قر ادىلەت مينيسترلىگىندە قازاقستانداعى تاۋارلارعا ىلەسپە قۇجاتتىڭ كۇشىن جويۋ تۋرالى بۇيرىق تىركەلدى. بۇيرىق 10 كۇنتىزبەلىك كۇننەن كەيىن كۇشىنە ەنەدى. ەندى سىرتقى ەكونوميكالىق قىزمەتتىڭ تاۋار نومەنكلاتۋراسىنىڭ (سەق تن) 3,5 مىڭ كودىنا سنت جانە ۆيرتۋالدى قويمانى قولدانۋ جويىلادى. ون كۇننەن كەيىن قازاقستاندىق مىڭداعان بۋحگالتەر مەن شاعىن جانە ورتا بيزنەس وكىلدەرى تاۋارعا ىلەسپە قۇجاتتى راسىمدەۋدەن بوساتىلادى, دەپ حابارلايدى Egemen.kz.
بۇل رەتتە تاۋارعا ىلەسپە قۇجاتتى راسىمدەۋ جونىندەگى مىندەتتەمەلەر ءالى دە اكتسيزدەلەتىن تاۋارلارعا (الكوگول ءونىمى, مۇناي ونىمدەرى) جانە قازاقستان ىشىندەگى ۆيرتۋالدى قويماعا بايلانعان قاداعالانۋ مەحانيزمى تۋرالى كەلىسىم بويىنشا سەق تن-ءنىڭ 11 كودى (توڭازىتقىشتار) جانە ۆيرتۋالدى قويماعا بايلانىستىرماي ەاەو ەلدەرىنە ەكسپورت/يمپورت كەزىندە كەيبىر تاۋارلارعا قولدانىلادى.
2023 جىلدىڭ 10 اقپانىنان باستاپ تاۋارعا ىلەسپە قۇجات تاۋارلاردىڭ جەكەلەگەن تۇرلەرى ء(داندى داقىلدار) بويىنشا ەاەو ەلدەرىنە ەكسپورت, يمپورت كەزىندە راسىمدەلەدى. ال 2023 جىلدىڭ 1 ساۋىرىنەن باستاپ قالعان تاۋارلار بويىنشا راسىمدەلەدى.
«اتامەكەن» ۇكپ تورالقا توراعاسى رايىمبەك باتالوۆتىڭ ايتۋىنشا, قازاقستاندا تاۋارعا ىلەسپە قۇجاتتى ەنگىزۋ باستالعاننان بەرى بيزنەسكە قاجەتسىز جۇكتەمە تۋدىرىپ, ونىمدەردىڭ قىمباتتاۋىنا جانە سالىق تولەۋشىلەردىڭ جاعدايىنىڭ ناشارلاۋىنا اكەلەتىنى تۇسىنىكتى بولدى.
«بۇگىن جاقسى جاڭالىقتى ەستىپ, قۋاندىق. ەكى جىلدان استام ۋاقىت بويى ۇلتتىق پالاتا جۇرگىزگەن جۇمىس بەكەر بولعان جوق. ءبىز قازاقستان ىشىندەگى تاۋارعا ىلەسپە قۇجاتتى جويۋعا قول جەتكىزدىك. مۇنداي «شيكى» پيلوتتىق پروتسەستەر جولعا قويىلماعان كەزدە, جۇيەدە تەحنيكالىق قاتەلەر بولعاندا, ال اقپاراتتىق جۇيە تۇراقسىز جۇمىس ىستەگەندە مۇنداي جايت بيزنەستە ورىن الماۋى ءتيىس ەكەنىن دالەلدەدىك. ويتكەنى بيزنەستە كەز كەلگەن دۇرىس ەمەس قادام تاۋاردىڭ نەمەسە قىزمەتتىڭ قۇنىنا اسەر ەتەدى. مۇنداي پيلوتتىق جوبالاردان تەك بيزنەس قانا ەمەس, حالىق تا زارداپ شەگەدى», دەپ اتاپ ءوتتى رايىمبەك باتالوۆ.
