جاراسى جازىلماعان جاڭاوزەن جۇرتى تاعى ءبىر اپاتتى باستان وتكەردى. بۇل جولى قالاداعى ەكىقاباتتى تۇرعىن ءۇيدىڭ بىرىندە جارىلىس بولىپ, سونىڭ سالدارىنان ءتورت ادام قازا تاپتى.
ماڭعىستاۋ وبلىسى اكىمى ءباسپاسوز قىزمەتىنىڭ حابارلاۋىنشا, جاڭاوزەندەگى جارىلىس دەرەگى بويىنشا قىلمىستىق ءىس قوزعالعان. وقيعادان كوپ ۇزاماي-اق وبلىس اكىمى نۇرلان نوعاەۆ اپاتتىق جاعدايدان حابار بەرىپ وتىردى.
«ساعات 10:45-تەگى جاعداي بويىنشا 13 ادام مەديتسينالىق كومەككە جۇگىندى. ونىڭ ىشىندە 8 بالا بار. 6 ادام اۋرۋحاناعا جاتقىزىلسا, 7 ادام ۇيگە جىبەرىلدى. جارىلىس كەزىندە 3 پاتەر قيرادى. اپاتتان كەيىن ءۇي گاز جەلىسىنەن بىردەن اجىراتىلدى. بۇگىندە ۇيىندىلەردى تازالاۋ جۇمىستارى جۇرگىزىلىپ جاتىر. جارىلىس دەرەگى بويىنشا قىلمىستىق ءىس قوزعالدى. وقيعانىڭ ءمان-جايى تولىق انىقتالادى. وقيعا ورنىندا ۆەدومستۆوارالىق كوميسسيا جۇمىس ىستەيدى», دەدى نۇرلان نوعاەۆ كۇندىزگى ءباسپاسوز جيىنىنىڭ بىرىندە.
ءوڭىر باسشىسى اپات سالدارىنان كوز جۇمعانداردىڭ وتباسىنا كوڭىل ايتتى. سونداي-اق تۇرعىن ءۇي گازدان اجىراتىلعانىن جەتكىزدى. «جارىلىس بولعان جەردەن قوقىستار شىعارىلىپ جاتىر. ونىڭ سەبەبىن انىقتاۋعا كىرىستىك. تجد جەدەل شتابى مەن سەنىم تەلەفونىن ىسكە قوستى», دەدى نۇرلان نوعاەۆ.
وقيعا ورنىندا تجد كۇشتەرى (1 ءتۇسىرۋ توبى, 9 تەحنيكا), جەرگىلىكتى اتقارۋشى ورگاندار (13 ادام جانە 6 تەحنيكا), سمپ (12 ادام جانە 6 تەحنيكا), دپ (150 جەكە قۇرام جانە 10 تەحنيكا) ءىىم ۇلتتىق ۇلان (60 اسكەري قىزمەتكەر جانە 2 تەحنيكا) جۇمىس ىستەدى.
جاراقات الىپ, اۋرۋحاناعا جاتقىزىلعاننىڭ ءبارى تراۆماتولوگيا بولىمشەسىندە ەم الىپ جاتىر. وقيعا سالدارىنان 13 ادام ورتالىق اۋرۋحاناعا جەتكىزىلگەن. ونىڭ جەتەۋى بالا, ولار جاراقاتىنىڭ جەڭىلدىگىنە بايلانىستى ۇيلەرىنە قايتارىلعان.
قالعاندارىنا مەديتسينالىق كومەك كورسەتىلدى. سونىمەن قاتار تراۆماتولوگيالىق بولىمگە تۇسكەن ورتاشا جاعدايدا كۇيىك العان 2 كىشكەنتاي قىز ەم الدى. رەانيماتسيا بولىمىنە تۇسكەن ەر ادامعا وپەراتسيا جاسالعان. جاعدايى اۋىر تۇرعىندار جانساقتاۋ جانە قارقىندى تەراپيا انەستەزيولوگيا بولىمشەسىنە, ءبىر پاتسيەنت وبلىستىق اۋرۋحاناعا جەدەل اۆياتسيالىق تىكۇشاقپەن جەتكىزىلدى.
«قايتىس بولعان ازاماتتاردىڭ وتباسىنا قايعىرا كوڭىل ايتامىن. زارداپ شەككەندەرگە جانە ولاردىڭ وتباسىلارىنا ماتەريالدىق كومەك كورسەتىلەدى, جاڭا تۇرعىن ءۇي بەرىلەدى. اپاتتىق جۇمىستارعا كومەك كورسەتكەن ەرىكتىلەر مەن قالا تۇرعىندارىنا العىس ايتامىن. قازىرگى ۋاقىتتا بارلىق ادام ۇيىندىلەردەن شىعارىلدى», دەدى نۇرلان نوعاەۆ.
رەسمي ورگانداردىڭ مالىمەتىنە سۇيەنسەك, تۇرعىن ۇيدەگى گاز جارىلعان. تجم مالىمەتىنشە, وقيعا ورنىندا ءورت شىقپاعان. جارىلىس سالدارىنان 150 شارشى مەتر كىرەبەرىس قيراپ, 4 پاتەر زارداپ شەكتى.
