قر ەنەرگەتيكا مينيسترلىگى, «قازمۇنايگاز», «Petrosun» جقس جەلىلەرى وكىلدەرىنىڭ قاتىسۋىمەن كەڭەس ءوتتى. جيىن بارىسىندا الماتى وبلىسىنداعى ديزەل تاپشىلىعى ماسەلەسى تالقىلاندى, دەپ حابارايدى Egemen.kz.
مينيسترلىك وكىلدەرى حابارلاعانداي, قازىر الماتى وبلىسىنداعى ديزەل وتىنىنىڭ قورى 11 مىڭ توننادان اسادى. جانارماي قۇيۋ ستانتسيالارى ۇسىنعان دەرەكتەرگە قاراعاندا, بۇگىندە وبلىستاعى ديزەل كولەمى قاجەتتىلىكتى جابۋ ءۇشىن جەتكىلىكتى.
دەگەنمەن, جقس جەلىلەرىنىڭ اقپاراتى بويىنشا بۇگىن ديزەل وتىنىنا دەگەن سۇرانىس 30% استام مولشەرگە ارتقان. سونىڭ سالدارىنان كەيبىر جانارماي قۇيۋ بەكەتتەرىندە وتىننىڭ تاۋلىكتىك كولەمى تەز تاۋسىلىپ قالعان.
مينيسترلىك وكىلدەرىنىڭ ايتۋىنشا, وڭىرگە ديزەلدىڭ قوسىمشا كولەمى جونەلتىلەدى.
«سوندىقتان جەلىلەر باسشىلىعى وتىندى كوپ تۇتىناتىن اۋداندارعا تيەپ-جونەلتۋدى ارتتىرۋ تۋرالى شەشىم قابىلدادى. سونىمەن قاتار اتىراۋ مۇناي وڭدەۋ زاۋىتى جانە پاۆلودار مۇناي-حيميا زاۋىتىنان 5 000 توننا وتىن جونەلتىلدى. «قازاقستان تەمىرجولى كومپانياسى» ۋاقتىلى تاسىمالداۋدى قامتاماسىز ەتەدى», دەلىنگەن ۆەدومستۆو حابارلاماسىندا.
بۇعان دەيىن شىمكەنت مۇناي وڭدەۋ زاۋىتى جوندەۋ جۇمىستارىنا بايلانىستى جابىلعان ەدى. دەگەنمەن ول بۇگىن جۇمىسىن قايتا باستادى. اتالعان زاۋىتتا وڭدەلگەن مۇناي ونىمدەرىنىڭ العاشقى لەگى دەمالىس كۇندەرى جونەلتىلەدى.
«بۇل رەتتە الماتى وبلىسىن قوسا العاندا, وڭتۇستىك وڭىرلەرگە ءبىرىنشى كەزەكتە جونەلتۋ قامتاماسىز ەتىلەدى. سونداي-اق الماتى وبلىسىنىڭ اۋىل شارۋاشىلىعى تاۋارىن وندىرۋشىلەرىنە قوسىمشا 3 مىڭ توننا ديزەل وتىنى بولىنەتىن بولادى», دەلىنگەن حابارلامادا.