قازاقستاننىڭ تەننيسشىسى ەلەنا رىباكينا ينديان-ۋەللستە ءوتىپ جاتقان جۇلدە قورى 8 800 000 اقش دوللارىن قۇرايتىن WTA 1000 ءتۋرنيرىنىڭ شيرەك فينالىنا شىقتى.
بۇعان دەيىنگى باسەكەلەردە امەريكالىق سوفيا كەنين مەن يسپانيالىق پاۋلا بادوسادان باسىم تۇسكەن وتانداسىمىز 1/8 فينالدا رەسەيلىك ۆارۆارا گراچەۆامەن شەبەرلىك بايقاستى. الەمدىك رەيتينگتە 66-ورىندا تۇرعان 22 جاستاعى رەسەي ويىنشىسىنىڭ باعىندىرعان پالەندەي بەلەستەرى جوق. «ۇلكەن دۋلىعا» دوداسىندا ول ءۇشىنشى كەزەڭنەن اسا الماعان. دەسەك تە ءدال وسى تۋرنيردە ۆارۆارا ءوزىنىڭ جەرلەسى, WTA تىزىمىندە سەگىزىنشى ساتىدا تۇرعان داريا كاساتكينانى قاپى قالدىرىپ, كوپشىلىك نازارىن وزىنە اۋداردى. بىراق ءبىزدىڭ ەلەناعا ونىڭ ءالى جەتپەدى. 1 ساعات 21 مينۋتقا سوزىلعان باسەكەدە جەرلەسىمىز ايقىن باسىمدىق تانىتتى – 6:3, 6:0.
شيرەك فينالدا ەلەنا رىباكينا كارولينا مۋحوۆامەن كۇش سىناسادى. 26 جاستاعى چەحيانىڭ تەننيسشىسى الەمدىك رەيتينگتە 76-ورىندى يەلەنۋدە. 2021 جىلى ول ۋيمبلدوندا ۇزدىك ءتورت ويىنشىنىڭ قاتارىنان كورىنىپ, اۋستراليانىڭ اشىق بىرىنشىلىگىندە جارتىلاي فينالعا دەيىن جەتتى.