كەنەنىڭ تىم كوبەيىپ كەتۋىنەن كيىكتەر عانا ەمەس, ءىرى قارا دا قىرىلا باستاعان. ال جىلدا كيىكتەردىڭ قاپتاۋىنان ونسىز دا جاپا شەگىپ كەلە جاتقان شارۋالار بيىل تاسكەنەدەن قۇتىلۋدىڭ جولىن تاپپاي وتىر, دەپ حابارلايدى Egemen.kz Azattyq Ruhy سايتىنا سىلتەمە جاساپ.
باتىس قازاقستان وبلىسىنداعى بوكەي ورداسى, جانىبەك, كازتالوۆكا, جاڭاقالا سىندى اۋداندارداعى كيىك سانى بيىل تاعى ەكى ەسەگە كوبەيگەن. اقبوكەنمەن مال ورىستە بىرگە جايىلىپ ءجۇر. كيىكتەردە بيىل تاسكەنە قاپتاپ كەتكەن. ول ەندى جىلقى مەن سيىرعا جۇعىپ, شارۋالاردى اۋرە-سارساڭعا ءتۇسىرىپ جاتىر.
«كيىك كوبەيگەلى, تاسكەنە دە قاپتادى. قادالعان جەرىنەن قان سورىپ, جارىلعانشا تۇسپەيدى. مىنە, كيىكتىڭ پايداسى. بوسقا ءولىپ جاتىر. بىلتىر رەسمي ساناق بويىنشا تولدەگەنگە دەيىن ءبىز جاقتاعى كيىكتىڭ سانى 820 مىڭ ەدى. تولدەگەن سوڭ ولار كەمى ەكى ەسەگە كوبەيدى. ادەتتە ماڭىنا جولاتپايتىن دالانىڭ اقبوكەنى جۇرۋدەن قالىپ, ءولىپ جاتىر. تاسكەنەدەن ءبىز دە ابدەن زارداپ شەگىپ, قينالىپ كەلەمىز», دەيدى يساتاي سەيسەنعاليەۆ.
ونىڭ ايتۋىنشا, جايىلىمداعى مىڭعىرعان مالعا جابىسقان تاسكەنە اۋىلعا دا قاپتاعان. شارۋالار ونسىز دا كوكتەمنەن كوتەرەم بولىپ ارەڭ شىققان مال قانسورعىش تاسكەنەنى كوتەرە الماي جاتقانىن ايتادى. كەيبىر شارۋالار ورىستە جۇرۋدەن قالعان ءىرى قارانى قورادا قاماپ ۇستاۋعا ءماجبۇر. ويتكەنى, دالادا بىرگە جايىلىپ جۇرگەن كيىكتەگى تاسكەنە مالعا تەز جۇعادى.
«كەنەدەن تازارتۋدىڭ جولى – مالدى كۇپكىگە سالۋ. مەن كۇپكىگە توعىتاتىن ارنايى ورىن سالىپ الدىم. جىلقى مەن سيىردى دارىلەنگەن سۋعا تۇسىرەمىز. بىرنەشە مىڭ مالدى دارىلەۋ اۋىر ءارى ونىڭ شىعىنى دا از ەمەس. مىنە, كيىكتەر وسىلاي تاسكەنەدەن ءولىپ جاتىر. مالعا دا زيانى ءتيىپ, شارۋالار قينالىپ جاتىر. قازىر مەن ورىستەگى جىلقىلاردى كۇپكىگە سالىپ جاتىرمىن. مەملەكەت ءالى كۇنگە كيىكتىڭ ماسەلەسىن شەشە الماي كەلەدى. ونىڭ زيانىن باتىستاعى شارۋالار تارتىپ وتىر. جاقسىباي اۋىلى, كازتالوۆكا اۋداندارىنىڭ شارۋالارى تاسكەنەدەن قيىندىق كورىپ كەلەدى», دەدى قوجالىقتىڭ يەسى.