«بۋراباي» مەملەكەتتىك ۇلتتىق تابيعي پاركىنىڭ ينسپەكتورلارى ششۋچە-بۋراباي كۋرورتتىق ايماعىنداعى كولدەردىڭ بەتىندەگى مۇزدى تازالاپ, 3 توننادان استام قوقىس جينادى, دەپ حابارلايدى Egemen.kz.
«تازا مۇز» اكتسياسى اياسىندا ۇلتتىق پارك قىزمەتكەرلەرى بالىقشىلار مەن تۋريستەر قالدىرعان قوقىس كۇن جىلىعان كەزدە سۋعا تۇسپەۋى ءۇشىن كول بەتىندەگى مۇزدى تازالاپ, دەمالۋشىلارعا پروفيلاكتيكالىق اڭگىمە جۇرگىزەدى.
بۋراباي, ششۋچە جانە كىشى شاباقتى كولدەرىنىڭ بەتىندەگى مۇزايدىندى تازارتۋ اكتسياسى سوڭعى رەت بيىل 24 ناۋرىزدا ءوتىپ, وعان بۋراباي, اقىلباي, بارماشى ورمان شارۋاشىلىقتارىنىڭ 45 ينسپەكتورى مەن جەرگىلىكتى اۋەسقوي بالىقشىلار قاتىستى. 35 كگ-نان استام قوقىس جينالدى.
– ۇلتتىق ساياباق كولدەرىنىڭ يحتيوفاۋناسى بيىل قىستى قالىپتى وتكىزدى. جۇكەي مەن قوتىركولدەن باسقا كولدەردە ەرىگەن وتتەگى دەڭگەيى تومەندەپ, اەراتسيا شارالارى جۇرگىزىلدى. ۇلتتىق پاركتىڭ ينسپەكتورلارى سۋدى وتتەگىمەن قانىقتىرۋ ءۇشىن 12 رەت ويىق ويدى. قازىر جاعداي تۇراقتى. كوكتەم جاقىن قالعاندىقتان, ينسپەكتورلار بالىق ۋىلدىرىق شاشاتىن, سۋدا جۇزەتىن جانە سۋ ماڭىن مەكەندەيتىن قۇستاردىڭ ۇيا سالاتىن جەرلەرىن قورعاۋعا كوڭىل بولە باستادى. «تازا مۇز» اكتسياسىن وتكىزۋ داستۇرگە اينالعان, وعان ۇلتتىق پارك قىزمەتكەرلەرىمەن قاتار, جەرگىلىكتى اۋەسقوي بالىقشىلار, دەمالۋشىلار, جەرگىلىكتى تۇرعىندار اتسالىسادى. بارشاڭىزدى وسىلاي قورشاعان ورتانى تازالاۋعا شاقىرامىز! – دەيدى ينجەنەر يحتيولوگ ماكسيم پاك.
«بۋراباي» ۇلتتىق پاركى ۇجىمى 23 كولدىڭ ەكولوگياسىن باقىلايتىنىن ايتا كەتەيىك. ولاردىڭ ىشىندەگى ەڭ ءىرى بەسەۋى – ششۋچە, بۋراباي, ۇلكەن جانە كىشى شاباقتى, قوتىركول كولدەرىنىڭ مۇز جامىلعىسىنىڭ اۋدانى 10,5 مىڭ گەكتاردان اسادى.