ازاماتتاردىڭ قۇجاتتارىن (جەكە كۋالىك, پاسپورت, جۇرگىزۋشى كۋالىگى, نەكە تۋرالى كۋالىك, بالالاردىڭ تۋ تۋرالى كۋالىگى) قامتيتىن تسيفرلىق قۇجاتتار سەرۆيسىندە تاعى ءبىر قۇجات (باسقا قۇجاتتار بولىمىندە) پايدا بولدى. ەندى ءاربىر ازاماتقا كولىك قۇرالدارى يەلەرىنىڭ ازاماتتىق-قۇقىقتىق جاۋاپكەرشىلىگىن مىندەتتى ساقتاندىرۋ ءپوليسى قولجەتىمدى.
بۇل سەرۆيس تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى, ۇلتتىق بانك, «ۇلتتىق اقپاراتتىق تەحنولوگيالار» اق جانە «مەملەكەتتىك نەسيە بيۋروسى» اق ۇيلەسىمدى جۇمىسىنىڭ ناتيجەسىندە جۇزەگە اسىرىلدى.
ساقتاندىرۋ ءپوليسى – كولىك قۇرالدارى يەلەرىنىڭ ازاماتتىق-قۇقىقتىق جاۋاپكەرشىلىگىن ساقتاندىرۋدىڭ مىندەتتى ءتۇرى بويىنشا ساقتاندىرۋشى مەن ساقتانۋشى اراسىنداعى شارتتىق قاتىناستاردىڭ دەرەگىن راستايتىن قۇجات.
– باسقا تسيفرلىق قۇجاتتارمەن ۇقساستىعى بويىنشا «ساقتاندىرۋ ءپوليسى» قاعاز قۇجاتپەن قاتار زاڭدى كۇشىنە يە جانە ساقتاندىرۋ كومپانياسى, ساقتاندىرۋ ءپوليسىنىڭ مەرزىمى جانە تاعى دا باسقا اقپاراتتى قامتيدى. اتالعان تسيفرلىق قۇجاتتاعى بارلىق مالىمەت «مەملەكەتتىك نەسيە بيۋروسى» اق اقپاراتتىق جۇيەسىمەن ينتەگراتسيالىق ءوزارا ءىس-قيمىل ارقىلى كورسەتىلەدى. مينيسترلىك حالىققا ىڭعايلى بولۋ ءۇشىن قۇجاتتاردى تسيفرلاندىرۋ جۇمىسىن جالعاستىرادى, – دەدى مينيستر باعدات مۋسين.
اتالعان تسيفرلىق قۇجات ازاماتتارعا ءوز قۇجاتىن ءموبيلدى قوسىمشا ارقىلى ەلەكتروندىق فورماتتا كورۋگە, سونداي-اق ونىڭ دۇرىستىعىن تەكسەرۋگە مۇمكىندىك بەرەدى.
ساقتاندىرۋ ءپوليسىنىڭ بولۋى نەمەسە بولماۋى تۋرالى اقپارات مىندەتتى ساقتاندىرۋ تۋرالى زاڭنىڭ تالاپتارىن, اتاپ ايتقاندا, كولىك قۇرالدارى يەلەرىنىڭ ازاماتتىق-قۇقىقتىق جاۋاپكەرشىلىگىن ورىنداۋ ءۇشىن, سونداي-اق ازاماتتى ساقتاندىرۋ شارتىنىڭ اياقتالۋ مەرزىمىن باقىلاۋ جانە وزگە دە ماقساتتار ءۇشىن پايدالانۋعا قاجەت.
مەملەكەتتىك نەسيە بيۋروسىنىڭ مالىمەتىنشە, 2022 جىلدىڭ قورىتىندىسى بويىنشا 6 ملن-نان استام ساقتاندىرۋ ءپوليسى بەرىلگەن.