اعاشتاردىڭ قالىپتى جاعدايىن ساقتاۋ جانە زيانكەستەرگە توزىمدىلىگىن ارتتىرۋ ماقساتىندا 14 ساۋىردەن باستاپ قالانىڭ جاسىل جەلەگىن بيولوگيالىق وڭدەۋ باستالادى, دەپ حابارلايدى Egemen.kz.
زيانكەستەرگە وڭدەۋدەن كەيىنگى اسەردى كۇشەيتۋ ءۇشىن بيىلدان باستاپ ءبىرىنشى كەزەڭدە (ۆەگەتاتسيا باسىندا) ەمەندەر ءتورت رەت, تەرەكتەر ەكى رەتتەن وڭدەلەدى. بۇعان دەيىن ولار ءبىر رەت قانا وڭدەلەتىن. الايدا وڭدەۋ رەتتىلىگى ازدىعىنىڭ ءتيىمسىز ەكەندىگى دالەلدەندى جانە اعاشتاردى ساقتاپ قالۋعا مۇمكىندىك بەرمەيتىنى انىقتالدى. بۇل تۋرالى الماتى اكىمدىگى حابارلادى.
جۇمىس بارىسىندا ادامدارعا قۇستار مەن جانۋارلارعا زيانسىز, كليماتتىق ەرەكشەلىكتەردى ەسكەرە وتىرىپ قر اۋماعىندا قولدانۋعا رۇقسات ەتىلگەن سەرتيفيكاتتالعان قاۋىپتىلىگى تومەن كلاسسقا جاتاتىن (پ-4) بيولوگيالىق جانە كەيبىر كەزدەردە حيميالىق پرەپاراتتار قولدانىلادى.
«جاپىراق كەمىرگىش جانە زەڭ اۋرۋلارىن قوزدىرعىش زيانكەستەرگە قارسى وڭدەۋدە 2,3 ملن استام اعاشتى قامتۋ جوسپارلانعان. زيانكەستەر مەن اۋرۋلاردىڭ بيولوگيالىق ەرەكشەلىكتەرىنە قاراي وڭدەۋ تۇندە جانە تاڭعى ۋاقىتتا جۇزەگە اسادى», دەلىنگەن الماتى اكىمدىگىنىڭ حابارلاماسىندا.
بيىل بيولوگيالىق وڭدەۋ ادەتتەگىدەي ءتورت كەزەڭدە جۇرگىزىلەدى:
14 ساۋىردەن 20 مامىرعا دەيىن; 30 مامىردان 30 ماۋسىمعا دەيىن; 10 شىلدەدەن 10 تامىزعا دەيىن; 20 تامىزدان 20 قىركۇيەككە دەيىن.