كەشە پارلامەنت ءماجىلىسى مەن ءتۇرلى دەڭگەيدەگى ءماسليحاتتار سايلاۋى وتكەنى بەلگىلى. وعان ءتۇسىپ جاتقان پارتيالار باسشىلارى دا ءوز تاڭداۋلارىن جاسادى.
«Amanat» پارتياسىنىڭ توراعاسى ەرلان قوشانوۆ استاناداعى «قازاقستان تەمىر جولى» ۇلتتىق كومپانياسىنىڭ عيماراتىندا ورنالاسقان №110 سايلاۋ ۋچاسكەسىندە ءوز تاڭداۋىن جاسادى. ول تەك دەموكراتيالىق ءادىل سايلاۋ ناتيجەسىندە جانە جاستاردىڭ ساياسي ارەناعا ەركىن, كەدەرگىسىز كەلۋى ارقىلى عانا كەمەل قوعام قالىپتاساتىنىن اتاپ ءوتتى.
«سايلاۋ جوعارى دەڭگەيدە ۇيىمداستىرىلىپ وتىر. حالىق وتە بەلسەندى. ءبىز ۇگىت-ناسيحات ناۋقانى اياسىندا ەلىمىزدىڭ بارلىق ءوڭىرىن ارالاپ, ازاماتتاردىڭ ساياسي ومىرگە ارالاسۋعا دەگەن قىزىعۋشىلىعى ارتقانىنا كوز جەتكىزدىك. بۇگىندە اركىمنىڭ ءوز تاڭداۋىن جاساپ, ەل بولاشاعى ءۇشىن داۋىس بەرگەنى ماڭىزدى», دەدى ەرلان قوشانوۆ جۋرناليستەردىڭ سۇراعىنا جاۋاپ بەرە وتىرىپ.
«اۋىل» پارتياسىنىڭ توراعاسى ءالي بەكتاەۆ ەلوردانىڭ №113 سايلاۋ ۋچاسكەسىندە داۋىس بەردى. پارتيا جەتەكشىسى سايلاۋعا وتباسىمەن بىرگە كەلدى.
ال «Respublica» پارتياسىنىڭ توراعاسى ايداربەك قوجانازاروۆ استاناداعى №393 سايلاۋ ۋچاسكەسىندە داۋىس بەردى.
«بۇل سايلاۋ ءبىز ءۇشىن بەنەفيس دەۋگە بولادى. ءبىز ەلىمىزدىڭ, ۇرپاعىمىزدىڭ تاعدىرى مەن ءومىرىن قولعا الدىق. بۇل سايلاۋ تەك پارتيا ءۇشىن ەمەس, ءبىزدىڭ ۇرپاق ءۇشىن ماڭىزدى. بۇل سايلاۋدان كۇتەتىن وزگەرىستەرگە كەلسەك, بيۋدجەتتىڭ ءادىل بولىنۋىنە, حالىقتى شىن مانىندە الاڭداتاتىن زاڭداردىڭ قابىلدانۋىنا اسەر ەتكىمىز كەلەدى. مىسالى, قازاقستاندا مىڭ ءبىر ماسەلە بار, بىراق ءبىز مىڭ ءبىرىنشى ماسەلەنى تالقىلاۋعا الامىز. تۇكىرۋ تۋرالى زاڭدى الايىق. بۇل زاڭنان بىردە-ءبىر قازاقستاندىق باقىتتى جانە تابىستى بولىپ كەتپەدى, بىراق نەگە ەكەنى بەلگىسىز, ۋاقىتتى بوسقا وتكىزىپ جاتىرمىز. ۋاقىتىمىز وتە از. 30-50 جىلعا عانا جەتەتىن مۇناي قالدى, وسى جىلدار ىشىندە ءبىز بالالارىمىز بەن نەمەرەلەرىمىز مۇناي مەن گازدان تاۋەلسىز, گۇلدەنگەن ەلدە ءومىر ءسۇرۋى ءۇشىن بار كۇشىمىزدى سالۋىمىز كەرەك. بۇرىنعى پارلامەنت مۇشەلەرىنىڭ كوپشىلىگى 30-50 جىلدان كەيىن بولمايتىنىن تۇسىنەمىز, بىراق ءبىز بۇعان مۇددەلىمىز», دەدى ا.قوجانازاروۆ.
