ءماجىلىس توراعاسى ەرلان قوشانوۆ «شەۆرون» كورپوراتسياسىنىڭ ەۋرازيالىق بولىمشەسىنىڭ باسقارۋشى ديرەكتورى دەرەك ماگنەسستى قابىلدادى. تاراپتار كومپانيا جۇمىسىنداعى وتاندىق ۇلەستى ارتتىرۋ جانە الەۋمەتتىك جوبالاردى جۇزەگە اسىرۋ جونىندە پىكىر الماستى.
ءماجىلىس سپيكەرى كورپوراتسيا باسشىلىعىن قازاقستانداعى قىزمەتىنىڭ 30 جىلدىعىمەن قۇتتىقتاپ, «شەۆرون» ەلىمىزدەگى ءىرى شەتەلدىك ينۆەستور ەكەنىن اتاپ ءوتتى. ەرلان قوشانوۆ قازاقستان پرەزيدەنتىنىڭ, ۇكىمەت پەن پارلامەنتتىڭ باستى مىندەتى – ۇلتتىق مۇددەلەردىڭ ساقتالۋىن ەسكەرە وتىرىپ, شەتەلدىك ينۆەستورلار ءۇشىن قولايلى جاعداي جاساۋ كەرەك ەكەنىن ايتتى. وسىعان بايلانىستى «شەۆرون» كومپانياسىنا بىرقاتار ۇسىنىس جاسادى. اتاپ ايتقاندا, اۋاعا تارايتىن زياندى قالدىقتاردى ازايتۋ, مۇناي حيمياسىن دامىتۋ, مۇناي مەن گاز وڭدەۋدى كۇشەيتۋ.
«ەلىمىزدىڭ ۇلەسىن ارتتىرۋعا باسا نازار اۋدارىپ, جەرگىلىكتى ءونىمدى ساتىپ الۋ ماڭىزدى. جەرگىلىكتى سەرۆيستىك كومپانيالاردى تارتۋ كەرەك. قازاقستاندا دامىعان جانە باسەكەگە قابىلەتتى بيزنەس بار. ولار وزىق حالىقارالىق ستاندارتتار دەڭگەيىندە جۇمىس ىستەي الادى. بۇگىندە بۇل باعىتتا ءبىراز جۇمىس اتقارىلىپ جاتىر. دەگەنمەن اۋقىمدى رەزەرۆ تە بار. بۇدان ەش تاراپ ۇتىلمايدى», دەدى ءماجىلىس سپيكەرى.
ەرلان قوشانوۆ تاياۋدا وتكەن سايلاۋ ناۋقانى كەزىندە دەپۋتاتتاردىڭ قازاقستاننىڭ باتىس وبلىستارىنداعى تۇرعىندارمەن وتكەن كەزدەسۋىندە كوتەرگەن تۇيتكىلدى ماسەلەلەرگە دە توقتالدى. سونىڭ ءبىرى – اتىراۋ وبلىسىنىڭ دوسسور ەلدى مەكەنىندەگى جانە قۇلسارى قالاسىنداعى اپاتتى جاعدايداعى تۇرعىن ءۇي ماسەلەسى مەن حالىقتى الەۋمەتتىك قولداۋ. بۇدان بولەك, جەرگىلىكتى جۇمىسشىلارعا لايىقتى جاعداي جاساپ, ءادىل ەڭبەكاقى تولەۋ, ۆاحتا مەرزىمىن قىسقارتۋ, جەرگىلىكتى كادرلاردى دايارلاۋدى كۇشەيتۋ ماسەلەسى دە كەڭىنەن قوزعالدى.
«بۇگىندە ەلىمىزدە مۇناي-گاز سالاسىندا بىلىكتى ماماندار جەتەرلىك. ءبىراز جەرلەسىمىز شەتەلدىڭ بەدەلدى وقۋ ورىندارىندا ءبىلىم الىپ, ترانسۇلتتىق كومپانيالاردا تاجىريبە جيناقتادى. وسىعان بايلانىستى جەرگىلىكتى ماماندارعا شەتەلدىك ارىپتەستەرمەن بىردەي جالاقى تولەپ, ولارعا سەنىم ارتۋىڭىزدى سۇرايمىز», دەدى پالاتا توراعاسى.
ءوز كەزەگىندە دەرەك ماگنەسس كومپانيانىڭ ەڭ باستى رەسۋرسى ادام ەكەنىن اتاپ ءوتتى. ول جەرگىلىكتى كادرلاردى دامىتۋعا ينۆەستيتسيا سالۋعا, سونداي-اق كومپانيا ورنالاسقان وسى ايماقتىڭ دامۋىنا قولداۋ كورسەتۋگە دايىن ەكەنىن جەتكىزدى. ول ءماجىلىس توراعاسىنا كومپانيانىڭ دەپۋتاتتار تاراپىنان ايتىلعان بارلىق ۇسىنىسقا مۇقيات قارايتىنىن جەتكىزدى.
ءسوز سوڭىندا ەرلان قوشانوۆ «شەۆرون» كومپانياسىنىڭ باسشىلىعىن جەرگىلىكتى تۇرعىنداردىڭ وزەكتى ماسەلەلەرىن شەشۋگە جانە ايماقتى دامىتۋعا بەلسەنە اتسالىسۋعا شاقىردى. كەزدەسۋگە ءماجىلىس دەپۋتاتى ءادىل جۇبانوۆ (اتىراۋ وبلىسىنان), ەدىل جاڭبىرشين (ماڭعىستاۋ وبلىسىنان) قاتىستى.