ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە عىلىم قىزمەتكەرلەرى كۇنىنە وراي XV-XIX عاسىرلارداعى ەلىمىزدىڭ ەجەلگى ەۋروپا جانە امەريكا كارتالارىنىڭ گالەرەياسى اشىلدى. وندا اتالعان جوعارى وقۋ ورنىنداعى زاماناۋي زەرتتەۋلەر ينستيتۋتىنىڭ ديرەكتورى مۇحيت-ارداگەر سىدىقنازاروۆتىڭ كوپ جىلدىق عىلىمي زەرتتەۋ ەڭبەگى ۇسىنىلدى.
گالەرەيادا كونە كارتالاردىڭ 100 كوشىرمەسى قويىلدى. مازمۇندى ءىس-شارانىڭ اشىلۋىندا ۋنيۆەرسيتەت رەكتورى ەرلان سىدىقوۆ مەملەكەت باسشىسىنىڭ مۇحيت-ارداگەر سىدىقنازاروۆتى قابىلداپ, ونىڭ اتقارعان جۇمىسىنا جوعارى باعا بەرگەنىن اتاپ ءوتتى.
ودان كەيىن ءسوز العان عىلىم جانە جوعارى ءبىلىم مينيسترلىگى عىلىم كوميتەتىنىڭ توراعاسى دارحان احمەد-زاكي دە عالىمنىڭ جەمىستى قىزمەتىنە توقتالىپ, وعان شىعارماشىلىق تابىس تىلەدى.
ءىس-شارا اياسىندا «قازاقستاننىڭ ءۇزىلىسسىز مەملەكەتتىلىگى. قازاق مەملەكەتتىلىگى تاريح تولقىنىندا. XVI-XIX عاسىرلارداعى ەۋروپا جانە امەريكا كارتالارىنداعى قازاق مەملەكەتى. اتلاس» كىتابىنىڭ اۆتورى مۇحيت-ارداگەر سىدىقنازاروۆ ءدارىس وتكىزدى. سونداي-اق ول جينالعان قاۋىمعا ءوز ەڭبەگى تۋرالى ايتىپ بەردى. عالىم 17 جىلدان اسا ەۋروپانىڭ ۇلتتىق جانە كورولدىك مۇراعاتىندا, كىتاپحانا مەن مۇراجايدا, كارتوگرافيالىق ورتالىقتاردا جانە اقش كىتاپحانالارىندا زەرتتەۋ جۇمىستارىن جۇرگىزگەن. كىتاپ-اتلاسقا تابىلعان 1 500 كونە كارتانىڭ 130-ى ەنگىزىلگەن. جيناق 3 تىلدە دايىندالىپ, ەلىمىزدە عانا ەمەس, شەتەلدە دە تانىستىرىلعان.
– بۇگىندە قازاق مەملەكەتىنىڭ ەڭ كونە كارتاسى 1540 جىل دەپ بەلگىلەنگەن. ول شۆەيتساريانىڭ بازەل قالاسىندا تابىلدى. جالپى, XV-XIX عاسىرلارداعى قازاق مەملەكەتىنىڭ كارتاسى بارلىق ستۋدەنتكە ءار سالادا جاڭا قۇزىرەتتىلىكتى مەڭگەرۋگە مۇمكىندىك بەرەدى. بۇل ءتۇرلى عىلىمي جانە ءبىلىم بەرۋ پاندەرى اياسىندا ەلىمىزدىڭ مەملەكەتتىلىگى تۋرالى ءبىلىمدى نىعايتۋعا, پاتريوتتىق سەزىمدى قالىپتاستىرۋعا ىقپال ەتەدى. 12 ساۋىردە بريۋسسەلدەگى ەۋروپارلامەنتتە العاش رەت «XV-XIX عاسىرلارداعى قازاق مەملەكەتىنىڭ ەجەلگى ەۋروپا جانە امەريكا كارتالارىنىڭ گالەرەياسى» تانىستىرىلادى. بۇل – تاريحي وقيعا, – دەدى پروفەسسور.