«اق جول» دەموكراتيالىق پارتياسىنىڭ توراعاسى ازات پەرۋاشەۆ ەلورداداعى №122 سايلاۋ ۋچاسكەسىندە داۋىس بەردى. «سايلاۋدان ادىلەتتى قازاقستاندى كۇتەمىز. مەنىڭ ويىمشا, 20 جىل بويى مۇنداي اشىق ءارى اۋقىمدى سايلاۋ ناۋقانى بولماعان شىعار. ەگەر ءبىزدىڭ قوعام مەن مەملەكەت بۇل قارقىندى باسەڭدەتپەي, اشىق ديالوگتى جالعاستىرا بەرسە, وندا شىنىمەن دە ءبىزدىڭ ءومىرىمىز جاقسارادى, سونىمەن قاتار بۇل قادامدار ادىلدىككە باعىتتالعان وزگەرىستەردىڭ باسى بولماق», دەدى ا.پەرۋاشەۆ.
«بايتاق» جاسىلدار پارتياسىنىڭ توراعاسى ازاماتحان امىرتاەۆ استاناداعى №92 مەكتەپ-ليتسەيىندە ورنالاسقان №52 ۋچاسكەدە ءوز تاڭداۋىن جاسادى. «تاڭنان بەرى حالىقتىڭ بەلسەندىلىگى بايقالادى. بۇل – جاقسى ءۇردىس. بۇل سايلاۋ ءادىل وتەتىنىنە سەنىمدىمىن. بۇل جەردە ەڭ باستى ماسەلە – حالىقتىڭ سەنىمى. حالىق كىمگە سەنىم ارتسا, سولار دەپۋتات بولىپ, مەملەكەت يگىلىگىنە جۇمىس ىستەيدى», دەدى ا.امىرتاەۆ.
جالپىۇلتتىق سوتسيال-دەموكراتيالىق پارتياسى توراعاسى اسحات راحىمجانوۆ استانا قالاسىنداعى №158 سايلاۋ ۋچاسكەسىنە كەلدى. «بۇگىن مەن ءوزىمنىڭ سايلاۋ ۋچاسكەمە كەلىپ, قاراپايىم ەل ازاماتى رەتىندە تاڭداۋىمدى جاسادىم. وزدەرىڭىز بىلەتىندەي, وتكەن جىلى رەفەرەندۋم ءوتتى. ونىڭ ناتيجەسىندە سايلاۋ جۇيەسىنە جانە دەپۋتاتتار كورپۋسىن قالىپتاستىرۋ ۇدەرىسىنە وزگەرىستەر ەنگىزىلدى. بۇل ءوز كەزەگىندە ەلىمىزدەگى ساياسي جۇيەنىڭ وزگەرۋىنە اسەر ەتەدى», دەدى ا.راحىمجانوۆ.
قازاقستان حالىق پارتياسىنىڭ توراعاسى ەرمۇحامەت ەرتىسباەۆ ەلورداداعى م.وتەمىسوۆ اتىنداعى وقۋشىلار سارايىندا ورنالاسقان №137 سايلاۋ ۋچاسكەسىندە داۋىس بەردى.
«قازىرگى سايلاۋ – بۇرىنعىدان وزگەرەك. تاۋەلسىزدىك تاريحىندا تۇڭعىش رەت ماجوريتارلىق جۇيەگە 30 پايىز بەرىلدى. بۇل – قوعامنىڭ سۇرانىسى. سەبەبى وتانداستارىمىزدىڭ باسىم كوپشىلىگى پارتيا قۇرامىندا جوق. وڭ وزگەرىس ناتيجەسىندە قوعامدىق كوشباسشىلار دا دوداعا ءتۇسىپ, باق سىنادى. بۇل ەل تاۋەلسىزدىگىنىڭ 30 جىلدان استام تاريحىنداعى ەڭ قىزىقتى, مازمۇندى جانە باسەكەگە تولى سايلاۋ بولدى. بۇل – حالىقتىڭ جەڭىسى. ءبىز ساياسي ساۋاتتى مەملەكەتكە اينالدىق», دەدى ە.ەرتىسباەۆ.