24 مامىر – 24 ماۋسىم ارالىعىندا اقتاۋدا ءحىى جازعى قر جوعارى وقۋ ورىندارى ستۋدەنتتەرىنىڭ ۋنيۆەرسياداسى وتەدى, دەپ حابارلايدى Egemen.kz.
بيىلعى ۋنيۆەرسيادا قر عىلىم جانە جوعارى بىلىم مينيسترلىگىنىڭ قولداۋىمەن, Yessenov University ۇيىمداستىرۋىمەن العاش رەت وتكىزىلمەك.
ۇيىمداستىرۋشى ۋنيۆەرسيتەت پرەزيدەنتى ب.ب.احمەتوۆتىڭ ايتۋىنشا, بۇرىنعى ۋنيۆەرسيادالار سپورت تۇرلەرى بويىنشا ءۇش-ءتورت قالانى قامتيتىن بولسا, Aqtau-2023 ۋنيۆەرسياداسىندا 17 سپورت تۇرىنەن 20 جارىستىڭ ءبارى اقتاۋدا قالاسىندا وتەدى.
«سونىمەن قاتار الدىڭعى ۋنيۆەرسيادا باعدارلاماسىندا 30-دان اسا سپورت ءتۇرى بولسا, قازىر ولار 17-گە دەيىن ىقشامدالىپ, ەڭ نەگىزگى سپورت تۇرلەرى عانا تاڭدالعان. ياعني ۋنيۆەرسيتەتتەردەگى سپورتشىلاردىڭ كوپ اينالىساتىن سپورت تۇرلەرىنىڭ بەيىنىنە قاراي, ۇلتتىق عىلىمي-پراكتيكالىق دەنە تاربيەسى ورتالىعىمەن بىرلەسە وتىرىپ, دۇنيەجۇزىلىك ۋنيۆەرسيادانىڭ باعدارلاماسىنا باسىمدىق بەرىلىگەن», دەلىنگەن مينيسترلىك حابارلاماسىندا.
جارىس تۇرلەرىن ۇيىمداستىرۋ بويىنشا:
سامبو, گرەك-ريم كۇرەسى, دزيۋدو جانە ەركىن كۇرەس, جەڭىل اتلەتيكا تۇرلەرى «ماڭعىستاۋ-ارەنا» سپورت سارايىندا وتەدى.
باسكەتبول, ۆولەيبول, فۋتزال مەن بوكس «حالىق-ارەنا» سپورت سارايىندا وتەدى. بۇل ورتالىقتا تەننيس جانە بادمينتون سايىستارىن ۇيىمداستىرۋعا دا مۇمكىندىك بار.
«ارىستان-ارەنا» سپورت كەشەنىندە ءجۇزۋ, ال قالعان سپورت تۇرلەرى Yessenov Sport Club ستۋدەنتتىك كەشەنىندە وتەدى.
ۋنيۆەرسيادانىڭ اشىلۋ سالتاناتى 5 ماۋسىم كۇنى «مۇنايشى» ستاديونىندا جانە جابىلۋ سالتاناتى 24 ماۋسىم كۇنى «ماڭعىستاۋ-ارەنا» سپورت كەشەنىندە وتەدى.