پەتروپاۆلدا سەپاراتيزمدى ناسيحاتتادى دەگەن كۇدىككە ىلىنگەن وزدەرىن «حالىق كەڭەسى» دەپ اتاعان ۇيىمعا قاتىستى ساراپتاما ناتيجەسى شىقتى. ساراپتاما قورىتىندىسىنا سايكەس, توپتىڭ بەلسەندى ءۇش مۇشەسى ۋاقىتشا ۇستاۋ يزولياتورىنا قاماۋعا الىندى. تەرگەۋ جۇمىستارى ءالى جالعاسىپ جاتىر.
ءۇي ىشىنەن ءۇي تىكپەك بولىپ, سەپاراتيزمدى ناسيحاتتاعاندارعا قاتىستى ماسەلە قوعامدا ۇلكەن داۋ تۋعىزعان ەدى. وسىعان بايلانىستى وبلىستىق پوليتسيا دەپارتامەنتى مەن ۇلتتىق قاۋىپسىزدىك كوميتەتى دەپارتامەنتىنىڭ تەرگەۋشىلەرىنەن جەدەل-تەرگەۋ توبى دا قۇرىلدى. كەشە سولتۇستىك قازاقستان وبلىستىق پروكۋراتۋراسى وتكىزگەن بريفينگتە «حالىق كەڭەسى» دەپ اتالعان توپتىڭ ءۇش بەلسەندىسىنىڭ قاماۋعا الىنعانى ايتىلدى.
«سەپاراتيزمدى ناسيحاتتادى دەپ كۇدىككە ىلىنگەن توپتىڭ ۇستىنەن ەكى قىلمىستىق ءىس قوزعالدى. ءىس قىلمىستىق كودەكستىڭ 180-بابى 2-بولىگى بويىنشا قازاقستان رەسپۋبليكاسىنىڭ بىرتۇتاستىعى مەن تۇتاستىعىن ىدىراتۋدى ناسيحاتتاۋ نەمەسە وعان جاريا تۇردە بۇقارالىق اقپارات قۇرالدارىن جانە تەلەبايلانىس جەلىلەرىن شاقىرۋ ارقىلى ماتەريالداردى تاراتۋ جانە قىلمىستىق كودەكستىڭ 179-بابى بويىنشا مەملەكەتتىڭ قاۋىپسىزدىگىن ىدىراتۋدى ۇگىتتەۋ بويىنشا ساراپتالعان. بۇل اۋىر قىلمىستار ساناتىنا كىرەدى. وعان 10 جىلعا دەيىنگى مەرزىمگە باس بوستاندىعىنان ايىرۋ تۇرىندەگى بالاماسىز جازالاۋ قولدانىلادى. توپتىڭ نەگىزگى ءۇش فيگۋرانتى ۋاقىتشا ۇستاۋ يزولياتورىنا قاماۋعا الىندى», دەدى سولتۇستىك قازاقستان وبلىسى پروكۋراتۋراسى باسقارماسىنىڭ باستىعى عاني جالبي.
ساياساتتانۋشى مەن باسقا دا ماماندار قاتىسقان كوميسسيالىق پسيحولوگيالىق-فيلولوگيالىق سوت ساراپتاماسى بەينەجازبادان سەپاراتيزم بەلگىلەرىن انىقتاپ, قورىتىندى شىعاردى.
«تەرگەۋ بارىسىندا پەتروپاۆل قالاسىندا 2023 جىلعى 19 ناۋرىزدا سولتۇستىك قازاقستان ۋنيۆەرسيتەتى كوللەدجىنىڭ عيماراتىندا وبلىس ورتالىعىنىڭ 20 ازاماتىنان تۇراتىن «حالىق كەڭەسى» دەگەن توپتىڭ جينالىس وتكەنى, ولار وزدەرىن «كەڭەس سوتسياليستىك رەسپۋبليكالار وداعىنىڭ ءىزباسارلارىمىز» دەپ, كوزقاراستارىن بىلدىرگەندىگى انىقتالدى. جيىنعا بىرەۋى كامەلەت جاسىنا تولماعان بالاسىمەن كەلگەن. قالعان 16 ادام جۇمىستارىنان شەتتەتىلگەن جوق, قىزمەتتەرىن جالعاستىرىپ جاتىر. ولار بويىنشا شەشىم قابىلدانعان جوق. كىناسى دالەلدەنگەن جاعدايدا جازاعا تارتىلادى. تەرگەۋ بارىسى قاتاڭ باقىلاۋدا. كىمنىڭ قايدا جۇمىس ىستەيتىنى تۋرالى, قالاي بۇل توپقا قوسىلعانى تۋرالى اقپارات قىلمىستىق-پروتسەستىك كودەكستىڭ 201-بابىنا سايكەس ازىرگە جاريالاۋعا جاتپايدى. قازىرگى ۋاقىتتا تەرگەۋ ارەكەتتەرى جالعاسىپ جاتىر, جينالىسقا قاتىسقان باسقا تۇلعالارعا قاتىستى وبەكتيۆتى جانە جان-جاقتى قۇقىقتىق باعا بەرىلەدى», دەدى عاني جالبي.
ەستەرىڭىزدە بولسا, ناۋرىزدىڭ اياعىندا الەۋمەتتىك جەلىدە «حالىق كەڭەسى» دەپ اتالاتىن توپتىڭ ۆيدەوسى كەڭ تاراپ, قوعام نارازىلىعىن تۋعىزعان ەدى. وسىعان بايلانىستى ۇلتتىق قاۋىپسىزدىك كوميتەتىنىڭ سولتۇستىك قازاقستان وبلىسى بويىنشا دەپارتامەنتى سەپاراتيزم فاكتىسى بويىنشا سوتقا دەيىنگى تەرگەپ-تەكسەرۋ باستاعان بولاتىن. سول كۇنى وبلىس پروكۋراتۋراسىنىڭ نۇسقاۋى بويىنشا ۇلتىق قاۋىپسىزدىك كوميتەتى, پوليتسيا, ەكونوميكالىق تەرگەۋ دەپارتامەنتى, وبلىستىڭ سىبايلاس جەمقورلىققا قارسى قىزمەت ماماندارىنان ۆەدومستۆوارالىق جەدەل-تەرگەۋ توبى قۇرىلىپ, پروتسەستىك پروكۋرورلار تاعايىندالدى.