مەملەكەت باسشىسى الداعى 5 جىلدىڭ ەل ءۇشىن ەڭ ماڭىزدى كەزەڭ ەكەنىن ايتتى, دەپ حابارلايدى Egemen.kz.
قاسىم-جومارت كەمەل ۇلى ناقتى باسىمدىقتارعا ءمان بەرۋدى تاپسىردى.
«ناقتى باسىمدىقتار فورماتىندا جۇمىس ىستەۋ كەرەك. اسا ماڭىزدى ماسەلەلەردى دەرەۋ شەشۋ قاجەت. بىراق كەيبىر ماسەلەنى كەيىنگە قالدىرۋعا, ال بىرقاتارى بويىنشا الداعى شەشىمدەردىڭ تەك جوباسىن بەلگىلەۋگە تۋرا كەلەدى. ايتپەسە, ەڭبەگىمىز زايا كەتەدى جانە قولدا بار رەسۋرستارىمىزدى سارقىپ الامىز», دەدى پرەزيدەنت.
سونىمەن قاتار مەملەكەت باسشىسى الداعى 5 جىلدىڭ ماڭىزدى كەزەڭ بولاتىنىن اتاپ ءوتتى. سوندىقتان دا ءبىرشاما وزگەرىستەر قاجەت ەكەنىن ايتتى.
«الداعى بەس جىل ەل تاعدىرى شەشىلەتىن ماڭىزدى كەزەڭ بولماق. ەلىمىزدى قارقىندى دامىتۋ ءۇشىن ساپالى زاڭنامالىق بازا قالىپتاستىرۋ كەرەك. ول ءۇشىن ەكونوميكاعا قاجەتتى ەرەجەلەر مەن قاعيدالاردى وزگەرتۋ قاجەت», دەدى ول.
ماڭىزدى وزگەرىستەر ءۇشىن قازىردىڭ وزىندە قادام جاسالعانىن ايتىپ, بەت العان باعىتتان جاڭىلماۋ كەرەگىن اتاپ ءوتتى.
«بۇل باعىتتا العاشقى قادامدار جاسالدى. مونوپوليادان ارىلتۋ جانە ەلىمىزدەن زاڭسىز شىعارىلعان كاپيتالدى قايتارۋ جۇمىستارى جۇرگىزىلىپ جاتىر. بۇل ەلىمىزگە ورنىقتى, باسەكەگە قابىلەتتى ءىرى بيزنەس كەرەك ەمەس دەگەندى بىلدىرمەيدى. كەرىسىنشە, قاجەت ەكەنى ءسوزسىز جانە ءبىز ونى قولدايمىز. ءىرى بيزنەس ءبىزدىڭ جاڭا ەكونوميكالىق پاراديگمادا جاڭاشا جۇمىس ىستەي باستايدى ءارى مىندەتتى تۇردە داميدى. جالپى اشىق ءارى ءوزىن-ءوزى قامتاماسىز ەتەتىن نارىقتىق ەكونوميكا قالىپتاستىرۋ باستى باسىمدىق بولىپ قالا بەرەدى», دەدى مەملەكەت باسشىسى.