2022-2023 وقۋ جىلىنداعى مالىمەتكە قاراعاندا, ەلىمىزدە 578 مىڭ ستۋدەنت بار. الايدا, ونىڭ بارلىعى جاتاقحانامەن قامتاماسىز ەتىلمەگەن. ستۋدەنتتەر جاتاقحاناسىنىڭ جەتىسپەۋى - كوپتەن بەرى كوتەرىلىپ جۇرگەن ماسەلە. عىلىم جانە جوعارى ءبىلىم ءمينيسترى بۇل ماسەلە 5 جىلدىڭ ىشىندە شەشىمىن تاباتىنىن ايتتى, دەپ حابارلايدى Egemen.kz.
ساياسات نۇربەك اتاپ وتكەندەي, بۇگىندە جاتاقحانا ماسەلەسى بويىنشا بىرقاتار جۇمىس اتقارىلىپ, تاپشىلىق دەڭگەيى ازايعان.
«مەن مينيستر قىزمەتىنە كىرىسكەن كەزدە, ەلىمىزدە 87 مىڭ توسەك-ورىن تاپشىلىعى بولدى. ءبىز سەگىز ايدىڭ ىشىندە بۇل ساندى 55 مىڭعا دەيىن ازايتتىق. 22 مىڭ ورىندى قامتيتىن جاتاقحانالار سالىندى. وسى جىلدان باستاپ جىلىنا 10 مىڭ توسەك-ورىندى ەنگىزەمىز. كەلەسى 7 جىلدا, ياعني مەملەكەتتىك تاپسىرىس نەگىزىندە 70 مىڭ توسەك-ورىن پايدا بولادى دەپ جوسپارلانىپ وتىر. مەن مەردىگەرلەردى, قۇرىلىسشىلار مەن ينۆەستورلاردى وسى ىسكە اتسالىسۋعا شاقىرامىن. قارجى ورتالىعىمىز بار. ونىڭ شارتتارىن تۇبەگەيلى وزگەرتتىك. سونىمەن قاتار, ءبىز استانا, الماتى قالاسىندا ارنايى جوبالىق كەڭسەلەر قۇرىپ جاتىرمىز. جالپى 55 مىڭ تاپشىلىق, ياعني 70% الماتى, استانا قالاسىنا تيەسىلى. ودان كەيىن اباي وبلىسى, سولتۇستىك قازاقستان, باتىس قازاقستان وبلىستارى تۇر. سوسىن تۇركىستان وبلىسى مەن شىمكەنت تە بار. بۇل ماسەلە الداعى 3-5 جىلدا تۇبەگەيلى شەشىلەدى», دەدى مينيستر.