20 مامىردا تارازدا كاسىپقوي بوكستان حالىقارالىق تۋرنير وتەدى. سول جارىستا قازاقستاننىڭ تانىمال بىلعارى قولعاپ شەبەرى فيرۋزا ءشارىپوۆا دا ونەر كورسەتەدى.
ايشىقتى ونەرىمەن جانكۇيەرلەر جۇرەگىن جاۋلاپ العان 28 جاستاعى جامبىل بوكس مەكتەبىنىڭ تۇلەگى كاسىپقوي رينگتە 17 كەزدەسۋ وتكىزىپ, 15 رەت جەڭىسكە جەتتى. سەگىز باسەكەدە ايقىن باسىمدىق تانىتتى. ونىڭ قارسىلاسى – رۋت چيسەيل. مالاۆي وكىلىنىڭ دە ءجۇرىپ وتكەن جولى جارقىن جەڭىستەرگە تولدى. ول 14 جەكپە-جەكتىڭ تەك ەكەۋىندە عانا ۇتىلدى. جەتى قارسىلاسىن ەسىنەن تاندىردى.
تارازداعى باسەكەدە باعى جانعان بوكسشى 36 جاستاعى يرلانديانىڭ وكىلى, وليمپيادا چەمپيونى, بىرنەشە سالماق دارەجەسى بويىنشا ءابسوليۋتتى الەم چەمپيونى كەتي تەيلورمەن كۇش سىناسۋ قۇقىعىنا يە بولادى.