اعايىن اراسىنداعى التىن كوپىرگە اينالعان ابىسىنداردىڭ تاتۋلىعى مەن ىنتىماق-بىرلىگى ءتۇتىننىڭ ءتۇزۋ شىعۋىنا, ءىستىڭ ىلگەرىلەۋىنە سەپ. سوندىقتان دا حالقىمىزدا «ابىسىن تاتۋ بولسا – اس كوپ, اعايىن تاتۋ بولسا – ات كوپ» دەگەن دانالىق بار.
وسى ۇلتتىق ۇستانىمىمىزدى ۇرپاعىمىزدىڭ بويىنا ءسىڭىرىپ, سالت-ءداستۇرىمىزدى جاڭعىرتۋ ماقساتىندا جامبىل اۋدانى بەرىكتاس اۋىلىندا تۇراتىن اقسامايلى اجەلەردىڭ ۇيىتقى بولۋىمەن وتەتىن ءداستۇرلى ءىس-شارا جىل سايىن ءجىبىن ۇزبەي جالعاسىپ كەلەدى. وسى ۇردىسكە وراي, جۋىردا 160-قا جۋىق اۋىلداعى ابىسىندار جيىلىپ, ناۋرىز مەرەكەسىن اتاپ ءوتتى. بەرىكتاس اۋىلىنداعى بەكبولات بابادان تارايتىن جەتى تارماقتىڭ ۇرپاعى بۇگىندە 200-گە جۋىقتاپتى. اۋلەتتىڭ ەڭ ۇلكەن اناسى بەيسەنكۇل مەن بيكامال اپالار جاس كەلىندەرگە ومىردەگى كورگەن-بىلگەندەرى مەن ويعا تۇيگەندەرىن ايتىپ, اقىل-كەڭەستەرىن بەردى.
زەرلى كيمەشەگى جاراسقان اجەلەرىمىز «قاماجاي» ءبيىن بيلەسە, ىزىنەن ىلەسكەن جاس كەلىندەر حالىق اندەرىن شىرقاپ, مەرەكەنىڭ ءسان-سالتاناتىن ارتتىردى. قازان مەن قالامىن تەڭ ۇستاپ, قارا ولەڭگە جۇيرىك ونەرلى كەلىندەر جۇرەكتەن شىققان جىرلارىن وقىپ, كوپتىڭ قوشەمەتىنە بولەندى.
– «ابىسىن اسى» وسى كۇنى ۇمىت بولا باستادى. ۋىستا ۇستاتپايتىن ۋاقىتتىڭ تاپشىلىعىنان ءبىر-ءبىرىن ايلاپ ەمەس, جىلداپ كورمەيتىن جاعدايعا جەتتىك. قازاقتا «بارماساڭ, كەلمەسەڭ جات بولاسىڭ» دەپ بەكەر ايتپاعان. ابىسىن ارالاسپاي, تاتۋلىعىنا سىزات تۇسسە, اعايىننىڭ اراسى الشاقتايدى. بىرگە تۋعان بالالار ءبىر-بىرىنە جاتقا اينالادى. سوندىقتان وسى بەرەكە-بىرلىگىمىزدىڭ باستاۋى بولار ءداستۇرىمىزدى جاس كەلىندەر جالعاستىرادى دەگەن ۇمىتتەمىز, – دەگەن ابىسىندار باسقوسۋىنىڭ باستاماشىسى, زەينەتكەر ۇستاز التىنكۇل قيلىباەۆا اق باتاسىن بەردى.
الماتى وبلىسى