قۇرمانعازى اۋدانىنىڭ سافون اۋىلىنداعى ورتا مەكتەپكە قازاقتىڭ ايگىلى اقىنى قادىر مىرزا ءالىنىڭ اتى بەرىلگەن. ءبىلىم ورداسى وبلىس ورتالىعىنان 276 شاقىرىم قاشىقتا ورنالاسقان. 362 وقۋشىعا 54 مۇعالىم ءدارىس بەرەدى.
ءبىلىم ورداسى «اۋىلدىق ايماقتارداعى تىرەك مەكتەپتەرىنىڭ الەۋەتىن ارتتىرۋ» جوباسىنا ەنگىزىلگەن. سوعان سايكەس 27 وقۋ سىنىبى مەن قوسىمشا كابينەتتەر قايتا جاساقتالعان. «قازاقستان حالقىنا» قورىنان بولىنگەن 249 ملن 825 مىڭ تەڭگە دەمەۋشىلىك قارجىعا قاجەتتى قۇرال-جابدىقتار ساتىپ الىنعان.
– اۋىلدار مەن قالالاردا ورنالاسقان مەكتەپتەر اراسىندا الشاقتىق بايقالادى. ءبىلىم بەرۋ ساپاسى اسىرەسە, ەلدى مەكەندەردەگى مەكتەپتەردە تومەن دەگەن كوزقاراس بار. بۇل – بارشانى ويلانتاتىن جايت. مۇنداي ماسەلەنى جۇيەلى ءارى كەشەندى شەشۋ ءۇشىن «قازاقستان حالقىنا» قورى سەرىكتەستەرمەن بىرگە اۋىلدىق تىرەك مەكتەپتەردى دامىتۋ جونىندە شەشىم قابىلدادى. وسىعان بايلانىستى «اۋىلدىق جەرلەردەگى تىرەك مەكتەپتەردىڭ الەۋەتىن دامىتۋ» باعدارلاماسى اياسىندا 17 اۋىلدىق تىرەك مەكتەپتى جابدىقتاپ, ادىستەمەلىك قولداۋ كورسەتۋدى قولعا الدىق. وسى كەزگە دەيىن وڭىرلەردە 11 مەكتەپ قايتا جاراقتاندىرىلدى. وسىلايشا, ءبىلىم ساپاسىن كوتەرۋ ءۇشىن جاڭا جابدىقتار مەن داعدىلار شاعىن جيناقتى مەكتەپتەرگە باعىتتالادى. ويتكەنى مۇنداي شاعىن مەكتەپتەردە ماتەريالدىق-تەحنيكالىق بازانىڭ ەسكىلىگى مەن كادر جەتىسپەۋشىلىگى سەكىلدى وزەكتى ماسەلە بار, – دەيدى قوعامدىق قوردىڭ باسقارما توراعاسىنىڭ ورىنباسارى ءلاززات شىڭعىسباەۆا.
مەكتەپ ديرەكتورى سابىرجان جۇپارعاليەۆتىڭ ايتۋىنشا, باسقارۋشى قۇرامنىڭ بىلىكتىلىگى شىڭدالعان. ءوزى جانە ادىستەمە, يننوۆاتسيالىق جۇمىس جونىندەگى ورىنباسارلارى پەداگوگيكالىق شەبەرلىك ورتالىعى ۇيىمداستىرعان «مەكتەپتى ءتيىمدى باسقارۋ: مەكتەپ كومانداسى مەن ءبىلىم ساپاسى» كۋرسىندا ءبىلىم جەتىلدىرگەن. ال ۇستازدار ءۇشىن «باعالاۋدى قالىپتاستىرۋ» تاقىرىبىندا ءدارىس وتكىزىلگەن. ماتەماتيكا, ينفورماتيكا, اعىلشىن ءتىلى, بيولوگيا, قازاق ءتىلى جانە فيزيكا پاندەرىنىڭ مۇعالىمدەرى اتالعان ورتالىقتا بىلىكتىلىگىن ارتتىرعان.
– مەكتەبىمىز تولىقتاي جاڭاردى. ينتەراكتيۆتى تاقتالارمەن, باسقا دا قاجەتتى جابدىقتارمەن قامتىلدى. بۇرىن قولىمىز جەتپەي جۇرگەن STEM كابينەتى اشىلىپ, وقۋشىلارعا جاڭا مۇمكىندىكتەر اشىلدى. ەڭبەك ءپانى ءۇشىن ارنايى جابدىقتار الىندى. قىزدارىمىز تىگىن ماشينكاسىمەن ءىس تىگۋدى ۇيرەنىپ ءجۇر. وقۋشىلار ءتۇرلى روبوت قۇراستىرادى. ەندى بۇل مەكتەپتە الاڭسىز جۇمىس ىستەۋگە, بالالاردىڭ ساپالى ءبىلىم الۋىنا بارلىق جاعداي جاسالدى. كەلەشەكتە ءبىلىم ساپاسى ارتادى, – دەيدى س.جۇپارعاليەۆ.
اتىراۋ وبلىسى