سارسەنبى كۇنى 1/8 فينالعا شىققان تاعى ەكى كوماندا بەلگىلى بولدى. «ع» توبىندا ارگەنتينامەن بىرگە نيگەريا قۇراماسى پلەي-وفف كەزەڭىنە شىقتى. سول سياقتى «ە» توبىندا فرانتسيامەن قاتار, شۆەيتساريا كومانداسى ەكىنشى ورىن الىپ, كەلەسى اينالىمدا ونەر كورسەتۋگە مۇمكىندىك الدى.
ال «F» جانە «ە» توبىنداعى يران مەن ەكۆادور قۇرامالارى ەكىنشى ورىنعا تالاسسا دا 1/8 فينالعا شىعا المادى. بۇل جەردە ولاردى كىنالاۋدىڭ رەتى جوق. كوماندالار جاقسى ويىن ورنەگىن كورسەتتى. اسىرەسە, ەكۆادوردىڭ العاشقى ماتچتا شۆەيتسارياعا, سودان كەيىن ەڭ سوڭعى ويىنىندا فرانتسياعا قارسى وتكىزگەن كەزدەسۋلەرى تالاي جانكۇيەردى تاڭ-تاماشا قالدىردى. يران كومانداسىنىڭ ويىنىنا قاتىستى دا وسىنى ايتۋعا بولادى. ولار دا ارگەنتينا مەن نيگەرياعا قارسى جاقسى وينادى. بىرەۋىندە 1:0 ەسەبىمەن جەڭىلسە, ەكىنشىسىندە 0:0 ەسەبىمەن تەڭ ءتۇستى. ال ەكۆادوردىڭ توپتىق كەزەڭنەن شىعا الماعانى شىنىمەن دە مىڭداعان جانكۇيەردىڭ جانىنا باتتى. بۇل كوماندا الەم چەمپيوناتىنا جاقسى دايىندىقپەن كەلگەندەرىن كورسەتتى.
ەگەر ەكۆادور توپتىق كەزەڭنىڭ سوڭعى كەزدەسۋىندە فرانتسيانى ۇتقاندا كەلەسى اينالىمعا شىعاتىن ەدى. الايدا, ولار كەشەگى ويىندا فرانتسيامەن 0:0 ەسەبىمەن تەڭ ءتۇسىپ, 1/8 فينالعا شىعۋعا بارلىق مۇمكىندىكتى جىبەرىپ الدى. بىراق امال نە, ەكۆادور كولۋمبيا مەن كوستا-ريكانىڭ, ۋرۋگۆاي مەن ارگەنتينانىڭ جانە برازيليانىڭ جولىن قايتالاي الماي, ەۋروپالىق كوماندالارعا جول بەرىپ قويدى. ءسويتىپ, وسى توپتا فرانتسيا مەن شۆەيتساريا 1/8 فينالعا جولداما الدى. شۆەيتساريا كەشەگى ويىندا گوندۋراستى 3:0 ەسەبىمەن ۇتتى. ال ەكۆادور فرانتسيانى جەڭە الماسا دا ناعىز شەبەرلەردىڭ ويىنىن كورسەتتى. اسىرەسە, ەكۆادورلىق قاقپاشى ماكسيمو بانگەرانىڭ ويىنى جانكۇيەرلەردى ءتانتى ەتتى.
«F» توبىندا جاعداي ءمۇلدەم باسقاشا ءوربىدى. بۇل توپتا ارگەنتينا فاۆوريت بولىپ سانالعان. ەكىنشى ورىندى نيگەريا نەمەسە يران ەكەۋىنىڭ ءبىرى الادى دەپ ەسەپتەلگەن. توپتىق كەزەڭ بىتكەنشە ءوزى سولاي بولدى دا. ارگەنتينا قارسىلاستارىنىڭ بارىنە ەشقانداي مۇمكىندىك بەرمەي, ءبىرىنشى ورىندى يەلەندى. دەگەنمەن, ليونەل مەسسي باستاعان ارگەنتينانىڭ قارسىلاستارى دا وسال بولعان جوق. ماسەلەن, وسى توپتان 1/8 فينالعا شىعا الماسا دا يران ارگەنتينا مەن نيگەرياعا قارسى كەزدەسۋدە جاقسى ويناپ, جاقسى قىرىنان كورىنىپ كەتتى. بىراق بۇل كوماندا سوڭعى ويىندا بوسنيا جانە گەرتسەگوۆينا قۇراماسىنان 3:1 ەسەبىمەن جەڭىلۋگە ءماجبۇر بولدى. ال بوسنيا بولسا, بيىل العاش رەت الەمدىك دوداعا قاتىستى. سونىڭ وزىندە ارگەنتينا مەن نيگەرياعا قارسى لايىقتى ويىن ورنەگىن كورسەتىپ, سوڭعى ماتچتا ءۇش ۇپاي اكەتتى.
ەندى «F» توبىنان ءبىرىنشى بولىپ كەلەسى اينالىمعا شىققان ارگەنتينا 1/8 فينالدا شۆەيتساريامەن كەزدەسەدى. قازىر كوپ ادام گەرمانيا, گوللانديا, برازيليامەن بىرگە, ارگەنتينانىڭ دا الەم چەمپيونى بولۋعا مۇمكىندىگى بار ەكەنىن ايتادى. بۇل قۇرامادا مەسسيدىڭ جالعىز ءوزى كوپ جاعدايدا ماتچتىڭ تاعدىرىن شەشە الاتىنىن كورسەتىپ ءجۇر. مۇنى ول سوڭعى ءۇش ويىندا ءتورت گول سوعىپ دالەلدەدى. ارگەنتينا قۇراماسىندا مەسسيدەن باسقا انحەل دي ماريا, گونسالو يگۋاين, سەرحيو اگۋەرو, حاۆەر ماسكەرانو, ماركوس روحو, ماكسي رودريگەس سياقتى قاجەت كەزدە كەرەك جەردەن تابىلاتىن فۋتبولشىلار دا بار. سولار مەسسيگە كومەكشى بولسا, ارگەنتينانىڭ ءبىراز جەرگە باراتىنى ءسوزسىز.
ال «ە» توبىندا ءبىرىنشى ورىن العان فرانتسيا 1/8 فينالدا نيگەريامەن كۇش سىناسادى.
كەشە كەشكە «G» جانە «ن» توپتارىنىڭ سوڭعى ويىندارى ءوتتى. اقش پەن گەرمانيا, پورتۋگاليا مەن گانا, الجير مەن رەسەي, كورەيا مەن بەلگيا قۇرامالارى كەزدەستى.
داستان كەنجالين,
«ەگەمەن قازاقستان».