«قۇتقارۋشىلار ءۇيىندى استىنان 4 ادام مەن 4 مۇردە الىپ شىقتى. قازىرگى ۋاقىتتا 6 ادام اۋرۋحانادا ەم الىپ جاتىر. توتەنشە جاعدايلار دەپارتامەنتىندە جەدەل شتاب قۇرىلىپ, جەدەل جەلى تەلەفونى 8/7292/31-90-99 قىزمەت كورسەتەدى», دەپ حابارلادى ءتيىستى مەكەمە.
ۇيىندىلەردى تالداۋ بويىنشا جەدەل جۇمىستارعا 40-قا جۋىق تەحنيكا مەن 350-گە جۋىق ادام, سونىڭ ىشىندە كينولوگيالىق ەسەپ, ۇلتتىق ۇلاننىڭ اسكەري قىزمەتشىلەرى, جەرگىلىكتى اتقارۋشى ورگاندار, جەدەل مەديتسينالىق كومەك, پوليتسيا, ەرىكتىلەر جۇمىلدىرىلدى.
«الدىن الا سەبەپ – گاز-اۋا قوسپاسىنىڭ جارىلۋى. گاز باللونىنىڭ جارىلۋى تۋرالى اڭگىمە دۇرىس اقپارات ەمەس. گازدىڭ جويقىن كۇشىنە كەلسەك, ماسەلە مىنادا. راسىندا, جارىلىس بولعان كەزدە گاز-اۋا قوسپاسى كۇرت شاشىراۋى, پاتەر سەكىلدى جابىق كەڭىستىكتە, اسىرەسە قابىرعالارى بوس, تەمىربەتون توبەسى بار بولمەدە ونىڭ كۇشى بىرنەشە ەسە ارتادى», دەيدى توتەنشە جاعدايلار مينيسترلىگى مەملەكەتتىك ورتكە قارسى باقىلاۋ دەپارتامەنتىنىڭ باسشىسى ەرلان تورەگەلديەۆ.
ورتكە قارسى قىزمەت كوميتەتىنىڭ توراعاسى نۇربولات دەربىسوۆتىڭ بولجاۋىنشا, گاز تۇندە شىققان. قازىر رامازان ايى بولعاندىقتان, ادامدار ەرتە ويانىپ, تاماق ىشۋگە تۇرىپ, جارىقتى قوسقاندا جارىلىس بولعان.
ساعات 18.15-تە بارلىق اۆاريالىق-قۇتقارۋ جانە ۇيىندىلەردى تالداۋ جۇمىستارى اياقتالدى. قازىرگى تاڭدا جاڭاوزەن قالاسىنىڭ اكىمدىگى جانىنان كوميسسيا قۇرىلعان. وسى كوميسسيا جارىلىستىڭ ءمان-جايىن كەلتىرىلگەن زالالدى انىقتايدى.
ايتا كەتەرلىك جايت, جارىلىس بولعان تۇرعىن ءۇي 1977 جىلى سالىنعان. 12 پاتەرلىك ءۇي ءبىر كىرەبەرىس ورتالىقتاندىرىلعان گازبەن قامتىلعان. ءۇي اپاتتىق جاعدايداعى تۇرعىن ءۇي تىزىمىندە ەمەس. ءۇيدىڭ جالپى اۋدانى 621 شارشى مەتردى قۇرايدى. قازىر ۇيىندىلەردى سۇرىپتاپ, تەكسەرۋ ءجۇرىپ جاتىر. سودان كەيىن ساراپتاما جۇرگىزىلىپ, تۇرعىن ءۇيدى قانشالىقتى قالپىنا كەلتىرۋگە بولاتىنى انىقتالماق.
«قازمۇنايگاز» كومپانياسى جاڭاوزەندە گاز جارىلىسىنان باسپاناسىز قالعان تۇرعىندارعا جاڭا پاتەر بەرەدى. سونداي-اق زارداپ شەككەندەرگە كومەك كورسەتىلەدى. «تۇرعىن ءۇيسىز قالعان وتباسىلارعا جاڭا پاتەر بەرىلەدى. زارداپ شەككەندەرگە ورتالىق جانە جەرگىلىكتى اتقارۋشى ورگاندارمەن بىرلەسە وتىرىپ, بارلىق قاجەتتى كومەك كورسەتىلەدى», دەپ حابارلادى كومپانيا.
ال «وزەنمۇنايگاز» اق مۇنايشىلارى جارىلىستان زارداپ شەككەن وتباسىلارعا ءبىر كۇندىك ەڭبەكاقىلارىن اۋدارۋعا شەشىم قابىلدادى. «وزەنمۇنايگاز» اق-نىڭ ەڭبەك ۇجىمى باقيلىق بولعان ازاماتتاردىڭ قايعىسىنا ورتاقتاسىپ, وتباسى, اعايىن-تۋىستارىنا كوڭىل ايتادى. كومپانيا ءوز كەزەگىندە اپات بولعان ورىندا ءۇيىندىنى ارشۋ, تازالاۋعا قاجەتتى تەحنيكامەن قامتاماسىز ەتتى جانە قاجەتتىلىككە بايلانىستى كومەك كورسەتۋگە دايىن. سونداي-اق مۇنايشىلار ەرىكتى تۇردە ءبىر كۇندىك ەڭبەكاقىسىن زارداپ شەككەن ادامدارعا كومەك رەتىندە ارنايى شوتقا اۋداراتىنىن مالىمدەيدى», دەپ جازىلعان كومپانيا تاراتقان اقپاراتتا.