 گ. ساتىپ الۋشىلار اراسىندا وتە جوعارى سۇرانىسقا يە ءتۇرى – 10 گرامدىق قۇيما. جالپى ساتىلعان قۇيمالار اراسىندا ونىڭ ۇلەسى 26% – 31 909 دانا. ودان كەيىن 5 گرامدىق التىن قۇيما – 27 547 دانا (22%), 100 گرامدىق قۇيما – 25 218 دانا (21%), 20 گرامدىق قۇيما – 23 566 دانا (19%), جانە 50 گراممدىق قۇيما – 14 190 دانا (12%). التىن قۇيمالار الماتى, استانا جانە اتىراۋ قالالارىندا كوپ ساتىلادى.
التىن قۇيمالار سەنىمدى ينۆەستيتسيا قۇرالى بولا الادى. التىن قۇيمالار نارىعىنداعى وتىمدىلىكتىڭ باستى كەپىلى – بانك پەن بانكتىك ەمەس ايىرباستاۋ پۋنكتەرى كليەنتكە اقشانى سول كۇنى تولەي وتىرىپ, التىن قۇيمالاردى كەرى ساتىپ السا بولادى.
باعدارلاما باستالعاننان بەرى ەكىنشى دەڭگەيلى بانكتەر مەن بانكتىك ەمەس جەكەلەگەن ايىرباستاۋ پۋنكتەرى جالپى سالماعى 526,4 كەلى 20 703 التىن قۇيمانى كەرى ساتىپ الدى. بۇل – جالپى ساتىلعان قۇيمالاردىڭ 17%-ى. ولار كەرى ساتىپ العان التىن قۇيمالاردىڭ بارلىعى دەرلىك ۇلتتىق بانكتىڭ فيليالدارى ارقىلى حالىققا ساتىلادى.
ء«اربىر قۇيما قورعاۋ ەلەمەنتتەرىمەن قاپتالعان (قۇيمانىڭ اينا بەتى, ميكروتەكست جانە جيەگى بار) جانە ارنايى قوراپقا سالىنىپ شىعادى. سول ارقىلى قۇيمانىڭ اشىلعان-اشىلماعانىن وڭاي تەكسەرۋگە بولادى. قورعاپ تۇراتىن قورابى ساپا سەرتيفيكاتى بولىپ تا سانالادى. سوندىقتان التىن قۇيمانى ۇقىپپەن ساقتاپ, قورابىن بۇلدىرمەۋگە كەڭەس بەرەمىز», دەلىنگەن حابارلامادا.
قازىر التىن قۇيمالاردى Halyk Bank, ەۋرازيالىق بانك, Jusan Bank, تسەنتركرەديت بانكى, سونداي-اق بانكتىك ەمەس جەكەلەگەن ايىرباستاۋ پۋنكتەرىنەن ساتىپ الىپ, كەرى ساتۋعا بولادى.