اقش-تىڭ ينديان-ۋەللس قالاسىندا ءوتىپ جاتقان WTA 1000 تۋرنيرىندە قازاقستاننىڭ ءبىرىنشى جانە الەمنىڭ 10-راكەتكاسى ەلەنا رىباكينا ءساتتى ونەر كورسەتىپ جاتىر.
ءۇشىنشى كەزەڭدە جەرلەسىمىز پاۋلا بادوسامەن شەبەرلىك بايقاستى. بىلتىر الەمدىك رەيتينگتە ەكىنشى ورىنعا دەيىن كوتەرىلگەن 25 جاستاعى يسپانيا تەننيسشىسى بۇل كۇندەرى ۇزدىكتەر تىزىمىندە 22-ساتىعا جايعاسقان. سوڭعى ەكى جىلدا ول اۋستراليانىڭ اشىق بىرىنشىلىگى مەن ۋيمبلدوننىڭ ءتورتىنشى اينالىمىنا دەيىن جەتىپ, رولان گارروستىڭ شيرەك فينالىندا ونەر كورسەتتى. سونداي-اق پاۋلا ينديان-ۋەللس, بەلگراد جانە سيدنەيدە وتكەن WTA تۋرنيرلەرىندە توپ جاردى. ەلەنا 1 ساعات 36 مينۋتقا سوزىلعان باسەكەدە 6:3, 7:5 ەسەبىمەن جەڭىسكە جەتتى. ەندى 1/8 فينالدا ول رەسەيلىك ۆارۆارا گراچەۆامەن شەبەرلىك بايقاسادى.
ءبىر قىزىعى, ءدال وسى تەننيسشىلەر اقش-تاعى جارىستىڭ جۇپتىق سايىسىندا بىرگە وينادى. بىراق رىباكينا مەن بادوسا جۇبى ەكىنشى اينالىمدا ەليزا مەرتەنس (بەلگيا) پەن ستورم ساندەرستەن (اۋستراليا) جەڭىلىپ قالدى.