ۇلتتىق مۋزەيدە 1916 جىلعى تورعايداعى ۇلت-ازاتتىق كوتەرىلىسى قاھارمانى امانگەلدى يمانوۆتىڭ تۋعانىنا 150 جىل تولۋىنا وراي «حالىق باتىرى» اتتى كورمە ءوتىپ جاتىر.
بۇل كورمەگە قوستاناي وبلىستىق تاريحي-ولكەتانۋ مۋزەيى مەن ارقالىق قالاسىنداعى دالا ولكەسى تاريحى وبلىستىق مۋزەيى جانە امانگەلدى اۋدانىنداعى باتىر اتىنداعى مەموريالدىق مۇراجايىنان داڭقتى تۇلعانىڭ ومىرىنە قاتىستى ءبىراز جادىگەر اكەلىنگەن. سونداي قۇندى دۇنيەنىڭ ءبىرى – امانگەلدىنىڭ سەنىمدى سەرىگى, ايگىلى مەرگەن كەيكى باتىر اۋلەتىنىڭ كەبەجەسى. ونى ارقالىقتاعى دالا ولكەسى تاريحى وبلىستىق مۋزەيىنە نۇرالى ەربوسىنوۆ ەسىمدى ازامات سىيعا تارتقان.
كەبەجە – ساندىق سەكىلدى تاماق ساقتاۋعا ارنالعان جيھاز. ول ەلىمىزدىڭ بارلىق ايماعىندا كەزدەسەدى. جاساۋ ءتاسىلى مەن سىرتقى ءپىشىنى ۇقساس. تەك ولاردىڭ ەرەكشەلىگىن الدىڭعى بەتىن كوركەمدەۋ تاسىلىنەن بايقايسىز. باتىر ءۇيىنىڭ كەبەجەسى دە تاقتايدان جاسالعان. ماڭدايشاسى مەن ەسىگى قازاقى ويۋلارمەن ورنەكتەلگەن. تومەنگى سۋىرمانىڭ بەتىنە «1916 جىل» دەپ جازىلعان.
1916 جىلعى تورعايداعى ۇلت-ازاتتىق كوتەرىلىسىندە كەيكى كوكەمباي ۇلى مەرگەندەر جاساعىن باسقارىپ, ەرەن ەرلىكتىڭ ۇلگىسىن كورسەتتى. ەل ىشىندە «امانگەلدىنىڭ كوزى مەرگەن, كەيكىنىڭ قولى مەرگەن» دەگەن ءسوز بار. قوس باتىردىڭ ەرلىك جولى جۇرت جادىنان وشكەن ەمەس.