فۋتزالدان جاستار اراسىنداعى (U-19) ەۋروپا بىرىنشىلىگىنىڭ ىرىكتەۋ ءتۋرنيرى ەل قۇراماسى ءۇشىن ءساتسىز اقتالدى.
«ا» توبىندا ونەر كورسەتكەن جەرلەستەرىمىز بۇعان دەيىن پولشادان (2:3) ۇتىلىپ, مولدوۆادان (5:2) باسىم تۇسكەن ەدى. سلوۆەنياعا قارسى وتكەن سوڭعى ويىندا بىزگە دە, قارسىلاستارىمىزعا دا جەڭىس اۋاداي قاجەت ەدى. سول سەبەپتى دە كوپشىلىك الداعى باسەكە اسا شيەلەنىستى وتەدى دەپ توپشىلادى. الايدا ولاي بولمادى. ءبىزدىڭ جىگىتتەرگە قاراعاندا ەۋروپالىقتار كيشەنەۆتەگى كەزدەسۋگە وتە جاقسى دايارلىقپەن كەلگەن ەكەن. اسا ماڭىزدى ماتچتا سلوۆەنيا قۇراماسى ءبىزدىڭ قاقپاعا جاۋاپسىز بەس دوپ سوقتى. اتاپ ايتساق, الەن رۋيس حەت-تريك جاساسا, لاۆرو شكرينيار ءدۋبلدىڭ اۆتورى اتاندى.
وسىلايشا, پاۋلو ريكاردو كاكا باپتاعان قازاقستاننىڭ جاستار قۇراماسى كەلەسى جىلى وتەتىن ەۋروپا بىرىنشىلىگىنە قاتىسۋ مۇمكىندىگىنەن ايىرىلدى.