سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى اسقار شاكىروۆ تاجىكستان رەسپۋبليكاسىنىڭ جانە ارمەنيا رەسپۋبليكاسىنىڭ توتەنشە جانە وكىلەتتى ەلشىلەرى حايرۋللو يبودزودا جانە ارمەن گەۆونديانمەن كەزدەستى, دەپ حابارلايدى Egemen.kz.
تاجىكستان ديپلوماتىمەن كەزدەسۋ بارىسىندا ەكىجاقتى پارلامەنتارالىق ىنتىماقتاستىق ماسەلەلەرى, اتاپ ايتقاندا, قر پارلامەنتى سەناتىنىڭ توراعاسى ماۋلەن اشىمباەۆتىڭ 2022 جىلعى مامىر ايىندا تاجىكستانعا جاساعان ساپارىندا قول قويىلعان 2022-2024 جىلدارعا ارنالعان جوسپاردى ىسكە اسىرۋ بارىسى جانە وسى سالادا اتقارىلعان شارالاردىڭ قورىتىندىسى تالقىلاندى.
ارمەنيا رەسپۋبليكاسىنىڭ ەلشىسى ءوز ەلىنىڭ ءوزارا ءتيىمدى ساۋدا-ەكونوميكالىق ىنتىماقتاستىقتى, ونىڭ ىشىندە ينۆەستيتسيالار تارتۋ سالاسىنداعى ىنتىماقتاستىقتى ودان ءارى بەلسەندىرۋگە مۇددەلى ەكەندىگىن ءبىلدىردى. سونداي-اق حالىقارالىق قاۋىپسىزدىكتى قامتاماسىز ەتۋ ماسەلەلەرى بويىنشا پىكىر الماستى.
ديپلوماتتار پرەزيدەنت قاسىم-جومارت توقاەۆتىڭ باستاماسىمەن قازاقستاندا جۇزەگە اسىپ جاتقان جان-جاقتى رەفورمالاردى ىسكە اسىرۋ بارىسىمەن, سونداي-اق الداعى پارلامەنت ماجىلىسىنە سايلاۋعا دايىندىق جۇمىسىمەن تانىستى.
كەزدەسۋلەر ناتيجەسىندە قر پارلامەنتىنىڭ ەكىجاقتى جانە كوپجاقتى پارلامەنتارالىق ىنتىماقتاستىقتى كەڭەيتۋگە دايىندىعى تۋرالى ايتىلدى.