ەلوردادا ەقىۇ دەموكراتيالىق ينستيتۋت پەن ادام قۇقىعى بيۋروسى ەلىمىزدە وتكەن ءماجىلىس جانە ءماسليحات سايلاۋىنا قاتىستى الدىن الا قورىتىندىسىمەن ءبولىستى. سونداي-اق بيۋرو ساياسي دوداعا قاتىستى ەسەبىن باياندادى.
ەقىۇ-نىڭ سايلاۋلاردى بايقاۋ جونىندەگى قىسقامەرزىمدى ميسسيانىڭ ارناۋلى ۇيلەستىرۋشىسى ءارى جەتەكشىسى يرەن چارالامبيدەستىڭ ايتۋىنشا, وتكەن سايلاۋدا ساياسي باسەكەلەستىك بايقالعان.
«سوڭعى 13 جىل بويى قازاقستانداعى سايلاۋلاردى تۇراقتى بايقاپ كەلەمىز. ءبىز ءوزىمىزدى قازاقستاننىڭ دوستارى ءارى سەرىكتەستەرى رەتىندە سەزىنەمىز. جانە دە وسىناۋ تاماشا ەلگە جاردەم كورسەتۋ مىندەتتەمەسىن الدىق. كەشە 300-دەن استام بايقاۋشىمىز بۇكىل ەل بويىنشا جۇمىس ىستەدى. ولاردىڭ جۇمىسىنىڭ نەگىزىندە جانە ۇزاقمەرزىمدى بايقاۋشىلاردىڭ پىكىرىنە سۇيەنە وتىرىپ, نەگىزگى قورىتىندىلاردى جاريا ەتپەكپىن», دەدى ي.چارالامبيدەس.
شەتەلدىك بايقاۋشىنىڭ سوزىنە سۇيەنسەك, ەلىمىزدە جۇرگىزىلگەن رەفورمالار قازاقستاندى حالىقارالىق ستاندارتتارعا جانە ەقىۇ مىندەتتەمەلەرىنە ساي سايلاۋ وتكىزۋگە جاقىنداتۋعا ءتيىس.
«قازاقستاننىڭ نورماتيۆتىك-قۇقىقتىق بازاسى دەموكراتيالىق ينستيتۋتتار جانە ادام قۇقى بيۋروسىنىڭ بۇعان دەيىنگى ۇسىنىمدارىن ەسكەرە وتىرىپ, بىرقاتار وزگەرىسكە ۇشىرادى. سايلاۋشىلار ءۇشىن وزگەرتۋلەر ەنگىزىلىپ, تاڭداۋ مۇمكىندىگى كەڭەيتىلدى», دەدى يرەن چارالامبيدەس.
ەقىۇ پارلامەنتتىك اسسامبلەياسى دەلەگاتسياسىنىڭ جەتەكشىسى رەينحولد لوپاتكانىڭ ايتۋىنشا, داۋىس بەرۋشىلەردىڭ جالپى سانى از ەكەنى بايقالعان. ۇيىم بايقاۋشىلارى وزدەرى بارعان ۋچاسكەلەردە ادام قاراسى سيرەك بولعانىن مالىمدەگەن.
«بولاشاقتا ءاربىر سايلاۋ ۋچاسكەسىنىڭ ناتيجەلەرىن جاريالاۋ اشىقتىق پەن حالىقتىڭ سەنىمىن ارتتىرۋ ءۇشىن ماڭىزدى بولماق», دەدى ر.لوپاتكا.
وسى ورايدا, ءوزىن-ءوزى ۇسىنعان كەيبىر كانديداتتار ءۇشىن كانديدات رەتىندە تىركەلۋ ەرەجەلەرى قيىنعا سوققانىنا نازار اۋداردى. ماسەلەن, كانديداتتار 1 ميلليون تەڭگە كولەمىندە كەپىلدىك جارنا تولەۋى كەرەك ەدى. بۇل ساياسي پارتيالاردان قولداۋ تاپپاعان كوپتەگەن كانديدات ءۇشىن ايتارلىقتاي مول سوما.
«جالپى, سايلاۋ ۇدەرىسىنە قاتىسۋشىلار بەلسەندى ناۋقان جۇرگىزدى. ەڭ كورنەكتىسى «Amanat» پارتياسى بولدى, اۋىلدىق جەرلەردە سايلاۋالدى قىزمەتتىڭ كورىنۋى تومەن بولدى. پارتيالىق پلاتفورمالار مەن جولداۋلار الەۋمەتتىك جانە ەكونوميكالىق ماسەلەلەردىڭ كەڭ اۋقىمىن قاراستىردى, بىراق پرەزيدەنتتىڭ رەفورمالىق كۇن ءتارتىبىن تۇتاستاي قولدادى. ناۋقان اناعۇرلىم سەرپىندى بولدى جانە نەگىزگى قالالار مەن ونلاين رەجىمىندە ماجوريتارلىق جارىستاردىڭ بەلسەندى وتۋىنە ىقپال ەتتى, كەيبىر ءوزىن-ءوزى ۇسىنعان كانديداتتار بالاما باعدارلامالاردى ۇسىندى. جالپى, كانديداتتار ورىن-جايلاردان تىس اشىق ميتينگتەر وتكىزۋدەن اۋلاق بولدى, كەي جاعدايلاردا جەرگىلىكتى بيلىك مۇنداي شارالاردى وتكىزۋگە رۇقسات بەرمەدى. دياقب/سبم ەشبىر كەمسىتۋشىلىك ريتوريكا, سونىڭ ىشىندە ۇلتتىق ازشىلىقتارعا قاتىستى جاعدايلار تۋرالى اقپارات العان جوق جانە بايقاعان جوق.
سونداي-اق پارلامەنتتەگى ورىنداردى ءبولۋ كەزىندە قولدانىلاتىن ايەلدەرگە, جاستارعا جانە قازىر مۇگەدەكتەرگە ارنالعان 30 پايىزدىق ارالاس كۆوتا بار. ايەلدەر پروپورتسيونالدى سايلاۋدا ۇمىتكەرلەردىڭ 29 پايىزىن, ماجوريتارلىق سايلاۋدا 20 پايىزىن كورسەتتى. پارتيانىڭ تانىمال ايەلدەر كانديداتتارىن العا جىلجىتۋ ارەكەتتەرى شەكتەۋلى بولعانىمەن, بىرقاتار تانىمال ايەل كانديدات رەتىندە ءوزىن-ءوزى ۇسىندى», دەپ ايتىلادى ەقىۇ دەموكراتيالىق ينستيتۋت پەن ادام قۇقىعى بيۋروسى مالىمدەمەسىندە.