جاس فۋتبولشىلاردىڭ الاشقا قۇرمەتى

«Qazaq qazetteri»-ءنىڭ قولداۋىمەن وتكەن تۋرنيرگە 2012 جىلى دۇنيەگە كەلگەن بالالاردان قۇرالعان ون كوماندا قاتىستى.

جارىستىڭ ءبىر ەرەكشەلىگى, تۋرنيرگە قاتىسقان بارلىق كومانداعا جۇلدە ۇيلەستىرىلدى. ەرەجەگە ساي «ا» توبى مەن «ۆ» توبىنىڭ جەڭىمپازدارى «التىن كۋبوك» ءۇشىن, توپتان ەكىنشى ورىن العاندار «كۇمىس كۋبوك» ءۇشىن, ال ءۇشىنشى ورىن العان كوماندالار «قولا كۋبوك» ءۇشىن تالاسقا ءتۇستى.

– Alash-CUP ءتۋرنيرىنىڭ اتاۋىنىڭ وزىندە ۇلكەن ءمان-ماعىنا جاتىر. جارىسقا قاتىسىپ جاتقانداردىڭ بارلىعى دا الاش ۇرپاقتارى. مەنىڭ ۇلدارىم دا وسى تۋرنيردە دوپ تەۋىپ ءجۇر. مۇنداي جارىس جاستارعا كەرەك. سوندىقتان باستاۋ العان Alash-CUP ءتۋرنيرىنىڭ عۇمىرى ۇزاق بولسىن جانە جارىسقا قاتىسىپ جاتقان بالالاردى قۇتتىقتايمىن, – دەدى «National Geographic Qazaqstan» جۋرنالىنىڭ ديرەكتورى ايبىن شاعالاق.

ءۇش كۇنگە سوزىلعان دودادا كۋبوك جەڭىمپازدارى انىقتالدى. «قولا كۋبوك» ءۇشىن وتكەن فينالدىق ايقاستا شىمكەنتتىڭ Namys-2 كومانداسى El Clasico-دان 1:0 ەسەبىمەن باسىم ءتۇسىپ, چەمپيون اتانسا, «كۇمىس كۋبوكتىڭ» جەڭىمپازى Dream team جانە Commandos اراسىندا انىقتالدى. ناتيجەسىندە, قارسىلاس كومانداعا ءبىر گول سوققان Dream team «كۇمىس كۋبوكتىڭ» يەگەرى بولدى. ال رەسپۋبليكالىق جانە حالىقارالىق جارىستاردا جۇلدە الىپ جۇرگەن Namys پەن Aibyn كوماندالارى «التىن كۋبوكتىڭ» فينالىندا كەزدەستى. بۇل كەزدەسۋ جانكۇيەر بولىپ كەلگەن اتا-انالاردىڭ جادىندا ۇزاق ەستە قالارى انىق. سەبەبى 40 مينۋت بويى ەكى كوماندا دا الما-كەزەك شابۋىلداۋمەن بولدى. ايت­كەنمەن, ءوز مۇمكىندىكتەرىن ءمۇلت جىبەر­مەگەن شىمكەنتتىڭ Namys كومانداسى ايبىن­دىقتارعا جاۋاپسىز ءۇش گول سوعىپ ءتۋرنيردىڭ باستى جۇلدەسىن جەڭىپ الدى. سونداي-اق توپتان شىعا الماعان كوماندالار بىردەن قولا مەدالمەن ماراپاتتالدى.

– مۇنداي جوعارى دەڭگەيدەگى جارىس­ ءجيى ۇيىمداستىرىلسا دەيمىز. سەبەبى قىس مەزگىلىن ايتپاعاننىڭ وزىندە كوكتەم كەزىندە فۋتبولدان بالالار ءتۋرنيرى ۇيىمداستىرىلا بەرمەيدى. اسىرەسە سول­تۇستىك ايماقتاردا جارىس تىم از وتكىزىلەدى. دوپتى سەرىك ەتكەن بالالار دەڭگەيىنىڭ وسۋىنە Alash-CUP ءتۋرنيرى ءوز پايداسىن تيگىزدى دەپ ويلايمىن. ءۇش كۇن بويى بالالار ءۇشىن مەيرام بولدى. قاتىسقان بارلىق ون كومانداعا مەدال بەرىلگەن بىردەن-ءبىر جارىس دەسەم, قاتە ايتپاعان بولار ەدىم, – دەدى ءتۋرنيردىڭ باس تورەشىسى سانجار سۇلتانقۇلوۆ.

اتالعان تۋرنيردە «ەڭ ۇزدىك قاقپاشى», «ەڭ ۇزدىك قورعاۋشى», «ەڭ ۇزدىك شابۋىل­شى», «ەڭ ۇزدىك ويىنشى», «ەڭ مادە­نيەتتى ويىنشى», «ەڭ جاس فۋتبولشى», «ۇزدىك گولدىڭ اۆتورى», «ەڭ ۇزدىك جاتتىقتىرۋشى» اتالىمى بويىنشا دا فۋتبولشىلار مەن جاتتىقتىرۋشىلار ماراپاتتالدى.