بيىل قۇرىلعانىنا 35 جىل تولىپ وتىرعان ەلورداداعى ساكەن سەيفۋللين مۋزەيىندە داۋىلپاز اقىنعا قاتىستى بىرقاتار جادىگەر ساقتالعان. سونداي قۇندى دۇنيەنىڭ ءبىرى – كورنەكتى مەملەكەت جانە قوعام قايراتكەرىنىڭ 1922 جىلى ورىندىقتا وتىرىپ, ەۋروپا ۇلگىسىمەن كيىنىپ تۇسكەن سۋرەتى. ءبىر عاجابى, وسى ارداقتى اقىن وتىرىپ تۇسكەن ورىندىق قازىر مۇراجايدا تۇر.
مۋزەي قىزمەتكەرىنىڭ ايتۋىنشا, بۇل ورىندىق مۇراجاي اشىلعان جىلدارى اكەلىنگەن. ناقتى كىم تاپسىرعانى بەلگىسىز. كەيىن قايتا جاڭعىرتۋدان وتكەن. قازىر مۋزەيدەگى باعالى جادىگەردىڭ ءبىرى.
ساكەننىڭ اقىندىعى مەن قايراتكەرلىگىنەن بولەك, ءساندى كيىنىپ, سۇلۋ-سىپا جۇرگەنىن جاقسى بىلەمىز. بۇعان دالەل رەتىندە اتاقتى جازۋشى ءسابيت مۇقانوۆتىڭ ساكەن سەيفۋللين تۋرالى ەستەلىگىنەن ءبىر ءۇزىندى كەلتىرە كەتەيىك: «مەنى ەكى نارسە قايران قالدىردى: ءبىرى – بۇل ادامنىڭ كوڭىلى, ەكىنشىسى – كەسكىن-كەيپى. اۋەلى كيىمى تۋرالى: باسىندا دوڭگەلەك قۇندىز بورىك, ۇستىندە قۇندىز جاعالى پالتو, اياعىندا ساپتاما قازاقى ەتىك. بۇلار مەنىڭ ول كەزدەگى ۇعىمىمدا, تەك بۋرجۋيلارعا عانا ءتان كيىم! بويى ورتادان بيىكتەۋ, دەنەسى تىك, جاۋىرىنى كەڭ بۇل ادامنىڭ كەسكىن جوباسى قازاق: بىراق ادەتتەگى قازاقتىڭ ءبىرى ەمەس, اسا سۇلۋ قازاق; ماڭدايى كەڭ, مۇرنى سۇلۋلانا بىتكەن دوڭەس, يمەك قاسى, قالىڭ ۇزىن كىرپىكتەرىندە قىراۋ تۇرعان سۇلۋ قارا كوزدەرى ۇلكەن, قايىرعان قويۋ ۇزىن مۇرتىنا اپپاق بوپ قالىڭ قىراۋ تۇرعان, ءوزى ءدال سولاي ما, الدە اياز سۇيۋدەن بە – سۇلۋ بەتىندە قۇلپىرا قان وينايدى!»