ەسكە سالساق, وتكەن جىلدىڭ 30 جەلتوقسانىندا قر قارجى مينيسترلىگى مەن «اتامەكەن» ۇلتتىق كاسىپكەرلەر پالاتاسى اراسىندا تاۋارعا ىلەسپە قۇجاتتاردى رەسىمدەۋ بويىنشا مىندەتتەمەلەردى تۇبەگەيلى قايتا قاراۋ تۋرالى ىنتىماقتاستىق تۋرالى مەموراندۋمعا قول قويىلدى. وسىلايشا, ەكى ۆەدومستۆو 2023 جىلدىڭ 1 ناۋرىزىنا دەيىن تاۋارعا ىلەسپە قۇجاتتى راسىمدەۋ جونىندەگى مىندەتتەمەلەردى قايتا قاراۋعا كەلىستى.
«ەكى جىلدان استام ۋاقىت بويى بۋحگالتەرلەر مەن كاسىپكەرلەر تاۋارعا ىلەسپە قۇجات پەن ۆيرتۋالدى قويما پيلوتتىق جوباسىنىڭ تاۋقىمەتىن كوردى. ونىڭ كۇشى جويىلعاننان كەيىن قازاقستان ىشىندە, ەڭ بولماعاندا, تاۋارعا ىلەسپە قۇجات بۇدان ءارى باسقا تاۋارلارعا تارالمايتىنىنا جانە 1,5 ملن كاسىپكەردىڭ اۋرە-سارساڭعا تۇسپەيتىنىنە قۋانىشتىمىز. قابىلدانعان شارالار بۋحگالتەرلەردىڭ جۇمىسىن ەداۋىر جەڭىلدەتەدى جانە كاسىپكەرلەردىڭ شىعىندارىن ازايتادى. بۇدان ءارى يمپورت, ەكسپورت كەزىندە تاۋارعا ىلەسپە قۇجات فورماسىن وڭايلاتۋ بويىنشا جۇمىس ىستەۋگە بولادى», دەدى «اتامەكەن» ۇكپ شاعىن جانە ورتا بيزنەستى دامىتۋ كوميتەتىنىڭ توراعاسى بەرىك زايروۆ.
تاۋارعا ىلەسپە قۇجاتتاردى رەسىمدەۋ جونىندەگى پيلوتتىق جوبانى 2020 جىلى مەملەكەتتىك كىرىستەر كوميتەتى ەنگىزدى. بۇل ەۋرازيالىق ەكونوميكالىق وداقتىڭ كەدەندىك اۋماعىنا اكەلىنگەن تاۋارلاردىڭ اينالىمىن باقىلاۋعا جانە ەلدەگى كولەڭكەلى ەكونوميكانى تومەندەتۋگە مۇمكىندىك بەرۋى كەرەك ەدى. الايدا, جوبانىڭ قورىتىندىسى ىلەسپە قۇجاتتىڭ جۇمىس ىستەۋى بويىنشا پروتسەستەر جولعا قويىلماعانىن, ونى رەسىمدەۋ بويىنشا اقپاراتتىق جۇيە تۇراقسىز جۇمىس ىستەيتىنىن, تەحنيكالىق قاتەلەر بار ەكەنىن كورسەتتى.
وسىلايشا, تاۋارعا ىلەسپە قۇجاتتاردى ەنگىزۋ سالىق تولەۋشىلەر مەن سالىق ورگاندارى اراسىنداعى ءتيىمدى ءوزارا ءىس-قيمىلدى قامتاماسىز ەتپەيدى, فيسكالدىق اكىمشىلەندىرۋدى قيىنداتادى, كاسىپكەرلىك قىزمەتتى شەكتەيدى جانە بيزنەس پەن مەملەكەتتىڭ نەگىزسىز شىعىندارىنا اكەپ سوعادى.