برەندتىك جوبالار باسىمدىققا يە

2020-2022 جىلدار ارالىعىندا جالپى سوماسى 8 ملرد 526 ملن تەڭگەگە باعا­لانعان 71 جوبا ىسكە اسىرىلسا, 2022 جىلى 18 جوبا ىسكە اسىرىلىپ, وعان 6 ملرد 363 ملن تەڭگە جۇمسالدى. مادەني جوبالار وبلىس ورتالىعىندا عانا ەمەس, اۋىلدىق ەلدى مەكەندەردە دە جۇزەگە اسىرىلۋدا. 2022 جىلى ىسكە اسىرىلعان بارلىق جوبانىڭ 15-ءى اۋىلداردا بولدى. سونىمەن قاتار مادە­نيەت ۇيلەرى جانىندا بيۋدجەت جانە دەمەۋ­شىلىك قاراجات ەسەبىنەن قۇرىلعان 69 مادەني-ساۋىقتىرۋ ورتالىعى تابىستى جۇ­مىس ىستەپ جاتىر. ولار مادەنيەتى مەن تاري­حى باي وڭىرلەردە ىسكە اسىرىلىپ, ءتۋريزم­دى دامىتۋعا جاڭا سەرپىن بەرىپ وتىر.

وڭىردە مادەني سالا ماماندارىنىڭ تاپشىلىعى بىلىنەدى. وبلىس اكىمى­نىڭ گرانتتارى ورىنداۋشىلىق ونەر, تەات­ر, رەجيسسۋرا, ارت-مەنەدج­مەنت, ما­دەني-دەمالىس جۇمىسى ماماندىق­تارىنا ەلى­مىزدىڭ جوو-لارىنا بولى­نە­تىن بولدى. وسى ادىسپەن جالپى سالا بو­يىنشا 100-گە جۋىق ماماندى, شى­عارماشىلىق ادامدارىن جانە تەح­نيكالىق قىزمەتكەرلەردى دايارلاۋ جوس­پارلانۋدا.

بىلتىر وبلىستا كەيىنگى ءۇش جىلدا العاش رەت جاڭا فورماتتاعى حالىقارالىق فەستيۆالدار وتكىزىلدى. سونىڭ ىشىندە «بوتاي – ۇلى دالا مادەنيەتى» ءى حالىق­ارالىق سۋرەتشىلەر سيمپوزيۋمىن اتاپ وتۋگە بولادى. وعان قىرعىزستان, وز­بەك­ستان, رەسەي جانە ءوز ەلىمىزدىڭ دارىن­دى كەسكىندەمە وكىلدەرى قاتىستى. الەمگە ايگىلى سكريپكاشى ايمان مۇسا­قو­جاە­ۆانىڭ قاتىسۋىمەن «Qyzyljar Music fest» مۋزىكالىق فەستيۆالى ءوتىپ, وعان يتاليا, گەرمانيا, باشقۇرتستان ەل­دە­رىنىڭ اتاقتى ارتىستەرى, «استانا-وپە­را» تەاترىنىڭ ورىنداۋشىلارى قا­تىستى. «تاۋەلسىزدىك – بابالار اماناتى» اتتى حالىقارالىق اقىندار ايتىسى ءوتتى. سو­نىمەن قاتار باس پروۆايدەر رەتىندە جەر­گىلىكتى دارىنداردى, وبلىستىڭ ما­دەني سالاداعى يگىلىكتەرىن كورسەتۋگە ار­نال­عان «جاھاندىق الەمدەگى زاماناۋي قازاقستاندىق مادەنيەت» جوباسى ىسكە اسى­رىلدى.

«بىلتىرعى قول جەتكىزگەن تابىس­تار­­­دىڭ قاتارىندا ولگا روستوۆششي­كو­­­­ۆانىڭ جەتەكشىلىگىمەن قۇلاعى كەمىس ونەر­­پازداردان ۇيىمداستىرىلعان «Sen­sitive» بال ءبيى ءانسامبلىنىڭ اقش-تاعى «25-ءشى ورىنداۋشىلىق ونەر تۇرلەرى» فەستيۆالىندە گران-پري جەڭىپ العانىن جانە مىسىر ەلىنىڭ حۋرگادا قالاسىندا بولعان الەم چەمپيوناتىندا باس جۇلدە العانىن ايتۋعا بولادى. ال «ادەمى-اۋ» بي ءانسامبلى تۇركيانىڭ يزمير قالا­سىندا وتكەن IV دۇنيەجۇزىلىك كوشپەن­دىلەر ويىن­دارىنىڭ سالتاناتتى راسىمىنە قاتىستى.

