ۇلىتاۋ وبلىسىندا پارلامەنت ءماجىلىسى جانە بارلىق دەڭگەيدەگى ءماسليحاتتار دەپۋتاتتارىنىڭ سايلاۋىن وتكىزۋگە 134 سايلاۋ ۋچاسكەسى جۇمىلدى. جالپى, وبلىستا 140 مىڭ سايلاۋشى تىركەلگەن. ونىڭ شامامەن 40 پايىزى وبلىس ورتالىعى جەزقازعاندا تۇرادى.
ال جەزقازعانداعى سايلاۋ ۋچاسكەسىنىڭ سانى – 33. وڭىردە دە سايلاۋ ۋچاسكەلەرى تاڭعى جەتىدە جۇمىسىن باستادى. ايماقتا داۋىس بەرۋ قۇقىعىن ەندى يەلەنگەن جاستار دا, نەكە قيعان جاس جۇبايلار دا, ەلگە ۇلگى-ونەگە بولىپ جۇرگەن قاريالار دا سايلاۋعا بەيجاي قاراعان جوق. مىستى شاھاردا دا حالىق بەلسەندىلىك تانىتتى. ءتىپتى ۇلتتىق كيىم كيىپ كەلىپ, داۋىس بەرگەندەردىڭ قاراسى كوپ بولدى. ايتالىق, جەزقازعاندا ون سەگىزگە تولعان 209 جاس تۇڭعىش رەت سايلاۋعا قاتىستى. 100 جاستان اسقان 3 قاريانىڭ دا داۋىسى ەسەپكە الىندى. سونىڭ ءبىرى – عاسىر جاساعان ايتقۇرمان قۇرمانباەۆ اقساقال. ايتقۇرمان قاريا – 8 بالاسىنان 35 نەمەرە, 40 شوبەرە, 10 شوپشەك سۇيگەن ابىز.
«مەن بالالارعا, اعايىن-تۋىسقا حابارلاسىپ, داۋىس بەرۋ قاجەتتىگىن ەسكەرتتىم. مەملەكەتىمىزدى بيىككە كوتەرۋ ءۇشىن ۇلەس قوسىڭدار دەپ ايتىپ جاتىرمىن. ەلىمىزدىڭ بەدەلى ارتىپ, بۇكىل الەمگە تانىلا ءتۇسۋىن قالايمىن. بار تىلەۋىم سول», دەدى ايتقۇرمان قۇرمانباەۆ.
ۇلىتاۋ وبلىسىنىڭ اكىمى بەرىك ابدىعالي ۇلى دا جەزقازعانداعى №24 جالپى ءبىلىم بەرەتىن مەكتەپتىڭ عيماراتىندا ورنالاسقان №213 سايلاۋ ۋچاسكەسىندە داۋىس بەردى. ءوڭىر باسشىسى بۇل وقيعانىڭ ماڭىزدىلىعىن اتاپ ءوتىپ, ازاماتتىق ۇستانىمىن بەلسەندى كورسەتكەنى ءۇشىن وبلىس تۇرعىندارىنا العىسىن ءبىلدىردى.
ال ساتباەۆ قالاسىنداعى №286 سايلاۋ ۋچاسكەسىندە داۋىس بەرگەن قالا تۇرعىنى عالىم توعانوۆ داۋىس بەرۋ ءار ازاماتتىڭ ەل الدىنداعى مىندەتى دەيدى.
– بۇگىن جۇبايىمىز ەكەۋمىز كەلىپ داۋىس بەردىك. سايلاۋعا ءاربىر ازامات جاۋاپكەرشىلىكپەن قاراۋعا ءتيىس. بۇل ەلىمىزدىڭ دامۋىنا قوسقان ۇلەس بولماق. ەلىمىز وركەندەي بەرسىن. داۋىس بەرگەن ۇمىتكەرگە زور سەنىم ارتامىز, – دەيدى عالىم توعانوۆ.
جاڭادان شاڭىراق كوتەرگەن بەيبارىس ارىستانبەكوۆ پەن ارۋجان امانبەكوۆا دا №302 سايلاۋ ۋچاسكەسىنە كەلىپ داۋىس بەردى.
– بۇگىن – ەلىمىز ءۇشىن ەڭ ماڭىزدى كۇن. شاڭىراعىمىزدىڭ وسى ساياسي اتاۋلى كۇنمەن تۇسپا-تۇس كەلىپ, كوتەرىلگەنىنە قۋانىشتىمىز. ءار ازاماتتىڭ سايلاۋعا قاتىسىپ, داۋىس بەرۋى – ازاماتتىق بورىشى. سوندىقتان دا قازىر تويىمىز بولاتىنىنا قاراماستان داۋىس بەرۋگە ارنايى كەلدىك, – دەيدى جاس جۇبايلار.
ايتپاقشى, ۇلىتاۋ وبلىسىندا سايلاۋ كۇنى 10 نارەستە دۇنيە ەسىگىن اشتى. ولاردىڭ بەسەۋى – ۇل, بەسەۋى – قىز. نارەستەلەردىڭ 9-ى – جەزقازعاندا, 1-ەۋى ساتباەۆ قالاسىندا ومىرگە كەلگەن.
ۇلىتاۋ وبلىسى