پرەزيدەنت قوناقجايلىق كورسەتىپ, قۇرمەتپەن قارسى العانى ءۇشىن رەجەپ تايىپ ەردوعانعا ريزاشىلىعىن ءبىلدىردى, دەپ حابارلايدى Egemen.kz اقورداعا سىلتەمە جاساپ.
مەملەكەت باسشىسى, ەڭ الدىمەن, جويقىن جەر سىلكىنىسىنەن زارداپ شەككەن تۇركيا حالقىنا كوڭىل ايتتى.
«مارقۇمداردىڭ تۋعان-تۋىستارىنا, وزىڭىزگە جانە بۇكىل تۇركيا حالقىنا تاعى دا كوڭىل ايتامىن. تۇركيا – ارقاشان قيىندىققا قارسى تۇرا بىلگەن مەملەكەت. سىزدەر مول تاجىريبە مەن ەل بىرلىگىنىڭ ارقاسىندا بۇل قيىندىقتى ەڭسەرىپ شىعاسىزدار دەپ سەنەمىن», دەدى قاسىم-جومارت توقاەۆ.
ءوز كەزەگىندە رەجەپ تايىپ ەردوعان شاقىرۋىن قابىل الىپ, انكاراعا كەلگەنى ءۇشىن قاسىم-جومارت توقاەۆقا العىس ايتتى.
«تۇركياعا كەلگەنىڭىزگە قۋانىشتىمىن. الاپات جەر سىلكىنىسىنەن 49 مىڭ ادام قازا تاپتى. وسىنداي قيىن ساتتە العاشقى بولىپ تەلەفون شالعان كوشباسشىلاردىڭ ءبىرى ءوزىڭىز بولدىڭىز. قازاقستانىڭ قۇتقارۋشىلارى زارداپ شەككەن ازاماتتارىمىزدى قۇتقارۋعا اتسالىستى. ءبىز شىنايى باۋىرمالدىقتى سەزىندىك», دەدى تۇركيا پرەزيدەنتى.