جەكە ورىنداۋشىلاردىڭ تابىستارى دا از بولعان جوق. وبلىستىق في­لار­مونيانىڭ ارتىستەرى اسحات پەن دي­نارا تاۋشەۆتار جانە رۋسلان مۇستا­فين تۇر­كيانىڭ الانيا قالاسىندا وتكەن «Global Art Competition» 2-ءشى حا­لىق­ارالىق باي­قاۋىنىڭ گران-پري يە­گەرلەرى جانە لاۋرەات­تارى اتاندى.

ءوڭىردىڭ تاماشا كورىنىستەرى كينو سالا­­سىنداعى جوبالاردى جۇزەگە اسىرۋعا تارتىمدى بولىپ وتىر. كەيىنگى جىلدارى وب­لىسىمىزدا «ماعجان», «دولگوە ەحو» جانە «قارا قىز» اتتى 3 كوركەم فيلم ءتۇ­­سىرىلدى. وتكەن جىلى دارىندى رەجيسسەر ءسابيت ەرنات «كۇلپاش» ءفيلمىن ءتۇسىردى. «مۇنداي جوبالار الداعى ۋاقىتتا دا جال­عاسادى», دەيدى د.ءابدىرايىسوۆ.

وبلىستاعى 321 كىتاپحانانىڭ ىشىندە س.مۇقانوۆ اتىنداعى امبەباپ عىلىمي كىتاپحانانىڭ اتاعى الىسقا كەتكەن. بۇل ەلىمىزدەگى حالىقارالىق قوردان گرانت الۋشى 26 كىتاپحانانىڭ ءبىرى اقش, فرانتسيا جانە ت.ب. كوپتەگەن مەم­لەكەتتەردىڭ ەل­شىلىك­تەرىمەن تىعىز جۇمىس ىستەيتىن جال­عىز كىتاپحانا. وسى كىتاپحانا ارقىلى ءبىزدىڭ ءوڭىرىمىز «وقىرمانى وزىق ولكە»  اتاعىنا يە.

وبلىستا 14 فيليالى بار وبلىستىق مەملەكەتتىك ارحيۆ جۇمىس ىستەيدى, ولار­دىڭ قورلارىندا ۇلتتىق مۇراعات قو­رىنىڭ 1 ميلليون 700 مىڭنان استام قۇ­جاتتارى شوعىرلانعان. ارحيۆتىك قۇ­جات­تار نەگىزىندە جىل سايىن وبلىس ارحيۆتەرى 30 مىڭنان استام مەملەكەتتىك قىزمەت كورسەتەدى.

وسى جىلى وبلىستىق مادەنيەت باس­قار­­ماسىنىڭ برەندتىك جوبالارى قاتا­رىندا قوجابەرگەن جىراۋدىڭ 360, شال اقىننىڭ 275, اقان سەرىنىڭ 180, ايعانىم حانشانىڭ 240, ماع­جان جۇماباەۆ پەن سۇلتانماحمۇت توراي­عىروۆتىڭ 130 جىل­دىعى اتالىپ وتەدى. سونىڭ ىشىندە م.جۇ­ماباەۆتىڭ 130 جىلدىعىنا ار­نالعان چەللەندج باس­تالىپ كەتتى.

سونداي-اق داستۇرگە اينالىپ كەتكەن «Qyzyljar Music fest» جانە ەرمەك سەركەباەۆ اتىنداعى حالىقارالىق كلاس­سيكالىق مۋزىكا فەستيۆالدەرىن وتكىزۋ جوسپارلانىپ وتىر. ال «بوتاي – ۇلى دالا مادەنيەتى» ءىى حالىقارالىق سۋرەت­شىلەر سيم­پوزيۋمىنا قاتىسۋشىلار تۇر­كيا, فرانتسيا جانە نيدەرلاندتان كەلەتىن بولادى.

سولتۇستىك قازاقستان وبلىسى